Hiob 8
8
De ieeschte Räd von Bildad: Gott siene Jerajchtichkjeit en Strof un Leew – De Gottloose woaren unjagonen – Säajen derch Busse
1Un Bildad, de Schuchita, auntwuad un säd:
2Woo lang west du soowaut räden, un sellen de Wieed en dienem Mul jewaultja Wint sennen? 3Woat Gott daut Rajcht bieejen, ooda woat de Aulmajchtja de Jerajchtichkjeit bieejen? 4Wan diene Kjinja jäajen am jesindicht ha, soo jeef hee an äare Äwaträdungen han. 5Wan du Gott iewrich sieekjst un däm Aulmajchtjen om Jnod betst, 6wan du rein un rajchtschaufen best, jo, dan woat hee too diene Gonst oppwakjen un wada häastalen de Wonunk von diene Jerajchtichkjeit; 7un dien Aunfank woat jerinj erschienen, oba dien Enj sea groot woaren.
8Dan befroag doch daut frieejoasche Jeschlajcht, un recht dien Senn opp daut, waut äare Vodasch erforscht ha. 9(Dan wie sent von jistren un weeten nuscht, dan een Schauten sent onse Doag oppe Ieed.) 10Woaren jane die nich belieren, die sajen, un Wieed ut äarem Hoat väabrinje?
11Wausst Papiaschelp huach, woa kjeen Somp es? Wausst Riegrauss huach onen Wota? 12Noch es daut aum Jreene, un woat nich aufjeschnäden, soo verdrieecht daut ver aulem Grauss. 13Aulsoo sent de Stiej aula, dee Gott vejäten; un de Gottloose äare Hopninj vejeit. 14Sien Vetruen woat aufjeschnäden, un siene Hopninj es een Spannwäw. 15Hee stett sikj opp sien Hus, un daut helt nich staunt; hee helt sikj doaraun faust, un daut blift nich stonen.
16Sauftich es hee enne Sonn, un siene Auflaja breeden sikj ut äwa sienen Goaden häa; 17äwa Steenhupes veflajchte sikj siene Wartlen, hee sitt de Wonunk de Steena; 18wan hee [Gott] am von siene Städ wajchritt, soo velicht see am: «Ekj ha die niemols jeseenen!» 19Kjikj, daut es de Freid opp sienem Wajch; un ut däm Stoff woaren aundre waussen.
20Kjikj, Gott woat dän Vollkomnen nich veschmieten, un de Iebel doonende fot hee nich aune Haunt. 21Wan hee dien Mul met Lache fellen woat un diene Leppen met Jubelschaul, 22woaren diene Haussa bekjleet woaren met Schaund, un daut Zelt de Gottloose woat nich mea sennen.
Currently Selected:
Hiob 8: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
