Hiob 7
7
Kloag äwa daut menschliche Doasennen, äwa sien Loss un äwa dän onboarmherzjen Gott – De Bedd aun Gott am to veschoonen
1Haft de Mensch nich eenen hoaden Deenst oppe Ieed, un sent siene Doag nich aus de Doag von eenem Doagesleena? 2Aus een Kjnajcht, dee sikj nodäm Schauten bangt, un aus een Doagesleena, dee opp sien Loon luat, 3soo sent mie de Mon Entteischung jeworden, un Nachten de Mieej mie toojedeelt. 4Wan ekj mie dollaj, soo saj ekj: Wanea woa ekj oppstonen? Un de Owent trakj sikj han, un ekj woa daut Dreien em Bad saut bat Zemorjes. 5Mien Fleesch es bekjleet met Warm un Ieedkjarscht, miene Hut trakjt sikj toop un tjitat. 6Miene Doag gonen schwinda doahan aus een Wäwaschepkje, un veschwinjt onen Hopninj.
7Jedenkj, daut mien Läwen een Frodem es! Mien Uag woat daut Jlekj nich wadaseenen. 8Mie woat nich mea seenen daut Uag daut mie jeseenen; recht diene Uagen opp mie, soo sie ekj nich mea. 9De Wolkj veschwinjt un foat doahan; wäa en däm Scheol rauffoat, kjemt nich wada nohecht. 10Hee kjemt nich mea trigj no sienem Hus, un siene Städ erkjant am nich mea. 11Soo well uk ekj mien Mul nich trigjhoolen, well räden en Bedrenkjnis en mienem Jeist, well kloagen en de Bettanis en miene Seel.
12Sie ekj een Mäa, ooda een Ojjeheia em Mäa, daut du een Wajchta jäajen mie oppstallst? 13Wan ekj saj: Treesten woat mie mien Bad, mien Loaga woat miene Kloagen droagen halpen, 14soo vefiescht du mie met diene Dreem, un derch Jesechta enjst du mie, 15soo daut miene Seel vestäakjen väatrakjt, leewa däm Doot wält aus mien aufjemoagada Lief. 16Ekj veacht daut - ekj woa nich eewich läwen: Lot auf von mie! Dan een Frodem sent miene Doag. 17Waut es de Mensch, daut du am huaghelst, un daut du dien Hoat opp am rechst, 18un du die jieda Morjen om am kjemmascht, un jiedre Uageblekje am proofst? 19Woo lang west du nich von mie wajchkjikjen, von mie nich aufloten, bat ekj mien Kjwiel veschluck? 20Ha ekj jesindicht, waut deed ekj die aun, du Beoobachta de Menschen? Wuarom hast du mie toom Zielpunkt jesat, daut ekj mie selfst too Laust jeworden sie? 21Un wuarom vejeffst du nich miene Äwaträdungen un latst nich vebiegonen miene Ojjerajchtichkjeit? Dan nu woa ekj mie em Stoff lajen, un du sieekjst no mie, soo sie ekj nich mea.
Currently Selected:
Hiob 7: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
