Hiob 42
42
Hiob siene Auntwuat: De Aunerkjanunk woo groot Gott es un daut busfoadje trigjnämen von siene Aunkloag
1Un Hiob auntwuad Gott un säd:
2Ekj weet, daut du aules kaust, un kjeen Väahaben die vehindat woaren kaun. 3Wäa es daut, dee däm Rot trigjhelt onen Erkjantnis? Soo ha ekj däm beuadeelt, waut ekj nich vestund, Dinj, too wundaboa fa mie, dee ekj nich kjand. 4Hea doch, un ekj well räden; ekj well die froagen, un du belia mie! 5Met däm Ua ha ekj von die jehieet, oba nu haft mien Uag die jeseenen. 6Doarom veaufschu ekj mie un doo en Stoff un Ausch Busse.
Veuadeelunk un Jnod fa de Frind von Hiob – Hiob woat jerajchtfoadicht
7Un daut passieed, nodäm de Har dise Wieed too Hiob jerät haud, doa säd de Har too Elifas, däm Temanita: Mien Oaja es oppjeflaumt jäajen die un jäajen diene beid Frind; dan nich jeziement ha jie von mie jerät, aus mien Kjnajcht Hiob. 8Un nu nämt junt säwen Bolles un säwen Schopsbakj, un got no mienem Kjnajcht Hiob un Opfat een Brauntopfa fa junt. Un Hiob, mien Kjnajcht, mucht fa junt bedden; blooss am well ekj aunnämen, doamet ekj nich aun junt doo no june Noaheit; dan jie ha nich jeziement von mie jerät, aus mien Kjnajcht Hiob.
9Doa jinjen Elifas, de Temanita, un Bildad, de Schuchita, un Zofar, de Naamathita, un deeden, aus Gott to an jerät haud; un Gott naum Hiob aun.
Gott sien Säajen äwa Hiob
10Un Gott dreid Hiob siene Jefangenschoft, aus hee fa siene Frind bäd; un Gott vemieed aules, waut Hiob jehaut haud, om daut Dobbelde. 11Un daut kaumen no am aule siene Breeda un aule siene Sestren un aule siene frieejoasche Bekaunde; un see auten en sienem Hus met am, un see beweese am äa Deelnämen un treesten am äwa aul daut Onjlekj, daut Gott äwa am jebrocht haud; un see jeewen am een jiedra een jewesset Stekj (Golt ooda Selwa), un een jiedra eenen goldnen Rinkj. 12Un Gott säajend daut Enj Hiobs mea aus sien Aunfank; un hee kjrieech 14 000 Stekj Kjlienvee un 6000 Kameelen un 1000 Poa Rinda un 1000 Äselinen. 13Un daut wudden am säwen Säns un dree Dajchta jebuaren. 14Un hee jeef de ieeschte däm Nomen Jemima, un de tweede däm Nomen Kezia, un de dredde däm Nomen Keren-Happuch. 15Un soone scheene Frues aus Hiob siene Dajchta worden em gaunzen Launt nich jefungen. Un äa Voda jeef an een Oawgoot enne Medd äare Breeda. 16Un Hiob läwd nodäm 140 Joa; un hee sach siene Kjinja un siene Kjinjaschkjinja, vea Jeschlajchta. 17Un Hiob storf, oolt un de Doag saut.
Currently Selected:
Hiob 42: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
