Hiob 41
41
1Kjikj, eenem jiedren siene Hopninj woat jeteischt: Woat maun nich aul bie sienem aunkjikjen doljedrekjt? 2Kjeena es soo frajch, daut hee am reizt. Un wäa es daut, dee sikj ver mienem Aunjesecht stalen doaf? 3Wäa haft mie verhäa waut jejäft? Un ekj woa am vejelten. Waut unjrem gaunzen Himmel es, es mient.
4Ekj well nich stell sennen von siene Jläda un von siene groote Krauft un von siene scheen jebude Jestault. 5Wäa dakjt am sien Bowakjleet op? En sienem dobbelden Jebiss, wäa drinjt doa nenn? 6Wäa deed de Dooasch von sienem Aunjesecht op? De Kjreiss von siene Tänen es een Schrakj. 7Siene stoakje Schilda sent eene Pracht, jiedret eene met faustem Säajel veschloten. 8Een jiedret paust sikj daut aundre aun, un kjeene Loft kjemt doatweschen; 9Stekj aun Stekj henjen see faust toop, see hoolen sikj jäajensiedich un tranen sikj nich. 10Sien Pruste strolt Licht ut, un siene Uagen sent aus Ziepasch de Morjeroote. 11Ut sienem Rach gonen Fiastakja, Fiafunke spretzen rut. 12Ut siene Näs kjemt Ruak rut, aus ut eenem koakenden Topp un Grope. 13Sien Frodem stekjt Kole aun, un eene Flaum foat ut sienem Rach. 14En sienem Hauls wont Krauft, un de Angst hupst ver am häa. 15De Waums aun sienem Fleesch schlit aun, sent am faust aunjegote, un bewäajen sikj nich. 16Sien Hoat es hoat aus Steen, un hoat aus een unjaschta Molsteen. 17Fa sienem Opphäwen ferchten sikj Stoakje, vom Vezoagen woaren see utasich. 18Traft maun am met daut Schwieet, daut helt nich staund, noch Spies, noch Steetstang, noch spetza Feila. 19Daut Iesa acht hee fa Stroo, daut Koppa fa fulet Holt. 20De Feila jajcht am nich enne Flucht, Schliesasteen vewaundlen sikj ver am en Stoppel. 21Aus Stoppel es am de Kaumfkjiel, un hee velacht daut Ruzhen vonne Steetstang. 22Unja am sent schoape Schoawels; oppem Schlaum breet hee eenen Draschschläde ut. 23Hee moakt de deepe Wotasch aus eenen Koaktopp, moakt daut Mäa aus eenen Saulwtopp. 24Hinja am dacht de Stich, maun kunn de Streem fa grauet Hoa hoolen. 25Oppe Ieed es kjeena soo aus hee, dee onen Angst jeschaufen es. 26Aulet Huage kjikj hee aun; hee es Kjennich äwa aule wille Tieren.
Currently Selected:
Hiob 41: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
