Hiob 40
40
Hiob siene Auntwuat: Daut ensechtje trigjnämen de Aunkloag jäajen Gott
1Un Gott auntwuad Hiob un säd:
2Well de Dodla met Gott rechten? Dee doa Gott trajchtwiest, auntwuad doaropp!
3Un Hiob auntwuad Gott un säd:
4Kjikj, ekj sie too jerinj, waut saul ekj die doajäajen sajen? Ekj laj miene Haunt opp mien Mul. 5Eenmol ha ekj jerät, un ekj well nich mea auntwuaden, un twee Mol, un ekj well daut nich mea doonen.
De tweede Räd von Gott: Bewies von Gott siene Macht derch Bestrofunk de Huachmootje – Siene Jewault äwa däm Behemot un däm Leviatan
6Un Gott auntwuad Hiob ut däm Storm un säd:
7Ombinj doch diene Lenden aus een Maun; ekj well die froagen, un du belia mie! 8West du mien Rajcht tonicht moaken, mie vedaumen, doamet du jerajcht best? 9Ooda hast du eenen Oarm aus Gott, un kaust du met diene Stemm donnre aus hee? 10Peasch die doch met Huagheit un Majestät, un kjleed die en Prunk un Pracht! 11Jeet diene oaja Streem ut, un kjikj aun aulem Stolt, un drekj am dol! 12Kjikj opp aulem Stolt, bieej daut, un riet de Gottloose opp äare Städ dol! 13Begrow an aula toop en däm Stoff, schlut äare Aunjesechta em Veborjnen en! 14Dan woa uk ekj die lowen, daut diene Rajchte die Help schauft.
15See doch daut Behemot (Nilpieet), däm ekj met die jemoakt ha; hee frat Grauss aus daut Rind. 16Kjikj doch, siene Krauft es en siene Lenden, un sien Stoakjsennen en siene Buckmusklen. 17Hee bicht sienen Zoagel aus een Zeeda, de Sänen en sienem Schinkje sent veflochten. 18Siene Knoakes sent Ruasch von Koppa, siene Been aus Iesastangen. 19Hee es de Ieeschta von de Wäaj Gottes [El]; dee am jemoakt, haft am sien Schwieet (Tänen) jeschaufen. 20Dan de Boaj droagen am Fooda, un doa oppem Flekj spälen aule Tieren. 21Unja Lotusbescha lajcht hee sikj dol, em Vestäakj von Rua un Somp; 22Lotusbescha bedakjen am met äarem Schauten, de Wäden vom Stroom. 23Kjikj, de Stroom schwalt sea aun, hee rant nich enjstlich doavon; hee blift ruich, wan een Jordan jäajen sien Mul drift. 24Jript maun am ver siene Uagen, derchboat maun siene Näs met eene Faul?
25Trakjst du däm Leviatan met de Angel rut, un lajst du siene Tung en de Angelschnooa? 26Kaunst du een Strank derch siene Näs trakjen, un sien Kjennback met eenem Rinkj derchstäakjen? 27Woat hee die sea Bedden, ooda die saunfte Wieed jäwen? 28Woat hee eenen Bunt met die moaken, daut du am toom eewjen Kjnajcht nemst? 29Woascht du met am spälen aus met eenem Voagel, un am fa diene Mejales aunbinjen? 30Woaren de Feschafrind met am vehaundlen, am unjre Hendla vedeelen? 31Kaunst du siene Hut met Spiessen fellen, un sien Kopp met Feschahoakes? 32Laj diene Haunt aun am, - jedenkj aun däm Kaumf, doo daut nich wada!
Currently Selected:
Hiob 40: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
