Hiob 38

De ieeschte Räd von Gott: Froagen nom Jrinda de Erschaufunk, äwa de doodje un beläwde Natua

1Un de Har auntwuad Hiob ut däm Storm un säd:

2Wäa es daut, dee däm Rot vedunkelt met Wieed onen Erkjantnis? 3Ombinj doch diene Lenden aus een Maun; soo well ekj die froagen, un du belia mie!

4Woa wieescht du, aus ekj de Ieed jrind? Saj daut, wan du Ensecht besettst! 5Wäa haft äare Mot bestemt, wan du daut weetst? Ooda wäa haft äwa ar de Motschnua jetrocken? 6Opp waut worden äare Gruntfausten nenn jesenkjt? 7Ooda wäa haft äa Akjsteen jelajcht, aus de Morjestearns metenaunda juchte un aule Säns Gottes jubelde?

8Un wäa haft daut Mäa met Dooasch veschloten, aus daut utbruak, väakaum ut däm Muttaschoot, 9aus ekj Wolkjen too sienem Kjleet un dunkle Wolkjen to siene Winjlen muak, 10un ekj am miene Jrensen bestemd un Rijel un Dooasch sad, 11un säd: Bat hiahäa saust du komen un nich wieda, un hia es eene Jrens jesat fa diene stolten Walle?

12Hast du, soo lang du läfst, eenem Morjenroot befoolen? Hast du däm Morjenroot äare Städ weeten loten, 13daut see de Akjen de Ieed foten, un de Gottloose von ar vejoacht woaren? 14See vewaundelt sikj aus Säajelleem, un aules steit doa aus en eenem Kjleet; 15un de Gottloose woat äa Licht jenomen, un de oppjehowna Oarm woat vebräakjen.

16Best du bat de Kjwalen vom Mäa jekomen, un hast du däm deepen Grunt derchwaundat? 17Worden die de Dooasch vom Doot opjemoakt, un sachst du de Dooasch vom Doodesschauten? 18Hast du ensecht jenomen enne breede Ieed? Saj aun, wan du daut aules weetst!

19Woont es de Wajch no de Wonunk vom Licht, un de Diestanis, woa es äare Städ? - 20Daut du an hanbrinjst no äare Jrensen, un daut du de Stich no äarem Hus kjanst. 21Jo, du weetst daut; dan too jane Tiet wordst du jebuaren, un de Zol diene Doag es groot!

22Best du nodäm Väarot vom Schnee jekomen, un hast du däm Väarot vom Hoagel jeseenen, 23dee ekj toopjespoat ha fa de bedrenjnis Tiet, fa däm Kaumf un Schlachtdach? 24Woont es de Wajch, opp däm daut Licht sikj vedeelt, de Oostwint sikj äwa de Ieed vebreet? 25Wäa deeld de Räajenstreem en Ranbonen un eenen Wajch däm Donnastrol, 26om räajnen to loten opp een Launt onen Menschen, opp de Wieste, doa kjeen Mensch es, 27om saut too moaken daut Drieeje un Vedräjde, un, om daut Grauss utloten kaun?

28Haft de Räajen eenen Voda, ooda wäa moakt de Dreppen vom Deiw? 29Ut wäms Schoot kjemt daut Ies häa, un de Riep vom Himmel, wäa haft däm jebuaren? 30Daut Wota woat faust aus Steen, un de bowaschte Schicht deit sikj toop.

31Kaunst du daut Säwenjestärn binjen, ooda de Faslen vom Orion leesen? 32Kaunst du de Bilda vom Tiakjreiss to siene Tiet väakomen loten, un däm groote Boa met siene Kjinja leiden? 33Kjanst du de Himmels Jesazen, ooda bestemmst du siene Harschoft äwa de Ieed?

34Kaunst du diene Stemm no de Wolkjen opphäwen, daut eene Wota Menj die bedakjt? 35Kaunst du Blitz utschekjen, daut see hanfoaren, daut see to die sajen: Hia sent wie? 36Wäa haft Weisheit enne Nieren jelajcht, ooda wäa haft däm Jeist Vestaunt jejäft? 37Wäa talt de Wolkjen met Weisheit, un de Himmelsschläaj, wäa jitt an ut, 38wan de Stoff too eenem hoaden Stekj tooprant un de Kjlieta aun eenaunda kjleewen?

39Jajchst du de Muttaleiw däm Raup, un stellst du de Jia de junge Leiws, 40wan see enne Heel ligjen, un enne Bescha oppe Lua setten? 41Wäa moakt de Krauj äare Speise reed, wan siene Junge too Gott schrieen, omhäa erren onen Noarinj?

Currently Selected:

Hiob 38: PBJHF

Highlight

Copy

Compare