Hiob 21
21
Hiob siene Auntwuat: Daut gootgonen de Gottloose – Gott spood sikj nich schind daut Jlekj un Onjlekj uttodeelen – Kjeen Jerecht äwa de Gottloose
1Un Hiob auntwuad un säd:
2Hieet, hieet miene Räd! Un dit wia een Troost fa junt. 3Vedroacht mie, un ekj well räden, un nodäm ekj jerät ha, kaust du spotten. 4Recht sikj miene Kloag jäajen eenem Mensch? Ooda wuarom saul ekj nich onjeduldich sennen? 5Dreit junt no mie un entsatzt junt, un lajcht de Haunt oppem Mul!
6Jo, wan ekj doaraun denkj, soo sie ekj erschrakjt, un Zetren kjemt äwa mien Fleesch. 7Wuarom läwen de Gottloose, woaren oolt, nämen aun Macht too? 8Äa Somen steit faust ver an, met an, un äare Nokomen ver äare Uagen. 9Äare Hiesa ha Fräd, onen Forcht, un Gottes Wäd es nich äwa an. 10Sien Boll besprinjt un befrucht secha, siene Koo kaulwt un haft kjeene Väljeburt. 11Äare junge Kjinja schekjen see ut aus eene Häad, un äare Junges hupsen omhäa. 12See erhäwen de Stemm bie Trompeeten un Hoapen un sent froo biem Fleetenklang. 13Em Jlekj vebrinjen see äare Doag, un en eenem Uagenblekj faulen see en däm Scheol. 14Un doch sajen see too Gott: Go von ons! Un wie velangen nich no de Erkjantnis von diene Wäaj. 15Waut es de Aulmajchtja, daut wie am deenen sullen, un waut nuzt ons daut, daut wie am (beddent) aunroopen?
16Kjikj, äa Jlekj steit nich en äare Haunt. De Rot de Gottloose es wiet von mie! 17Woo foaken passieet daut, daut de Laump de Gottloose utjeit un äa Vedoawen äwa an kjemt, daut hee an Schlenjen toodeelt, en sienem Oaja, 18daut see aus Stroo woaren ver däm Wint, un aus Sprie, dee de Stormwint wajchfäacht? 19Gott spoat, saj jie, sien Uadeel fa siene Kjinja. Hee vejelt am, daut hee daut feelt! 20Siene Uagen sellen sien Vedoawen seenen, un von däm Aulmajchtjen sien Jrim mucht hee drinkjen! 21Dan waut licht am aun sienem Hus no am, wan de Zol siene Monen toojedeelt es? 22Kaun maun Gott Erkjantnis lieren, jo, doa hee dee doch es, dee de Hechten recht? 23Disa stoaft en siene vollen Krauft, gaunz ruich un sorjloos. 24Siene Jefässa sent voll Malkj, un daut Moakjs en siene Knoakes es jedrenkjt. 25Un jana stoaft met ne betre Seel un haft daut Goode nich erjatst. 26Aula toop ligjen see em Stoff, un Warm bedakjen an.
27Kjikj, ekj kjan june Jedanken, un de Aunschläaj, met waut jie mie Jewault aundoonen. 28Dan jie sajen: Wua es daut Hus de Ferschten, un woa daut Wonzelt de Gottloose? 29Ha jie nich befroagt, dee opp disem Wajch vebietrakjen? Un kjan jie äare Tieekjen nich: 30Daut de Beesa veschoont woat aum Dach det Vedoawens, daut aum Zorndach see wajchjeleit woaren? 31Wäa woat am em Aunjesecht sienen Wajch toweeten loten? Un haft hee jehaundelt, wäa woat daut am vejelten? 32Un hee woat no de Jräwa hanjebrocht, un opp däm Graufhupe wacht hee. 33Seet sent am de Dolkjlieta. Un hinja am häa trakjen aule Menschen, un ver am häa jinjen see onen Zol.
34Woo treest jie mie nu met Donst? Un von june Auntwuaden blift blooss Truloosichkjeit äwa.
Currently Selected:
Hiob 21: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
