Hiob 19
19
Hiob siene Auntwuat: Eene Kloag äwa de Frind äare Strenjheit, äwa daut Lieden daut to Orrajcht biejedonen wort - Sechaheit äwa däm Erleesa
1Un Hiob auntwuad un säd:
2Woo lang well jie miene Seel ploagen un mie met Wieed vemolen? 3Aul 10 Mol es daut, daut jie mie veacht ha; schäm jie junt nich, mie too velatsen. 4Un ha ekj uk werkjlich jeert, soo blift doch mien Errtum bie mie. 5Wan jie werkjlich jäajen mie groot doonen wellen, un jäajen mie un miene Schmach doonen, 6dan soo weet, daut Gott mie en mienem Rajcht jeboagen un mie ommstalt haft met sienem Nat.
7Kjikj, äwa Jewaultdot schriee ekj, un woa nich erhieet; ekj roop om Help, un doa es kjeen Rajcht. 8Hee haft mien Wajch omtient, daut ekj nich doaräwa kaun, un opp miene Stiej lajcht hee Diestanis. 9Miene Iea haft hee mie utjetrocken, un de Kroon von mienem Haupt wajchjenomen. 10Hee haft mie runtom doljeräten, soo daut ekj vegonen mott, un haft miene Hopninj utjeräten aus eenen Boom. 11Un sienen Oaja leet hee jäajen mie brennen, un acht mie soo aus sienen Fiend. 12Aula toop kaumen siene Schoa un muaken äaren Wajch frie jäajen mie, un loagaden sikj om mien Zelt. 13Miene Breeda haft hee von mie wajchjenomen, un miene Bekaunde sent mie gaunz framd jeworden. 14Miene Frintschoft bliewen wajch, un miene Vetrude ha mie vejäten. 15Miene Husfrind un miene Deenstmejales achten mie fa eenen Framden; een Utlenda sie ekj en äare Uagen jeworden. 16Ekj roop mienem Kjnajcht, un hee auntwuat nich; met mienem Mul mott ekj am bedden. 17Mien Odem es miene Fru jäajenaun, un mien iebla Jeroch de Kjinja miena Mutta. 18Selfst junge Kjinja veachten mie; ekj well oppstonen, soo räden see äwa mie. 19Aule miene Vetrude ha een Aufschu aun mie, un dee ekj leewd, ha sikj jäajen mie jedreit. 20Miene Knoakes kjleewen aun miene Hut un aun mienem Fleesch, un blooss met de Hut opp miene Tänen sie ekj doavon jekomen.
21Erboarmt junt äwa mie, erboarmt junt äwa mie, jie miene Frind! Dan de Haunt Gottes haft mie aunjetaust. 22Wuarom vefolj jie mie aus Gott, un woaren von mienem Fleesch nich saut? 23Oo daut doch miene Wieed oppjeschräwen worden! Oo daut dee en een Buak jeschräwen worden, 24met eenem iesanem Jreffel un Blie en däm Fels nenn jehakt opp eewich!
25Un ekj, ekj weet, daut mien Erleesa läft, un aus de Latsta woat hee opp de Ieed stonen; 26un nodäm dise miene Hut too Grunt jebrocht es, soo woa ekj ut mienem Fleesch Gott aunkjikjen, 27däm ekj selfst - mie aunkjikjen woa, un däm miene Uagen seenen woaren, un kjeen aundra: Miene Nieren veschmachten en mienem Ennalichen.
28Wan jie sajen: Woo sell wie am vefoljen? Un daut de Wartel de Sach sikj en mie befinjt, 29soo fercht junt fa daut Schwieet! Dan daut Schwieet es de Jrim äwa de Misdot; om daut jie weeten, daut een Jerecht es.
Currently Selected:
Hiob 19: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
