Hiob 14
14
De Kloag äwa daut nutzloose vom Menschenläwen – De Hopninj es vejäfs opp eenen Troost nom Doot
1De Mensch, vonne Fru jebuaren, es kort aun Doag un met Onru saut jemoakt. 2Aus eene Bloom kjemt hee väa un vewalkjt; un hee rant aus de Schauten un haft kjeen Bestaund. 3Dan noch hast du diene Uagen op, un fiescht mie met die em Jerecht! 4Woo kunn een Reina ut eenem Onreinen komen? Nich een eensja! 5Dan wan siene Doag bestemt sent, de Zol siene Monen bie die sent, wan du am de Jrensen jesat hast, dee hee nich äwaschräden doaf, 6soo kjikj von am wajch, daut hee Ru haft, bat hee aus een Doagesleena sienen Dach vollbrinjt.
7Dan fa däm Boom jeft daut Hopninj: Woat hee aufjehakt, soo schleit hee wada ut, un siene Auflaja hieren nich opp. 8Wan siene Wartlen enne Ieed ella woaren, un sien Staum em Stoff stoaft: 9Vom Wotajeroch lat hee wada ut un drift Asta aus een fresch Jeplaunta. 10Oba de Maun stoaft un licht doa; un de Mensch veschwinjt, un woa es hee? 11Daut veranen de Wota ut daut Mäa, un de Fluss drieecht ut un veschwinjt: 12Soo lajcht de Mensch sikj han un steit nich wada opp; bat de Himmel nich mea sent, wakje see nich opp un woaren nich oppjewakjt ut äarem Schlop.
13Oo daut du mie en däm Scheol vestopst, mie bedakjst, bat sikj dien Oaja aufdreit, mie eene bestemde Tiet satst un dan aun mie denkjst! 14(Wan een Maun stoaft, woat hee wada läwen?) Aule Doag von miene Deensttiet wull ekj uthoolen, bat mien Aufleesen kjemt! 15Du wuddst roopen, un ekj wudd die auntwuaden; du wuddst die bangen nodäm Woakj von diene Henj. 16Dan nu talst du miene Schräd; woakst du nich äwa miene Sinden? 17Miene Äwaträdunk es vesäajelt en een Pinjel, un to miene Misdot hast du doatoo jedonen.
18Un doch, een Boajch felt en, vefelt, un een Fels jeit von siene Städ; 19Wota veriewe de Steena, äare Streem schwamen däm Stoff de Ieed wajch; oba du moakst de Hopninj de Menschen tonicht. 20Fa emma äwawaultijst du am, un hee jeit doahan; sien Aunjesecht veendat, schekjst du am wajch. 21Siene Kjinja komen too Iea, un hee weet daut nich; un see woaren jerinj, un hee acht nich opp an. 22Blooss om am selfst - haft Weedoag sien Fleesch, un blooss om am selfst - haft Trua siene Seel.
Currently Selected:
Hiob 14: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
