Hiob 13
13
Woarnunk aun Hiob siene Frind fa Gott siene Jerajchtichkjeit – Väasechtje Oppfodrunk no Gott toom Rajchtstriet
1Kjikj, daut aules haft mien Uag jeseenen, mien Ua jehieet un sikj jemoakjt. 2Soo väl jie weeten, weet uk ekj; ekj sie nich jerinja aus jie.
3Doch toom Aulmajchtjen well ekj räden, un ver Gott mie too rajchtfoadjen wensch ekj; 4jie doajäajen sent Läajna, nuschtje Doktasch, jie aula! 5Oo daut jie doch stell wieren! Daut wudd junt too Weisheit jeräakjent. 6Hieet doch miene Rajchtfoadjunk, un hieet opp de Veteidjunk miene Leppen! 7Well jie fa Gott Orrajcht räden, un ver am Läajes räden? 8Well jie ver am Partie ennämen? Ooda well jie ver Gott rechten? 9Es daut goot fa junt, daut hee junt erforscht? Ooda woa jie am teischen, aus maun eenem Mensch teischt? 10Strofe woat hee junt, wan jie em Jeheemen de Persoon aunseenen. 11Woat nich siene Huagheit junt erschrakjen, un sien Schrakj opp junt faulen? 12June Denkjspricha sent Spricha von Ausch, june Schutzwäa erwiest sikj aus Schutzwäa von Leem.
13Siet stell, lot mie, un ekj well räden, waut äwa mie uk komen mucht. 14Wuarom sull ekj mien Fleesch tweschen miene Tänen nämen, un mien Läwen miene Haunt aunvetruen? 15Kjikj, moakt hee mie doot, ekj woa opp am hopen, blooss ekj well miene Wäaj ver sienem Aunjesecht rajchtfoadjen. 16Uk daut woat mie too Radinj sennen, daut een Ruchloosa nich ver sien Aunjesecht komen doaf. 17Hieet, hieet miene Räd, un miene Erkjläarung drinjt en june Uaren! 18Kjikj doch, ekj ha de Rajchtsach reedjemoakt! Ekj weet, daut ekj rajcht behoolen woa. 19Wäa es daut, dee met mie rechten kaun? Dan nu wull ekj stellsennen un vegonen.
20Blooss tweeatlei doo mie nich; dan woa ekj mie nich ver dienem Aunjesecht vestäakjen. 21Diene Haunt nemm von mie wajch, un dien Schrakj enjst mie nich. 22Dan roop, un ekj well auntwuaden, ooda ekj well räden, un du auntwuad mie. 23Wooväl Misdoten un Sinden ha ekj? Lot mie miene Äwaträdungen un miene Sinden weeten! 24Wuarom vestakjst du dien Aunjesecht, un helst mie fa dienen Fiend? 25West du een looset Blaut wajch schrakjen, un de drieeje Stoppel vefoljen? 26Dan Bätret vehenjst du äwa mie, un latst mie de Misdot miene Jugent oawen; 27un miene Feet lajst du em Stock, un beobachst aule miene Stiej, du jrenst die miene Footsohle en; 28doa ekj doch vefaul aus Vefulnet, aus een Kjleet, daut de Mott vefräten haft.
Currently Selected:
Hiob 13: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
