Hiob 11
11
De Ieeschte Räd von Zofar: Sien doajäajen räden jäajen Hiob – Monunk toom Rajcht doonen un sikj deemootjen ver däm aulweetenda Gott
1Un Zofar, de Naamatita, auntwuad un säd:
2Sullen de Menj de Wieed nich beauntwuat woaren, ooda sull een Schwauza rajcht haben? 3Sull dien Jeräd de Lied toom stellsennen brinjen, daut du spotten saust, un kjeena die beschämen, 4daut du sajen saust: Miene Lia es rein, un ekj sie rein en diene Uagen? 5Oba mucht Gott doch räden un siene Leppen jäajen die opmoaken, 6un die toweeten loten de Jeheemnise de Weisheit, daut see daut Dobbelde aun Werkjlichkjeit es! Dan must du erkjanen, daut Gott die väl Schult vezeit.
7Kaunst du de Deepheit Gottes errieekjen, ooda daut Wäsent vom Aulmajchtjen erkjanen? 8Himmelhuach sent see - waut kaust du doonen? Deepa aus de Scheol - waut kaust du weeten? 9Lenja aus de Ieed es äare Mot un breeda aus daut Mäa. 10Wan hee vebietrakjt un jefangen nemt un toom Jerecht vesaumelt, wäa well am dan hindren? 11Dan hee kjant de faulsche Lied; un hee sitt Fräfel, onen daut hee to jäwen brukt. 12Uk een holla Kopp jewent Vestaunt, uk aus een Falm vom Wiltäsel aus Mensch jebuaren woat.
13Wan du dien Hoat rechten woascht un diene Henj no am utstrakjst, - 14wan Fräfel en diene Haunt es, soo doo daut wajch, un lot nich Orrajcht en diene Zelten wonen, 15jo, dan woascht du dien Aunjesecht fälaloos opphäwen, un woascht faust sennen un die nich ferchten. 16Dan du woascht de Mieej vejäten, woascht aun an denkjen - aus aun äwaranendet Wota; 17un dacha aus de Meddach woat dien Läwen entstonen; mucht daut Diesta sennen - aus de Morjen woat daut woaren. 18Un du woascht Vetruen foten, wiels daut Hopninj jeft; un du woascht die omhäa kjikjen, en Sechaheit die dollajen. 19Un du woascht die loagren, un kjeena woat die oppschrakjen; un väle woaren diene Gonst sieekjen. 20Oba de gottloose Uagen woaren veschmachten; un jiedre Tooflucht es an veloaren, un äare Hopninj es daut Utpuste de Seel.
Currently Selected:
Hiob 11: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
