Hiob 10
10
De Kloag äwa Gott sien Vehoolen en dee schwoare Proow
1Miene Seel äakjelt mien Läwen; ekj well miene Kloag en mie frie Bon loten, well räden enne Bettanis miene Seel. 2Ekj well too Gott sajen: Vedaum mie nich! Lot mie weeten, wuaräwa du met mie rechst. 3Jefällt die daut, daut du bedrekjst, daut du de Oabeit von diene Henj veschmitst un äwa däm Rot de Gottloose dien Licht dachen latst? 4Hast du Uagen von Fleesch, ooda sitst du, aus een Mensch sitt? 5Sent diene Doag aus de Doag von eenem Mensch, ooda diene Joaren aus de Doag von eenem Maun, 6daut du no miene Ojjerajchtichkjeit sieekjst un no miene Sind forschst, 7doa du doch weetst, daut ekj nich schuldich sie, un daut kjeena es, dee ut diene Haunt rad?
8Diene Henj ha mie gaunz jemoakt un mie runtom jeschaufen, un du veschlinjst mie! 9Jedenkj doch, daut du mie aus Leem jemoakt hast - un nom Stoff west du mie trigjgonen loten! 10Hast du mie nich hanjegote aus Malkj, un aus Kjees mie jeronne loten? 11Met Hut un Fleesch hast du mie bekjleet, un met Knoakes un Sänen mie derchjeflochten. 12Läwen un Jnod hast du mie erwesse, un diene Väasorj bewoat mienen Jeist. 13Doch soowaut haudst du en dienem Hoaten; ekj weet, daut du dit em Senn haudst: 14Wan ekj sindijd, soo woascht du mie beoobachten, un von miene Schult mie nich friespräakjen. 15Wan ekj schuldich wia, wee mie! Un wia ekj jerajcht, soo durf ekj mien Haupt nich erhäwen, saut jeworden von Schaund un mien Älent seenent. 16Un recht sikj daut nohecht, aus een Leiw woascht du mie joagen, un emma wada diene Wundakrauft aun mie erwiesen. 17Du woascht diene Zeijen mie jäajenäwa stalen un dien Oaja jäajen mie vemieren, emma wada fresche Häaschoa jäajen mie oppbeeden. 18Wuarom hast du mie ut däm Muttalief väakomen loten? Ekj wia jestorwen, un kjeen Uag haud mie seenen sullen! 19Aus wan ekj nich jewast wia, soo haud ekj sennen sullen, vom Muttalief nom Grauf jedroacht worden!
20Sent miene Doag nich weinich? Lot auf, drei die von mie, daut ekj mie een bät oppmunta, 21ea ekj hango (un nich wadakom) en daut Launt de Diestanis un daut Doodesschauten, 22en daut Launt, diesta aus daut Dunkel, daut Launt de Doodesschauten un de Onordninj, un woa daut Dachwoare (Dach) soo aus daut Dunkle (de Nacht) es!
Currently Selected:
Hiob 10: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
