Jesaja 54
54
Israel woat wada aunjenomen, sien Jebiet un de Bevelkjarunk waust, siene Harlichkjeit un Sechaheit
1Jubel, du Onfruchtboare, dee nich jebuaren, bräakj en Jubel ut un juch, dee kjeene Weedoag jehaut haft! Dan de Velotne woat mea Kjinja haben aus de Befriede, sajcht de Har. 2Moak däm Rum en dienem Zelt wiet, un breed de Behenjen (Zeltdakjen) en diene Woninj ut; spoa nich! Moak diene Strenj lank, un diene Pols stäakj faust nenn! 3Dan du woascht die to Rajchten un to Linkje utbreeden; un dien Somen woat de Nazionen aus Ieejentum nämen, un de velotne Städa besiedlen. 4Forcht die nich, dan du woascht nich beschämt woaren, un schäm die nich, dan du woascht nich too Schaund woaren; sonda du woascht de Schmach von diene Jugent vejäten un de Schaund daut du Wätfru wieescht nich mea jedenkjen. 5Dan dee die jemoakt haft, es dien Maun, - Gott de Häaschoa es sien Nomen - un de Heilja Israels es dien Erleesa: Hee woat dee Gott de gaunze Ieed jenant woaren. 6Dan aus een velotnet un em Jeist betriebte Fru roopt die de Har, un aus eene Fru de Jugent, wan see vestat es, sajcht dien Gott. 7Eenen kjlienen Uagenblekj ha ekj die veloten, oba met grootem Erboarmen well ekj die saumlen; 8em Oaja ha ekj eenen Uagenblekj mien Aunjesecht ver die vestoaken, oba met eewje Jnod woa ekj mie äwa die erboarmen, sajcht de Har, dien Erleesa. 9Dan dit saul mie sennen aus daut Wota Noah, aus ekj schwua, daut daut Wota Noah de Ieed nich mea äwaschwamen sellen; soo ha ekj jeschwuaren, daut ekj nich mea äwa die oajalich, noch die schellen woa. 10Dan de Boaj muchten veschwinjen un de Aunboaj waklen, oba miene Jnod woat nich von die aufgonen un mien Frädensbunt nich waklen, sajcht de Har, dien Erboarma.
11Du Älendje, Stormbeweajde, Onjetreestete! Kjikj, ekj laj diene Steena en Blieglaunz un jrind die met Safieren; 12un ekj moak diene Däakja (Fensta) ut Rubin un diene Dooasch von Karfunkel un aule diene Jrensen von wieetvollen Steena. 13Un aule diene Kjinja woaren vom Harn jelieet, un de Fräd von diene Kjinja woat groot sennen. 14Derch Jerajchtichkjeit woascht du faust woaren. Wiet auf von Bedrekjung, dan du bruckst die nich enjsten, fa Jefoa, dan dee woat die nich noda komen. 15Kjikj, wan maun sikj uk toopdeit, soo es daut nich von mie ut; wäa sikj jäajen die toopdeit, dee woat aun die toom Faul komen. 16Kjikj, ekj ha däm Schmett jeschaufen, dee daut Kolenfia aunblost un daut Jewäa moakt, no sienem Hauntwoakj; un ekj ha däm Vedoawa jeschaufen, om tonicht to moaken. 17Kjeenem sien Jewäa, daut jäajen die jemoakt woat, saul daut jelinjen; un jiedre Tung, dee ver Jerecht jäajen die oppsteit, woascht du schuldich spräakjen. Daut es daut Oawgoot de Kjnajchts Gottes un von mie ut äare Jerajchtichkjeit, sajcht de Har.
Currently Selected:
Jesaja 54: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
