Jesaja 53

1Wäa haft onse Vekjindjunk jejleeft, un wäm es de Oarm Gottes openboa jeworden? 2Un hee es aus een Auflaja ver am rutjewossen, un aus een Auflaja vonne Wartel ute drieeje Ieed. Hee haud kjeene Jestault un kjeene Pracht; un aus wie am sagen, doa haud hee kjeen Aunseenen, daut wie aun am jefaulen jefungen hauden. 3Hee wia veacht un veloten vonne Menschen, een Maun de Weedoag un met Lieden vetrut, un aus eena, ver däm maun daut Aunjesecht vestakjt; hee wia veacht, un wie ha am fa nuscht jeacht.

4Woarhauft, hee haft onse Lieden jedroacht, un onse Weedoag haft hee opp sikj jelot. Un wie, wie hilden am fa bestroft, von Gott jeschloagen un doljeboagen; 5doch om onse Sinden wellen wia hee derchjestoaken, om onse Misdoten wellen veschloagen. De Strof too onsem Fräd lach opp am, un derch siene Strime sent wie jeheelt. 6Wie aule erden omhäa aus Schop, wie dreiden ons een jiedra opp sienen Wajch; un de Har haft am onse aule Ojjerajchtichkjeit trafen loten.

7Hee wort meshaundelt, oba hee buag sikj un deed sien Mul nich op, aus een Laum, daut toom schlachten jefieet woat, un aus een Schop, daut stomm es ver sienem Schäara; un hee deed sien Mul nich op. 8Hee es wajchjenomen worden ut de Bedrekjung un ut däm Jerecht. Un wäa woat sien Jeschlajcht utspräakjen? Dan hee wort aufjeschnäden ut däm Launt de Läwendje: Wäajen mienem Volkj siene Äwaträdunk haft am de Strof jetroffen. 9Un maun haft sien Grauf bie de Gottloose bestemt; oba bie eenem Rikjen es hee jewast en sienem Doot, wiels hee kjeen Orrajcht begonen haft un kjeene Läajes en sienem Mul jewast es.

10Doch däm Harn jefoll daut, am to veschlonen, hee haft am lieden loten. Wan siene Seel daut Schultopfa woat jestalt haben, soo woat hee Nokomen seenen, hee woat siene Doag velenjren; un de Wellen Gottes woat en siene Haunt jelinjen. 11Von siene Seelen Mieej woat hee Frucht seenen un saut woaren. Derch siene Erkjantnis woat mien jerajchta Kjnajcht de Väle Jerajcht moaken, un äare Misdoten woat hee opp sikj nämen. 12Doarom woa ekj am Aundeel aun de Groote jäwen un met Jewaultje woat hee däm Raup deelen: Doafäa, daut hee siene Seel en däm Doot utjesched haft un to de Äwaträda tojetalt worden es; oba hee haft väle äare Sinden jedroacht un fa de Iebel doonende jebät haft.

Currently Selected:

Jesaja 53: PBJHF

Highlight

Copy

Compare