Jesaja 52

Jerusalem em komenden Kjennichrikj

1Woak opp, woak opp; kjleed die, Zion, en diene Macht! Kjleed die en diene Prachtkjleeda, Jerusalem, du heilje Staut! Dan von nu aun woat kjeen Onbeschnädna un kjeen Orreina en die nengonen. 2Schedda däm Stoff von die auf, sto opp, sat die han, Jerusalem! Moak die loos von diene Haulsfassle, du jefangne Dochta Zion! 3Dan soo säd de Har: Emsonst sent jie vekoft worden, un nich fa Jelt sell jie jeleest woaren. 4Dan soo sajcht de Har, Gott: No Ägipten trock mien Volkj aum Aunfank rauf, om sikj doa opptohoolen; un Assur haft daut onen Uasoak bedrekjt. 5Un nu, waut ha ekj hia too doonen? Sajcht de Har. Dan mien Volkj es emsonst wajchjenomen; siene Beharscha juche, sajcht de Har, un bestendich, däm gaunzen Dach, woat mien Nomen jelastat. 6Doarom saul mien Volkj mienen Nomen kjanen lieren, doarom aun janem Dach erfoaren, daut ekj daut sie, dee doa sajcht: Hia sie ekj!

7Woo leeftolich sent opp de Boaj dee äare Feet, dee de Frooe Bootschoft vekjindicht, dee Fräd vekjindicht, dee de Goode Bootschoft brinjt, dee Heil vekjindicht, dee too Zion sajcht: Dien Gott harscht aus Kjennich! 8De Stemm diene Wajchtasch! See häwen de Stemm opp, see juche aula toop; dan Uag en Uag seenen see, woo de Har Zion trigjbrinjt. 9Bräakjt en Jubel ut, jucht aula toop, jie Trimma Jerusalem! Dan de Har haft sien Volkj jetreest, haft Jerusalem erleest. 10De Har haft sienen heiljen Oarm ver de Uagen aule Nazionen opjedakjt, un aule Enj de Ieed seenen de Radinj von onsem Gott.

11Got, got, got rut von doa, rieet nuscht Orreinet aun! Got rut ut äare Medd, reinicht junt, dee jie daut Jescherr Gottes droagen! 12Dan jie sellen nich haustich uttrakjen, un nich en Flucht wajchgonen; dan de Har jeit ver junt häa, un jun Wajchta es de Gott Israels.

Gott sien Kjnajcht waut stalveträdent aulet Lieden opp sikj nemt, woat Veharlicht

13Kjikj, mien Kjnajcht woat met Ensecht haundlen; hee woat erhowen un oppjehowen woaren un sea huach sennen. 14Soo aus sikj väle äwa die jewundat ha, - soo wia sien utseenen veschompieet, mea aus irjent eenen Maun sient, un siene Jestault, mea aus de Menschenkjinja - 15soo aus hee väle Nazionen en Staunen vesad (brocht), äwa am woaren Kjennichs äa Mul veschluten. Dan see woaren seenen, waut an nich vetalt wia; un waut see nich jehieet hauden, woaren see woanämen.

Currently Selected:

Jesaja 52: PBJHF

Highlight

Copy

Compare