Jesaja 39
39
De Jeschekjte ut Babel bie Hiskia un Gott dreift met Jerecht
1To jane Tiet schekjt Merodach-Baladan, de Sän Baladan, de Kjennich von Babel, een Breef un Jeschenkj aun Hiskia; dan hee haud jehieet, daut hee krank jewast wia un wada jesunt jeworden wia. 2Un Hiskia freid sikj äwa an un wees an sien Schauzhus: Daut Selwa un daut Golt un de Jewerzen un daut kostboare Eelj; un sien gaunzet Jereetschoftshus, un aules, waut sikj en sienem Schauz befung; daut wia nuscht en sienem Hus un en siene gaunze Harschoft, daut Hiskia an nich jewast haud. 3Doa kaum Jesaja, de Profeet, nom Kjennich Hiskia un säd to am: Waut ha dise Mana jesajcht? Un wuahäa sent dee no die jekomen? Un Hiskia säd: Ut eenem wieden Launt sent see no mie jekomen, von Babel. 4Un hee säd: Waut ha see en dienem Hus jeseenen? Un Hiskia säd: See ha aules jeseenen, waut en mienem Hus es; daut jeft nuscht en miene Schauzkoma, daut ekj an nich jewast ha. 5Doa säd Jesaja too Hiskia: Hea daut Wuat Gottes de Häaschoa! 6Kjikj, daut komen Doag, doa aules, waut en dienem Hus es un waut diene Vodasch jesaumelt ha bat opp disem Dach, no Babel wajchjebrocht woaren woat; daut woat nuscht äwabliewen, sajcht de Har. 7Un von diene Säns, dee ut die väakomen woaren, dee du jebären woascht, woat maun nämen, un see woaren Hoffbeaumte em Paulaust vom Kjennich en Babel sennen. 8Un Hiskia säd to Jesaja: Daut Wuat Gottes es goot, daut du jerät hast; un hee säd: Jo, daut woat Fräd un Bestaund en miene Doag sennen.
Currently Selected:
Jesaja 39: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
