Jesaja 38
38
De Krankheit von Hiskia un sien jesunt woaren – Säajen derch de Krankheit
1Aun jane Doag wort Hiskia krank toom Stoawen. Un Jesaja, de Sän Amoz, de Profeet, kaum no am un säd to am: Soo sajcht de Har: Bestal dien Hus, dan du woascht stoawen un nich jesunt woaren. 2Doa dreid Hiskia sien Aunjesecht no de Waunt un bäd toom Harn un säd: 3Ach, Har! Jedenkj doch, daut ekj ver dienem Aunjesecht jewaundelt ha en Woarheit un met onjedeeldem Hoat, un daut ekj jedonen ha, waut goot es en diene Uagen! Un Hiskia hield sea.
4Doa wia daut Wuat Gottes too Jesaja aulsoo: 5Go han un saj too Hiskia: Soo sajcht de Har, de Gott von dienem Voda David: Ekj ha dien Jebäd jehieet, ekj ha diene Tronen jeseenen; kjikj, ekj well too diene Doag 15 Joa doatolajen. 6Un von däm Kjennich von Assur siene Haunt well ekj die un dise Staut raden; un ekj well dise Staut bewoaren. 7Un daut woat die daut Tieekjen sennen vom Harn, daut de Har dit Wuat doonen woat, daut hee jerät haft: 8Kjikj, ekj lot däm Schauten, dee aun däm Sonnenwiesa Ahas derch de Sonn raufjegonen es, om 10 Stoopen trigj gonen. Un de Sonn jinkj 10 Stoopen aum Sonnenwiesa trigj, dee see raufjegonen wia.
9Hiskias Schreft, däm Kjennich von Juda, aus hee krank wia un von siene Krankheit jesunt wort.
10Ekj säd: En de Ru miene Doag saul ekj hangonen no de Puaten vom Scheol, sie bestroft om miene Äwaje Joaren. 11Ekj säd: Ekj woa däm Harn nich seenen, däm Harn em Launt de Läwendje; ekj woa Menschen nich mea seenen bie de Bewona vom Doodenrikj (griechisch: Hades). 12Miene Wonunk es aufjebroaken un wia von mie wajchjefieet aus eene Hoadsbood. Ekj ha, aus biem wäwen, mien Läwen opjerolt: Vom wäwa Klue schneet hee mie loos. Vom Dach bat de Nacht woascht du een Enj met mie moaken!
13Ekj muak miene Seel bat Zemorjes stell - aus de Leiw, aulsoo vebruak hee aule miene Knoakes. Vom Dach bat de Nacht woascht du een Enj met mie moaken!
14Aus een Schwaulm, aus een Kraunkje, soo kloagd ekj; ekj drommeld aus ne Duw. Met Schmach kjikjten miene Uagen ne Hecht: Oo Har, mie es bang! Stie fa mie aus Birj en!
15Waut saul ekj sajen? Daut hee mie daut toojesajcht un daut uk utjefieet haft. Ekj well väasechtich waundlen aule mien Joaren wäajen de Trua von miene Seel.
16Oo Har! Doaderch läft maun, un doarenn besteit daut Läwen von mienem Jeist. Un du moakst mie jesunt un helst mie aum Läwen. 17Kjikj, toom Heil wort mie bettret Lieden: Du, du trockst leeftolich miene Seel ut de venichtende Kul; dan aule miene Sinden hast du hinja dienen Rigjen jeschmäten.
18Dan de Scheol loft die nich, de Doot riemt die nich; dee en de Kul raufjefoaren sent, luaren nich opp diene Woarheit. 19De Läwendja, de Läwendja, dee loft die, aus ekj vondoag: De Voda lat de Kjinja diene Woarheit to weeten. 20De Har wia reed, mie to raden; un wie wellen mien Seidenspell, aule Doag en onsem Läwen, em Hus Gottes spälen.
21Un Jesaja säd, daut maun eene Fiejekuak aus Plosta nemt un am opp daut Schwäa lajen saul, doamet hee jesunt woat. 22Un Hiskia säd: Woont es daut Tieekjen, daut ekj em Hus Gottes nopp gonen woa?
Currently Selected:
Jesaja 38: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
