2. Mose 37
37
Daut Jereetschoft fa daut Heilichtum
1Un Bezalel muak de Lod von Akozjeholt; twee un eene haulwe Elle lank, un eene un eene haulwe Elle Breet, un eene un eene haulwe Elle huach. 2Un hee äwatrock ar met reinem Golt von bennen un von buten, un muak eene goldne Leest runtom. 3Un hee goot vea goldne Rinj aun äare vea Akjen, twee Rinj aun eene Sied un twee Rinj aune aundre Sied. 4Un hee muak Stangen von Akozjeholt un äwatrock dee met Golt. 5Un hee deed de Stangen enne Rinj aune Sieden de Lod, om de Lod too droagen. 6Un hee muak een Dakjsel von reinem Golt; twee un eene haulwe Elle lank, un eene un eene haulwe Elle breet. 7Un hee muak twee Cherubim von Golt; en konstvollen Oabeit muak hee an, aun beid Enj vom Dakjsel; 8eenen Cherub aum Enj de eene Sied un eenen Cherub aun däm Enj de aundre Sied; ut eenem Stekj vom Dakjsel muak hee de Cherubim, aun siene beid Enja. 9Un de Cherubim breeden äare Flichten no bowen ut, met äare Flichten bedakjten see daut Dakjsel, un äare Jesechta wieren jäajen eenaunda; de Jesechta de Cherubim wieren jäajen daut Dakjsel jerecht.
10Un hee muak däm Desch von Akozjeholt; twee Ellen lank un eene Elle breet, un eene un eene haulwe Elle huach. 11Un hee äwatrock am met reinem Golt un muak am runtom eene Leest von Golt. 12Un hee muak am eenen Raunt, eene Hauntbreet, runtom un muak runtom eene Leest von Golt aun sienem Raunt. 13Un hee goot doatoo 4 Rinj von Golt un deed de Rinj aun de vea Akjen, dee aun siene vea Feet wieren. 14Dicht aum Raunt wieren de Rinj, daut maun de Stangen doa nenn deit, om däm Desch too droagen. 15Un hee muak de Stangen von Akozjeholt un äwatrock dee met Golt, om däm Desch too droagen. 16Un hee muak daut Jereetschoft, dee oppem Desch stonen sullen; siene Kommen un siene Schiewen un siene Kaunen un siene Kuffels, met dee daut Drinkjopfa utjegoten woat, von reinem Golt. 17Un hee muak een Laumpenhoola von reinem Golt; en Hauntoabeit muak hee de Laump, sienen Foot un sien Jestal; siene Kjelche* (Kuffels*), siene Knoppes un siene Bloomen wieren ut eenem Stekj met am. 18Un 6 Oarms jinjen von siene Sieden rut; 3 Oarms vom Laumpenhoola ut siene eene Sied un 3 Oarms vom Laumpenhoola ut siene aundre Sied. 193 Kjelche*, aus Mandelbloomen, aun däm eenen Oarm; Knoppes un Bloomen; un 3 Kjelche*, aus Mandelbloomen, aun däm aundren Oarm; Knoppes un Bloomen; soo fa de 6 Oarms, dee vom Laumpenhoola utjinjen. 20Un aun däm Laumpenhoola 4 Kjelche*, aus Mandelbloomen; siene Knoppes un siene Bloomen; 21un zwoa een Knoppen unja 2 Oarms, ut am, un wada een Knoppen unja 2 Oarms, ut am, un wada een Knoppen unja 2 Oarms, ut am, fa de 6 Oarms, dee von am utgonen. 22Äare Knoppes un äare Oarms wieren ut eenem Stekj met am; de gaunze Laump eene Hauntoabeit, von reinem Golt. 23Un hee muak 7 Laumpen un siene Dachtscheea un siene Laschknoppes von reinem Golt. 24Ut eenem Talent reinem Golt muak hee am un aul sien Jereetschoft.
25Un hee muak däm Ruakaultoa von Akozjeholt; eene Elle siene Lenj, un eene Elle siene Breed, veakauntich, un twee Ellen huach; ut eenem Stekj met am wieren siene Hieena. 26Un hee äwatrock am met reinem Golt, sien Dakjsel un siene Wenj runtom un siene Hieena; un hee muak am eene Leest runtom von Golt. 27Un hee muak twee goldne Rinj, unja siene Leest, aun siene beid Sieden, aun siene beid Wenj, daut maun de Stangen doa nenn deit, om am doamet too droagen. 28Un hee muak de Stangen von Akozjeholt un äwatrock dee met Golt. 29Un hee muak daut heilje Saulweelj un daut reine, gootrikjende Rieekjastoff (Weiruak, seeta Ruak), een Woakj vom Saulwmischa.
Currently Selected:
2. Mose 37: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
