2. Mose 36
36
Heilichtum: Friewelje Opfa vom Volkj
1Un Bezalel un Oholiab un aule Mana, dee een weiset Hoat hauden, en dän de Har Weisheit un Vestaunt jelajcht haud, doamet see aulet Woakj toom Deenst em Heilichtum too moaken wisten, deeden no aulem, waut de Har befoolen haud.
2Un Moses roopt Bezalel un Oholiab un jane Mana, dee een weiset Hoat hauden, en dee äare Hoaten Gott Weisheit jelajcht haud, jiedrem, däm sien Hoat bewäajd, aum Woakj too gonen, om daut to moaken. 3Un see neemen von Moses daut gaunze Häwopfa, daut de Kjinja Israel jebrocht hauden toom Woakj em Deenst aum Heilichtum, om daut to moaken; un dise brochten am noch Morjen fa Morjen friewelje Gowen. 4Un daut kaumen aule weis Mana, dee aum Woakj em Heilichtum oabeiden, een jiedra von sienem Woakj, daut see muaken, 5un räden too Moses un säden: Daut Volkj brinjt väl, mea aus jenuach fa daut Oabeitswoakj, daut de Har too moaken befoolen haft. 6Doa befool Moses, un maun leet eenen Roop derch daut Loaga gonen – aulsoo: Noch Maun noch Fru saul wiedahan eene Oabeit moaken fa daut Häwopfa vom Heilichtum! Un soo hieed daut Volkj opp to brinjen. 7Un daut Oabeitsmateriol wia jenuach fa daut gaunze Woakj, om daut to moaken; un daut bleef noch äwa.
Heilichtum: daut Heilichtum woat jebut
8Un aule, dee een weiset Hoat hauden unja de Oabeida aum Woakj, muaken de Wonunk ut 10 Teppiche; von 10 jewäwden witte Boomwoll un blauen un rooden Purpur un Karmesin, met Cherubim en konst jewäwden Oabeit. 9De Lenj von eenem Teppich wia 28 Ellen, un vea Ellen de Breed von eenem Teppich; eene Mot fa aule Teppiche. 10Un hee muak fief Teppiche toop, eenen aum aundren, un hee muak wada fief Teppiche toop, eenen aum aundren. 11Un hee muak Eese von blauen Purpur aun de Soom von eenem Teppich aum Enj, doa woa see toopkaumen; krakjt soo muak hee daut aum Soom de latste Teppiche woa dee toopkomen. 1250 Eese muak hee aun däm eenen Teppich, un 50 Eese muak hee aum Enj vom Teppich, woa dee toopjemoakt wieren, de Eese wieren eene de aundre jäajenäwa. 13Un hee muak 50 Klaumasch von Golt un muak de Teppiche toop, eenen aun däm aundren, met de Klaumasch, soo daut de Wonunk een Gaunzet wort.
14Un hee muak Teppiche von Kosenhoa fa daut Zelt äwa de Wonunk; 11 Teppiche muak hee. 15De Lenj von eenem Teppich wia 30 Ellen, un vea Ellen de Breed von eenem Teppich: Een Mot fa de 11 Teppiche. 16Un hee muak fief Teppiche oppoat toop un sas Teppiche oppoat. 17Un hee muak 50 Eese aun däm Soom aum Enj von eenem jiedren Teppich doa woa dee toopkaumen, un 50 Eese muak hee aun de Soom de aundre Teppiche, woa de aundre toopkaumen. 18Un hee muak 50 Klaumasch von Koppa, om daut Zelt tooptomoaken, soo daut et een Gaunzet wort.
19Un hee muak fa daut Zelt eene Dakj von root jeforwne Bockfals un eene Dakj von Dacksfals doa äwa.
20Un hee muak de Bräda fa de Wonunk von Akozjeholt, toom stonen: 2110 Ellen de Lenj von eenem Brat, un eene un eene haulwe Elle de Breed von eenem Brat; 22twee Taupes aun eenem Brat, eena däm aundren jäajenäwa stonent: Aulsoo muak hee aule Bräda fa de Wonunk. 23Un hee muak de Bräda fa de Wonunk: 20 Bräda aune Meddachsied, siedlich; 24un hee muak 40 Feet von Selwa unja de 20 Bräda; twee Feet unja eenem Brat fa siene twee Taupes, un wada twee Feet unja een Brat fa siene twee Taupes; 25un aun de aundre Sied de Wonunk, aune Nuadsied, muak hee 20 Bräda, 26un äare 40 Feet von Selwa; twee Feet unja een Brat, un wada twee Feet unja een Brat; 27un aune hinjaschte Sied de Wonunk jäajen waste muak hee sas Bräda; 28un twee Bräda muak hee fa de Akjen de Wonunk aune hinjaschte Sied; 29un dee wieren dobbelt von unjen nohecht un wieren aun äarem bowaschten Deel met eenem Rinkj toopjemoakt; soo muak hee daut met de beid aun de beid Akjen. 30Un daut wieren acht Bräda, un äare Feet von Selwa; 16 Feet, too twee Feet unja eenem Brat.
31Un hee muak Rijel von Akozjeholt; fief fa de Bräda aun eene Sied de Wonunk, 32un fief Rijel fa de Bräda de aundre Sied de Wonunk, un fief Rijel fa de Bräda de Wonunk aune hinjaschte Sied jäajen Wasten; 33un hee muak däm meddelsten Rijel enne Medd de Bräda von eenem Enj bat toom aundren derchgonent. 34Un hee äwatrock de Bräda met Golt; un äare Rinj, fa de Rijel, muak hee von Golt, un äwatrock de Rijel met Golt.
35Un hee muak däm Väahank von blauen un rooden Purpur un Karmesin un fien jewäwden Boomwoll; un muak Cherubim doaraun, en konst Oabeit. 36Un hee muak doatoo vea Stendasch von Akozjeholt un äwatrock dee met Golt, äare Hoakes von Golt, un hee goot doatoo vea Feet von Selwa.
37Un hee muak fa däm Engank em Zelt eenen Väahank von blauen un rooden Purpur un Karmesin un fien jewäwden Boomwoll, en bunt jemoakte Oabeit; 38un siene fief Stendasch un äare Hoakes; un hee äwatrock äare Kjap un äare dedwäa Stangen met Golt; un äare fief Feet wieren von Koppa.
Currently Selected:
2. Mose 36: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
