2. Mose 35
35
Sabatjeboot
1Un Moses vesaumeld de gaunze Jemeent de Kjinja Israel un säd to an: Dit sent de Wieed, dee de Har befoolen haft, dee to doonen: 2Sas Doag saul jeoabeit woaren, oba de säwenda Dach saul junt een heilja Dach sennen, eene Sabat Ru däm Harn; wäa emma aun däm eene Oabeit deit, saul omjebrocht woaren. 3Jie sellen aum Sabat Dach kjeen Fia aunstekjen en aul june Woninj.
Heiligtum: Friewelje Gowen
4Un Moses säd to de gaunze Jemeent de Kjinja Israel un säd: Dit es daut Wuat, daut de Har befoolen haft, endäm hee säd: 5Nämt von junt een Häwopfa fa däm Harn; jiedra, dee een welljet Hoat haft, saul daut brinjen, daut Häwopfa det Harn: Golt un Selwa un Koppa, 6un blauen un rooden Purpur un Karmesin un fiene witte Boomwoll un Kosenhoa, 7un root jeforwne Bockfals un Dacksfals un Akozjeholt, 8un Eelj toom Licht un Jewerzen toom Saulweelj un toom gootrikjendem Rieekjastoff (Weiruak, seeta Ruak), 9un Onukssteena un Steena toom Ennsaten fa daut Efod un fa daut Brostschilt. 10Un aula, dee unja junt weis Hoates sent, sellen komen un aules moaken, waut de Har befoolen haft: 11De Wonunk, äa Zelt un äare Dakj, äare Klaumasch un äare Bräda, äare Rijel, äare Stendasch un äare Feet; 12de Lod un äare Stangen, daut Dakjsel un däm Väahank; 13däm Desch un siene Stangen un aul sien Jereetschoft un daut Aunsechtsbroot; 14un de Laump met Laumpenhoola toom bedache un sien Jereetschoft un siene Laumpen un daut Laumpen Eelj; 15un däm Ruakaultoa un siene Stangen un daut Saulweelj un daut gootrikjende Rieekjastoff (Weiruak, seeta Ruak); un däm Väahank fa däm Engank de Wonunk; 16däm Brauntopfaaultoa un met sienem koppanen Rost, siene Stangen un aul sien Jereetschoft; de Komm un äa Jestal; 17de Väahenj vom Väahoff, siene Stendasch un siene Feet, un däm Väahank vom Väahoffdooa; 18de Näajel de Wonunk un de Näajel vom Väahoff un äare Strenj; 19de Deenstkjleeda toom Deenst em Heilichtum, de heilje Kjleeda fa Aaron, däm Priesta, un siene Säns äare Kjleeda, om däm Deenst uttoeewen.
20Un de gaunze Jemeent de Kjinja Israel jinjen von Moses wajch. 21Un see kaumen, een jiedra, däm sien Hoat wellich wia; un een jiedra, dee weljen Jeistes wia, brocht daut Häwopfa däm Harn fa daut Woakj em Zelt de Bejäajnunk un fa aul siene Oabeit un fa de heilje Kjleeda. 22Un de Mana kaumen met de Frues; een jiedra, dee weljen Hoaten wia, brocht Näsrinj un Uarinj un Finjarinj un Oarmrinj, aulalei goldnet Jereetschoft; un jiedra, dee däm Harn een Wäwopfa aun Golt brocht. 23Un een jiedra, bie däm sikj blaua un rooda Purpur un Karmesin un fiene witte Boomwoll un Kosenhoa un root jeforwne Bockfals un Dacksfals, brochten daut. 24Jiedra, dee een Häwopfa aun Selwa un Koppa haud, brocht daut Häwopfa däm Harn; un jiedra, bie däm sikj Akozjeholt befinjt too aulahaunt Woakj de Oabeit, brocht daut. 25Un aule Frues, dee weis Hoates wieren, sponne met äare Henj un brochten daut Jesponne: Däm blauen un däm rooden Purpur, däm Karmesin un de fiene witte Boomwoll. 26Un aule veständje Frues, dän äa Hoat dreef, sponne de Kosenhoa. 27Un de Ferschten brochten Onukssteena un Steena toom Ennsaten fa daut Efod un fa daut Brostschilt, 28un daut Jewerz un daut Eelj toom Licht un toom Saulweelj un toom gootrikjendet Rieekjastoff (Weiruak, seeta Ruak). 29De Kjinja Israel, aule Mana un Frues, dee weljen Hoates wieren, om to aul däm Woakj mettohalpen, daut de Har derch Moses befoolen haud, brochten eene friewelje Gow – däm Harn.
Heilichtum: Enleidunk de Woakjmeista Bezalel un Oholiab
30Un Moses räd to de Kjinja Israel: Kjikjt, de Har haft Bezalel, däm Sän Uri, vom Sän Hur, vom Staum Juda, met Nomen jeroopt, 31un haft am met däm Jeist Gottes erfelt, en Weisheit, en Vestaunt un en Konst un en aulahaunt Oabeit; 32un zwoa em konstlichen denkjen, to oabeiden en Golt un en Selwa un en Koppa, 33un em schnieden von Steena toom Ennsaten un en Holtoabeit, om en jiedrem Konstwoakj to oabeiden; 34un toom belieren haft hee am en sien Hoat jelajcht, am un Oholiab, däm Sän Achisamak, vom Staum Dan. 35Hee haft an met Weisheit em Hoaten erfelt, om jiedret Woakj de Konst un de Konstwäwa un Buntwäwe en Zeich too moaken, en blauen un rooden Purpur un Karmesin un von fiene witte Boomwoll, un daut wäwen; dee, dee aulahaunt Woakj moakt un Konstlichet utdenkjt.
Currently Selected:
2. Mose 35: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
