2. Mose 27
27
Heilichtum: de Brauntopfa-Aultoa
1Un du saust däm Aultoa von Akozjeholt moaken: fief Ellen de Lenj, un fief Ellen de Breed - 4 Akjich saul de Aultoa sennen - un 3 Ellen huach. 2Un moak siene Hieena aun siene vea Akjen; ut eenem Stekj sellen siene Hieena sennen; un äwatrakj am met Koppa. 3Un moak siene Tap, om am vonne Fat-Ausch too reinjen, un siene Scheflen un siene Sprenjschiewe un siene Gauflen un siene Kolpaunen; fa (un) aul sien Jereetschoft saust du von Koppa moaken. 4Un moak am een Fiarost aus een Nat von Koppa, un moak aun daut Nat 4 koppane Rinj aun siene vea Akjen; 5un sat daut unja de Spunj Rinj vom Aultoa, von unjen, daut et Nat bat to Halft vom Aultoa rieekjt. 6Un moak Stangen fa däm Aultoa, Stangen von Akozjeholt, un äwatrakj dee met Koppa. 7Un siene Stangen sellen en de Rinj jestoaken woaren, daut de Stangen aun beid Sieden vom Aultoa sent, wan maun am drajcht. 8Holl, von Bräda saust du am moaken; soo aus die daut oppem Boajch jewäsen wort, soo saul maun am moaken.
Heilichtum: Väahoff
9Un du saust de Wonunk eenen Väahoff moaken: Aun de Meddachsied, siedlich, Väahenjen fa däm Väahoff von fien jewäwden witte Boomwoll, 100 Ellen de Lenj aun de eene Sied; 10un siene 20 Stendasch un äare 20 Feet von Koppa, de Stendahoakes un äare dedwäa Stangen von Selwa. 11Un krakjt soo aune Nuadsied en de Lenj: Väahenjen, 100 Ellen lank; un siene 20 Stendasch un äare 20 Feet von Koppa, de Stendahoakes un äare dedwäa Stangen von Selwa. 12Un de Breed vom Väahoff aune Wastsied: 50 Ellen Väahenjen, äare 10 Stendasch un äare 10 Feet. 13Un de Breed von Väahoff aune Oostsied, jäajen Sonnenoppgank, 50 Ellen: 1415 Ellen Väahenjen opp eene Sied, äare dree Stendasch un äare dree Feet; 15un aun de aundre Sied 15 Ellen Väahenjen, äare dree Stendasch un äare dree Feet; 16un fa daut Dooa von Väahoff eenen Väahank von 20 Ellen von blauen un rooden Purpur un Karmesin un fien jewäwden witte Boomwoll, en bunt jewäwden Oabeit, äare vea Stendasch un äare vea Feet. 17Aule Stendasch vom Väahoff runtom sellen met dedwäa Stangen von Selwa un äare Hoakes von Selwa un äare Feet von Koppa sennen. 18De Lenj vom Väahoff 100 Ellen, un de Breed 50 jäajen 50, un de Hecht fief Ellen, von fien jewäwden witte Boomwoll; un äare Feet von Koppa. 19Aulet Jereetschoft de Wonunk too aulem Deenst un aul äare Näajel vom Väahoff sellen von Koppa sennen.
Heilichtum: Eelj fa de Laumpen
20Un du, du saust de Kjinja Israel befälen, daut see die reinet, jestaumptet Eeljboom Eelj brinjen toom Laumpenlicht, om de Laumpen bestendich auntostekjen. 21Em Zelt de Bejäajnunk, butrem Väahoff, dee ver däm Zeichnis es, sellen Aaron un siene Säns an reedmoaken vom Owent bat Zemorjes, ver däm Harn. Eene eewje Sazunk bie äare Jeschlajchta vonne Kjinja Israel.
Currently Selected:
2. Mose 27: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
