2. Mose 28

Heilichtum: Aaron un siene Säns – äare Kjleeda

1Un du, du saust dienen Brooda un siene Säns met am noda komen loten, ut de Medd de Kjinja Israel, om mie däm Priestadeenst uttoeewen: Aaron, Nadab un Abihu, Eleasar un Ithamar, Aaron siene Säns. 2Un du saust heilje Kjleeda fa dienem Brooda Aaron moaken too Harlichkjeit (Iea) un toom Schmuck. 3Un du saust too aulen räden, dee weisen Hoates sent, dee ekj met däm Jeist de Weisheit erfelt ha, daut see fa Aaron Kjleeda moaken, am to heilje, om mie däm Priestadeenst uttoeewen. 4Un dit sent de Kjleeda, dee see moaken sellen: Een Brostschilt un Efod un een Bowakjleet, un een Liefrock met flajcht Mosta jewäft, eenen Koppbaunt un een Jirtel; un see sellen heilje Kjleeda moaken fa dienen Brooda Aaron un fa siene Säns, daut see mie aus Priesta deenen.

5Un see sellen daut Golt un däm blauen un däm rooden Purpur un däm Karmesin un de witte Boomwoll nämen, 6un sellen daut Efod moaken von Golt, blauen un rooden Purpur, Karmesin en fien jewäwden witte Boomwoll, un konst jewäwden Oabeit. 7Daut saul 2 toop vebungne Schullastekja haben aun siene beid Enja, un soo woaren see vebungen. 8Un de jewäwda Jirtel, doamet daut aunjebungen woat, dee doaräwa es, saul von dee selje Oabeit met am sennen, von däm seljen Zeich, von Golt, blauen un rooden Purpur un Karmesin un fien jewäwden witte Boomwoll. 9Un du saust twee Onukssteena nämen un de Nomes de Säns Israels doabowen enngraviere: 10Äare sas Nomes opp däm eenen Steen un de 6 aundre Nomes opp däm aundren Steen, no äare Jeburtsräj. 11En steenschnied Oabeit saul daut sennen, von Säajel graviera; de Nomes de Säns Israel saust du opp beid Steena graviere un dee met Golt enfoten loten. 12Un sat de beid Steena oppe Schullastekja vom Efod, aus Steen toom Jedajchnis fa de Kjinja Israel; un Aaron saul äare Nomes opp siene beid Schulren ver däm Harn toom Jedajchnis droagen. 13Un moak Spunj von Golt; 14un twee Kjäden von reinem Golt: Aus een Schnua saust du an moaken, jeflochte, un de jeflochtne Kjäden aun de Spunj faustmoaken.

15Un moak daut Jerechtsbrostschilt en konst jewäwden Oabeit; soo aus de Efod Oabeit saust du dee moaken: Von Golt, blauen un rooden Purpur un Karmesin un fien jewäwden witte Boomwoll saust du daut moaken. 16Veakauntich saul daut sennen, dobbelt, eene Spaun siene Lenj un eene Spaun siene Breed. 17Un besat daut met ennjesade Steena, vea Räje von Steena; eene Rieej: Sardis, Topas un Smaracht, de ieeschte Rieej; 18un de tweede Rieej: Karfunkel, Safier un Diamaunt; 19un de dredde Rieej: Opal, Achat un Amethust; 20un de 4-de Rieej: Chriesolit un Onniks un Jaspies; met Golt sellen see enjefot sennen en äare Spunj. 21Un de Steena sellen no de Nomes de Säns Israels 12 sennen, no äare Nomes; en Säajel graviea Oabeit sellen see sennen, een jiedra no sienem Nomen, fa de 12 Stam. 22Un moak aun däm Brostschilt aus Schnua jeflochtne Kjäden, von reinem Golt. 23Un moak aun däm Brostschilt twee Rinj von Golt, un moak de twee Rinj aun de beid Enja vom Brostschilt faust. 24Un moak de twee jeflochtne Schnua von Golt aun de beid Rinj aun de Enja vom Brostschilt faust; 25un de beid aundre Enja de twee jeflochtne Schnua saust du aun de beid Spunj faustmoaken un dee aun de Schullastekja vom Efod faustmoaken, aun siene väaschte Sied. 26Un moak twee Rinj von Golt un moak dee aun de beid Enja vom Brostschilt faust, aun siene Soom, dee von bennen em Efod es. 27Un moak twee Rinj von Golt un moak dee aun de beid Schullastekj vom Efod faust, unjen aun siene väaschte Sied, krakjt doa wua hee toop kjemt, äwa däm Jirtel vom Efod. 28Un maun saul daut Brostschilt met siene Rinj aun de Rinj vom Efod binjen met eene Schnua von blauen Purpur, daut es, äwa däm Jirtel von Efod un daut Brostschilt sikj nich von däm Efod veschuwe saul. 29Un Aaron saul de Nomes de Säns Israel aun däm Jerechtsbrostschilt opp sienem Hoat droagen, wan hee en daut Heilichtum nennjeit, bestendich toom Jedajchnis ver Gott. 30Un laj en däm Jerechtsbrostschilt de Urim un de Thummim [Lichta un Vollkomenheit], daut see opp Aaron sienem Hoaten sent, wan hee ver Gott nennjeit; un Aaron saul bestendich daut Jerecht de Kjinja Israel opp sienem Hoaten ver Gott droagen.

31Un moak daut Bowakjleet vom Efod gaunz von blauen Purpur. 32Un bowen enne Medd saul een Loch sennen; un een Soom saul runtom däm Kopploch sennen, en Wäwoabeit; aus een Loch en eenem Brostschilt saul doa sennen, daut et nich ennrit. 33Un aun sienem Soom moak Grenautapel von blauen un rooden Purpur un Karmesin, aun sienem Soom runtom, un Kjlinja von Golt tweschen an runtom: 34Een Kjlinja von Golt un een Granataupel, een Kjlinja von Golt un een Granataupel aun däm Soom runtom aum Bowakjleet. 35Un Aaron saul daut aunhabe, om dän Deenst too verechten, daut sien Klank jehieet woat, wan hee en daut Heilichtum ver Gott nennjeit, un wan hee rutjeit, daut hee nich stoaft.

36Un moak een Stearnblajch von reinem Golt un graviea doabowen met Säajelschreft: Heilichkjeit däm Harn! 37Un doo daut aun eene Schnua von blauen Purpur; un daut saul aun däm Koppbinj sennen, aune väaschte Sied von de Koppbinj saul daut sennen. 38Un daut saul aun Aaron sienem Stiern sennen, un Aaron saul de Onjerajchtichkjeiten de heilje Dinj droagen, dee de Kjinja Israel heilje woaren, bie aule Gowen äare heilje Dinj; un daut saul bestendich aun sienem Stiern sennen, toom Wooljefaulen fa an - ver Gott.

39Un moak däm Liefrock von fien jewäwden witte Boomwoll, un moak eene Koppbinj von witte Boomwoll; un eenen Jirtel saust du moaken bunt jewäwden Oabeit.

40Un Aaron siene Säns saust du Liefrakj moaken un saust an Jirtel moaken, un huage Metze saust du an moaken too Harlichkjeit (Iea) un toom Schmuck. 41Un du saust dienen Brooda Aaron doamet bekjleede un siene Säns met am; un du saust an saulwen un äare Henj fellen un an heilje, daut see mie däm Priestadeenst uteewen. 42Un moak an Beenkjleeda von Boomwoll, om daut noaktje Fleesch too bedakjen; vonne Hoften bat aune Schinkjes sellen see rieekjen. 43Un Aaron un siene Säns sellen dee droagen, wan see en daut Zelt de Bejäajnunk nengonen, ooda wan see nom Aultoa komen, om däm Deenst em Heilichtum too verechten, daut see kjeene Schult opp sikj loden un stoawen: Eene eewje Sazunk fa an un fa sienen Somen no am.

Currently Selected:

2. Mose 28: PBJHF

Highlight

Copy

Compare