2. Mose 25
25
Heilichtum: Friewelje Gowen
1Un de Har räd to Moses un säd: 2Räd to de Kjinja Israel, daut see mie een Häwopfa brinjen; von eenem jiedren, dee wellich en sienem Hoaten es, sell jie mien Häwopfa nämen. 3Un dit es daut Häwopfa, daut jie von an nämen sellen: Golt un Selwa un Koppa, 4un blaua un rooda Purpur un Karmesin un witte Boomwoll un Kosenhoa, 5un root jeforwne Bockfal un Dacksfal un Akozjeholt; 6Eelj toom Licht, Jewerzen toom saulwen un toom goot rikjendem Rieekjastoff (Weiruak, seeta Ruak); 7Onukssteena un Steena toom ensaten fa daut Efod un fa daut Brostschilt. 8Un see sellen mie een Heilichtum moaken, daut ekj en äare Medd won. 9No aulem, waut ekj die wies, daut Mosta de Wonunk un daut Mosta von aul äa Jereetschoft, aulsoo sell jie daut moaken.
Heilichtum: Bundeslod met Dakjsel
10Un see sellen eene Lod von Akozjeholt moaken: twee un eene haulwe Elle äare Lenj, un eene un eene haulwe Elle äare Breed, un eene un eene haulwe Elle äare Hecht. 11Un du saust ar äwatrakjen met reinem Golt: Von bennen un von buten saust du ar äwatrakjen; un moak doaraun eene goldne Leest runtom. 12Un jeet doatoo 4 Rinj von Golt un sat dee aun äare vea Akjen, un zwoa twee Rinj aun eene Sied un twee Rinj aune aundre Sied. 13Un moak Stangen von Akozjeholt un äwatrakj dee met Golt. 14Un brinj de Stangen enne Rinj aune Sieden de Lod, om de Lod met dee too droagen. 15De Stangen sellen enne Rinj de Lod sennen, see sellen nich doa rutjenomen woaren. 16Un laj enne Lod daut Zeichnis, daut ekj die jäwen woa. 17Un moak een Dakjsel [Veseenungsdakjsel] von reinem Golt: twee un eene haulwe Elle siene Lenj, un eene un enne haulwe Elle siene Breed. 18Un moak twee Cherubim von Golt; en Hauntoabeit saust du an moaken aun beid Enj vom Dakjsel; 19un moak eenen Cherub aun däm Enj de eene Sied un eenen Cherub aun däm Enj de aundre Sied; ut eenem Stekj vom Dakjsel sell jie de Cherubim moaken aun siene beid Enja. 20Un de Cherubim sellen de Flichten no bowen utbreeden, daut Dakjsel met äare Flichten toodakjen, un äare Aunjesechta eenaunda jäajenäwa; de Aunjesechta de Cherubim sellen opp daut Dakjsel jerecht sennen. 21Un laj daut Dakjsel bowen äwa de Lod; un en de Lod saust du daut Zeichnis lajen, daut ekj die jäwen woa. 22Un doa selfst woa ekj met die toopkomen un von däm Dakjsel rauf, tweschen de twee Cherubim väa, dee oppe Zeichnislod sent, aules die too sajen, waut ekj die aun de Kjinja Israel befälen woa.
Heilichtum: daut Aunsechtsbroot
23Un du saust eenen Desch von Akozjeholt moaken: twee Ellen siene Lenj, un eene Elle siene Breed, un eene un eene haulwe Elle siene Hecht. 24Un äwatrakj am met reinem Golt un moak runtom am eenen Kraunz von Golt. 25Un moak eene Leest, eene Hauntbreet, runtom, un moak eenen Kraunz ut Golt runtom aun siene Leest. 26Un moak aun am 4 Rinj von Golt un sat de Rinj aun de vea Akjen, dee aun siene vea Feet sent. 27Dicht unja de Leest sellen de Rinj sennen, fa de Stangen, om däm Desch too droagen. 28Un moak de Stangen von Akozjeholt un äwatrakj dee met Golt, un de Desch saul doamet jedroacht woaren. 29Un moak siene Kommen un siene Schiewen un siene Kaunen un siene Kuffels, met dee daut Drinkjopfa utjegoten woat; von reinem Golt saust du an moaken. 30Un oppem Desch saust du emma Aunsechtsbroot lajen ver mienem Aunjesecht.
Heilichtum: de Laumpenhoola
31Un du saust een Laumpenhoola von reinem Golt moaken; en Hauntoabeit saul daut Laumpenhoola jemoakt woaren, sien Foot un sien Jestal; siene Kjelche* (Kuffels*), siene Knoppes un siene Bloomen sellen ut eenem Stekj met am sennen. 32Un 6 Oarms sellen von siene Sied utgonen: 3 Oarms vom Laumpenhoola aun siene eene Sied un 3 Oarms vom Laumpenhoola aun siene aundre Sied. 33Un 3 Kjelche* (Kuffels*), aus Mandelbloomen, aun däm eenen Oarm: Knoppes un Bloomen; un 3 Kjelche*, aus Mandelbloomen, aun däm aundren Oarm: Knoppes un Bloomen; soo fa dee 6 Oarms, dee vom Laumpenhoola utgonen. 34Un aun däm Laumpenhoola 4 Kjelche*, aus Mandelbloomen: Siene Knoppes un siene Bloomen; 35un zwoa een Knoppen unja 2 Oarms, ut am, un wada een Knoppen unja 2 Oarms, ut am, un wada een Knoppen unja 2 Oarms, ut am, fa de 6 Oarms, dee vom Laumpenhoola utgonen. 36Äare Knoppes un äare Oarms sellen ut eenem Stekj met am sennen; daut gaunze Laumpenhoola eene Hauntoabeit, von reinem Golt. 37Un du saust siene 7 Laumpen moaken; un maun saul siene Laumpen aunstekjen, soo daut see jlikj ver am dachen; 38un siene Dochtschearen un siene Laschheed von reinem Golt. 39Ut eenem Talent reinem Golt saul maun am moaken met aul disem Jereetschoft. 40Un kjikj, daut du an no äarem Mosta moakst, daut die oppem Boajch jewäsen worden es.
Currently Selected:
2. Mose 25: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
