2. Mose 24

Een Bunt aum Sinai

1Un hee säd to Moses: Stie nopp nom Harn, du un Aaron, Nadab un Abihu un 70 vonne Eltestasch Israels, un bäd vom wieden aun. 2Un Moses auleen doaf däm Harn noda komen; oba see sellen nich noda komen, un daut Volkj saul nich met am noppkomen.

3Un Moses kaum un vetald däm Volkj aule Wieed Gottes un aule Rajchte; un daut gaunze Volkj auntwuad met eene lude Stemm un säd: Aule Wieed, dee Gott jerät haft, well wie doonen. 4Un Moses schreew aule Wieed Gottes dol (opp). Un hee muak sikj tiedich Zemorjes opp un bud eenen Aultoa unjen aum Boajch un 12 Jedenkjsteena no de 12 Stam Israels. 5Un hee schekjt Jinjlinje de Kjinja Israel han, un see opfaden Brauntopfa un schlachten junge Bolles toom Dankopfa däm Harn. 6Un Moses neem de Halft vom Bloot un deed daut em Kuffel, un de Halft vom Bloot sprenjd hee aun däm Aultoa. 7Un hee neem daut Bundesbuak un laus daut ver de Uaren vom Volkj; un see säden: Aules, waut de Har jerät haft, well wie doonen un jehorchen. 8Un Moses neem daut Bloot un sprenjd daut opp daut Volkj un säd: Kjikjt, daut Bundesbloot, daut de Har met junt jemoakt haft äwa aul dise Wieed.

Priesta un de Eltestasch oppem Sinai Boajch

9Un see stieejen nopp Moses un Aaron, Nadab un Abihu, un 70 von de Eltestasch Israels; 10un see sagen däm Gott Israels; un unja siene Feet wia daut aus een Woakj von Safiersteena un aus de Himmel selfst aun Kloaheit. 11Un hee strakjt siene Haunt nich ut jäajen de Adelje de Kjinja Israel; un see sagen Gott un auten un drunken.

Moses oppem Boajch om de Jesazestoflen to emfangen

12Un de Har säd to Moses: Stie no mie nopp opp däm Boajch un bliew doa selfst; un ekj woa die de Steenane Toflen jäwen un daut Jesaz un daut Jeboot, daut ekj jeschräwen ha, om an too belieren. 13Un Moses muak sikj opp met sienem Deena Josua, un Moses stieech opp däm Boajch Gottes. 14Un hee säd to de Eltestasch: Blieft hia, bat wie no junt trigjkomen; un kjikj, Aaron un Hur sent bie junt: Wäa eene Rajchtssach haft, dee kom ver an. 15Un Moses stieech oppem Boajch, un de Wolkj bedakjt däm Boajch. 16Un de Harlichkjeit Gottes rud opp däm Boajch Sinai, un de Wolkj bedakjt am sas Doag; un aum säwenden Dach roopt hee Moses utte Medd de Wolkj. 17Un daut Aunseenen Gottes wia aus een brennendet Fia opp de Spetz vom Boajch ver de Uagen de Kjinja Israel. 18Un Moses jinkj medden enne Wolkj nenn un stieech opp däm Boajch; un Moses wia opp däm Boajch 40 Doag un 40 Nachten.

Currently Selected:

2. Mose 24: PBJHF

Highlight

Copy

Compare