2. Mose 23

Oppfodrunk sikj rajcht to vehoolen un dän Näakjsten Leew wiesen

1Du saust kjeen faulschet Jeräd wieda droagen; du saust diene Haunt nich däm Gottloosen rieekjen, om een onjerajchta Zeij to sennen. 2Du saust de Menj nich nogonen om Iebel to doonen; un du saust bie eenem Rajchtstriet nich auntwuaden, endäm du die no dee Väle rejchst, om daut Rajcht too bieejen. 3Un du saust däm Oamen en sienem Rajchtstriet nich vescheenren.

4Wan du däm Oss ooda Äsel von dienem Fiend omhäa erren auntrafst, saust du an däm seljen trigjbrinjen. 5Wan du däm Äsel von dienem Haussa unja Laust ligjen sitst, soo heed die, am doa ligjen to loten; du saust am aulemol opphalpen.

6Du saust daut Rajcht von dienem Oamen en sienem Rajchtstriet nich bieejen. 7Vom auffaulens Wuat saust du die aufhoolen; un däm Onschuldjen un Jerajchten saust du nich ombrinjen, dan ekj woa däm Gottloosen nich rajchtfoadjen. 8Un du saust kjeen Jeschenkj nämen; dan daut Jeschenkj moakt dee Seenende blint un vedreit däm Jerajchten siene Wieed. 9Un däm Framden saust du nich bedrekjen; jo, jie selfst weeten, woo daut däm Framden too Moot es, dan jie sent em Ägiptenlaunt Framde jewast.

Bestemmungen fa daut Sabatjoa un Opfa aun de Joaresfasten

10Un sas Joa saust du dien Launt beseien un siene Arnt ensaumlen; 11oba aum säwenden saust du daut ruen loten, daut de Oame ut dienem Volkj doavon äten; un waut dee äwaloten, sellen de Tieren von Flekj fräten. Krakjt soo saust du met dienem Wienboajch doonen un met dienem Eeljboom.

12Sas Doag saust du diene Oabeit doonen; oba aum säwenden Dach saust du ruen, doamet dien Oss un dien Äsel ruen un de Sän von diene Deenstmejal un de Framda sikj erholen. 13Un opp aules, waut ekj junt jesajcht ha, sell jie acht haben; un de Nomes von aundre Jetta sell jie nich erwänen, hee saul en dienem Mul nich jehieet woaren.

14Dree Mol em Joa saust du mie een Fast fieren. 15Daut Fast de onjesuade Brood saust du beachten: säwen Doag saust du Onjesuadet äten, soo aus ekj die befoolen ha, to bestemde Tiet em Moonat Abib, dan aun däm seljen best du ut Ägipten rutjegonen; un maun saul nich ladich ver mienem Aunjesecht komen; 16un daut Arntefast, daut ieeschte von diene Oabeit, von däm, waut du oppem Flekj seien woascht; un daut Fast de Ensaumlunk [Arntedankfast] aum Joaresenj, wan du diene Oabeit vom Flekj enjesaumelt hast. 17Dree Mol em Joa sellen aul diene Menliche ver däm Aunjesecht von Harn, Gottes erschienen loten.

18Du saust nich daut Bloot von mienem Schlachtopfa toom Jesuaden opfren; un daut Fat von mienem Fast saul nich äwanacht bat Zemorjes bliewen. 19Daut ieeschte von dienem Launt saust du en daut Hus det Harn, von dienem Gott, brinjen. - Du saust een Bockje nich koaken enne Malkj von siene Mutta.

Daut Jeboot de Kanaanita uttoroden – Vespräakjungen fa Jehuarsom

20Kjikj, ekj schekj eenen Enjel ver die häa, om die oppem Wajch too bewoaren un die aun däm Uat to brinjen, däm ekj reedjemoakt ha. 21Heed die fa am un hia opp siene Stemm un sie nich wadaspanstich jäajen am; dan hee woat june Äwaträdunk nich vezeien, dan mien Nomen es en am. 22Doch wan du opp siene Stemm hieescht un aules deist, waut ekj sajen woa, soo woa ekj diene Fiend befiende un diene Bedrenja bedrenjen. 23Dan mien Enjel woat ver die häagonen un woat die no de Amorita un de Hetita un de Perisita un de Kanaanita, de Hewita un de Jebusita brinjen; un ekj woa an vetiljen. 24Du saust die ver äare Jetta nich dol bekjen un an nich deenen, un du saust nich no äare Doten doonen; sonda du saust an gaunz un goa dolrieten un äare Biltstendasch gaunz dolbräakjen. 25Un jie sellen däm Harn, junem Gott, deenen: Soo woat hee dien Broot un dien Wota säajnen, un ekj well aule Krankheit ut äare Medd wajchdoonen. 26Kjeen too Schod komen un Onfruchtboare woat en dienem Launt sennen; de Zol von diene Doag woa ekj voll moaken. 27Mien Schrakj woa ekj ver die häaschekjen un aule Velkja vewerren, no dän du kjemst, un aul diene Fiend dreien die däm Rigjen han. 28Un ekj woa de Hornisse ver die häaschekjen, daut see ver die de Hewita, de Kanaanita un de Hetita vejoagen. 29Nich en eenem Joa woa ekj an ver die vejoagen, doamet daut Launt nich eene Wieste woat, un de Tieren oppem Flekj sikj jäajen die vemieren. 30Eenem nom aundren woa ekj an vetiljen, bat du fruchtboa best un daut Launt besetten kaust. 31Un ekj woa diene Jrensen saten vom Schelpmäa bat aun daut Mäa de Filista, un vonne Wieste bat aun däm Stroom [Efrat]; dan ekj woa de Laundesbewona en diene Haunt jäwen, daut du an ver die vedrifst. 32Du saust met an un met äare Jetta kjeenen Bunt moaken. 33See sellen nich en dienem Launt wonen, doamet see die nich jäajen mie too ne Sind veleiden; dan, wan du äare Jetta deenen woascht, dan woat die daut toom Faul brinjen.

Currently Selected:

2. Mose 23: PBJHF

Highlight

Copy

Compare