2. Mose 22
22
1Wan de Deef biem Enbräakjen jepakt woat, un hee woat jeschloagen, daut hee stoaft, soo es daut däm Schläajna kjeene Blootschult; 2wan de Sonn äwa am oppjegonen es, soo es am daut eene Blootschult. Hee saul betolen; wan hee nuscht haft, saul hee fa sien Jestolnet vekoft woaren. 3Wan daut Jestolne läwendich en siene Haunt jefungen woat, daut es een Oss ooda een Äsel ooda een Stekj Kjlienvee, saul hee daut dobbelde ersaten.
4Wan wäa een Flekj ooda eenen Wiengoaden aufweiden lat un hee sien Vee hanjajcht, un daut weid opp eenem aundren sienem Flekj, soo saul hee daut vom Basten von sienem Flekj un vom Basten von sienem Wiengoaden ersaten.
5Wan Fia utbrakjt un eene Hachelhakj errieekjt, un daut woat een Goawenhupen vebrent, ooda daut stonende Jeträajd ooda daut Flekj, soo saul hee betolen, dee däm Braunt aunjestekjt haft. 6Wan wäa sienem Näakjsten Jelt ooda Jereetschoft toom oppbewoaren jeft, un daut woat ut däm Maun sienem Hus jestolen, wan de Deew jefungen woat, soo saul hee daut Dobbelde ersaten; 7wan de Deew nich jefungen woat, soo saul de Ieejendeema vom Hus ver de Rechta gonen, auf hee nich siene Haunt nom Näakjsten sien Hab un Goot utjestrakjt haft.
8Bie jiedrem Faul von Truloosichkjeit - betrafs eenen Oss, een Äsel, een Stekj Kjlienvee, een Kjleet, betrafs aulem Veloarnem, wuavon maun sajcht: «Daut es et», sull dee beid äare Sach ver de Rechta komen; wäm de Rechta schuldich spräakjen, dee saul sienem Näakjsten daut Dobbelde ersaten.
9Wan wäa sienem Näakjsten eenen Äsel ooda eenen Oss ooda een Stekj Kjlienvee ooda irjent een Vee toom oppbewoaren jeft, un daut stoaft ooda woat beschädicht ooda wajchjefieet, un kjeena sitt daut, 10soo saul de Eit Gottes tweschen an beid sennen, auf hee nich siene Haunt nom Näakjsten sien Hab un Goot utjestrakjt haft; un sien Ieejendeema saul daut aunnämen, un jana saul nuscht ersaten. 11Un wan am daut werkjlich jestolen worden es, soo saul hee daut sienem Ieejendeema betolen. 12Wan daut oba veräten worden es, soo saul hee daut aus Zeichnis brinjen; hee saul daut Verätne nich ersaten. 13Un wan wäa von sienem Näakjsten een Stekj Vee liet, un daut woat beschädicht ooda stoaft - wia sien Ieejendeema nich doabie, soo saul hee daut jewess ersaten; 14wan sien Ieejendeema doabie wia, saul hee daut nich ersaten. Wan daut jepacht wia, soo es daut en siene Pacht enhoolen.
15Un wan wäa eene Junkfru vefieet, dee nich vesproaken es, un licht bie ar, soo saul hee ar jewess derch een Brutpries sikj to Fru nämen. 16Wan äa Voda derchut doajäajen es, ar am to jäwen, soo saul hee Jelt aufwäaje nom Brutpries de Junkfru.
Daut Vegonen un de Doodesstrof
17Eene Zaubarin saust du nich läwen loten.
18Jiedra, dee bie eenem Vee licht, saul dootjemoakt woaren.
19Wäa de Jetta opfat un nich däm Harn auleen, saul vebaunt woaren.
Oppfodrunk toom Schutz de Schwake
20Un däm Framden saust du nich bedrenjen un am nich bedrekjen, dan Framde sent jie em Ägiptenlaunt jewast. 21Jie sellen kjeene Wätfru un Weis bedrekjen. 22Wan du ar irjent woo bedrekjst, soo woa ekj, wan see to mie schricht, soo woa ekj äa Schrieen jewess erhieren; 23un mien Oaja woat entbrenne, un ekj woa junt met daut Schwieet ombrinjen, un june Frues sellen Wätfrues un june Kjinja Weise woaren.
24Wan du mienem Volkj, däm Oamen bie die, Jelt liest, soo saust du am nich aus eenen Wucha behaundlen, du saust am kjeen Zins opperlajen.
25Wan du von dienem Näakjsten daut Bowakjleet aus Paunt (waut toom birjen) nemst, soo saust du am däm seljen trigjjäwen, ea de Sonn unjajeit; 26dan daut es siene eensje Dakj, sien Kjleet fa siene Hut; woa bennen saul hee ligjen? Un daut woat passieren, wan hee no mie schricht, soo woa ekj am erhieren, dan ekj sie jnädich.
Daut waut Gott velangt
27De Rechta saust du nich lastren, un eenem Ferscht von dienem Volkj saust du nich fluchen.
28Met de Rikjlichkjeit von dienem Jeträajd un dien Bastet saust du nich trigjhoolen. Däm ieeschtjebuarnen diene Säns saust du mie jäwen.
29Krakjt soo saust du met dienem Oss doonen un met dienem Kjlienvee; säwen Doag saul daut bie siene Mutta sennen, aum achten Dach saust du daut mie jäwen.
30Un heilje Mana sell jie mie sennen, un Fleesch, daut oppem Flekj veräten jeworden es, sell jie nich äten; daut sell jie vere Hunj schmieten.
Currently Selected:
2. Mose 22: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
