2. Mose 21

Veordnunk toom Schutz von Lief un Läwen

1Un dit sent de Rajchte, dee du an väalajen saust:

2Soo du eenen hebräischen Kjnajcht kjafst, saul hee sas Joa deenen, un aum säwenden saul hee frie, emsonst, utgonen. 3Wan hee auleen jekomen es, saul hee auleen utgonen; wan hee de Maun von eene Fru wia, saul siene Fru met am utgonen. 4Wan sien Har am eene Fru jejäft un see am Säns un Dajchta jebuaren haft, soo saul de Fru un äare Kjinja äarem Harn jehieren, un hee saul auleen utgonen. 5Oba wan de Kjnajcht sajcht: Ekj leew mienen Harn, miene Fru un miene Kjinja, ekj well nich frie utgonen, 6soo saul sien Har am ver de Rechta brinjen un am aune Däa ooda aun däm Däarejerest stalen, un sien Har saul am daut Ua met eene Spetz derchspekje; un hee saul am eewich deenen.

7Un wan wäa siene Dochta too Deenstmejal vekjaft, saul see nich utgonen, aus de Kjnajchts utgonen. 8Wan see oba äarem Harn siene Uagen nich jefällt, dee hee fa sikj bestemt haud, soo lot hee ar looskjeepen: Hee saul nich Macht haben, ar aun een framdet Volkj too vekjeepen, wiels hee ontru aun ar jehaundelt haft. 9Un wan hee ar sienem Sän bestemt, soo saul hee doonen nom Rajcht de Dajchta. 10Wan hee sikj eene aundre nemt, soo saul hee Noarinj, äare Kjleeda un äa ehelichet Rajcht nich weinja woaren loten. 11Un wan hee ar dise 3 Dinj nich deit, soo saul see emsonst utgonen, onen Jelt.

12Wäa eenen Mensch schleit, daut hee stoaft, saul omjebrocht woaren; 13haft hee am oba nich nojejoagt, un Gott haft daut siene Haunt bejäajnen loten, soo woa ekj die eenen Uat bestemmen, wuahan du ranen saust. 14Un soo wäa jäajen sienen Näakjsten onbedocht haundelt, daut hee am met Hinjalest ombrinjt - von mienem Aultoa saust du am wajchnämen, daut hee stoaft. 15Un wäa sienen Voda ooda siene Mutta schleit, saul omjebrocht woaren. 16Un wäa eenen Mensch stält un am vekjaft, ooda hee woat en siene Haunt jefungen, dee saul omjebrocht woaren. 17Un wäa sienen Voda ooda siene Mutta flucht, saul omjebrocht woaren. 18Un wan Mana metenaunda zanke, un eena schleit däm aundren met eenem Steen ooda met de Fust, un hee stoaft nich, sonda woat badlidjent: 19Wan hee oppsteit un buten aun eenem Stock jeit, soo saul de Schläajna schultloos sennen; blooss sien Vesiemen betolen un am gaunz jesunt woaren loten. 20Un wäa sienem Kjnajcht ooda siene Deenstmejal met eenem Stock schleit, daut hee unja siene Haunt stoaft, soo saul hee bestroft woaren: 21Blooss wan hee eenen Dach ooda twee Doag läwen blift, saul hee nich jestroft woaren, dan hee es fa sien Jelt jekoft. 22Un wan Mana sikj strieden un steeten een schwangre Fru, daut ar de Frucht aufjeit, un daut passieet kjeen Schoden, soo saul hee eene Jeltstrof kjrieen, nodäm de Maun von siene Fru am opplajen woat, un hee saul daut derch de Rechta jäwen. 23Oba wan een Schoden entsteit, soo saust du Läwen om Läwen jäwen, 24Uag om Uag, Tän om Tän, Haunt om Haunt, Foot om Foot, 25Brauntmol om Brauntmol, Wund om Wund, Strim om Strim. 26Un wan wäa sienem Kjnajcht ooda siene Deenstmejal een Uag utschleit, soo saul hee am frie entloten fa sien Uag. 27Un wan hee de Tän von sienem Kjnajcht ooda siene Deenstmejal utschleit, soo saul hee am frie entloten fa de Tän.

28Un wan een Oss eenen Maun ooda eene Fru stat, daut see stoaft, soo saul de Oss jesteenicht, un sien Fleesch saul nich jejäten woaren; oba de Ieejendeema vom Oss saul schultloos sennen. 29Oba wan de Oss aul verhäa steetsch wia, un sien Ieejendeema es jewoarnt worden, un hee moakt eenen Maun ooda eene Fru doot, soo saul de Oss jesteenicht, un uk sien Ieejendeema saul dootjemoakt woaren. 30Wan am een Leesjelt oppjelajcht woat, soo saul hee daut Leesjelt fa sien Läwen jäwen, no aulem, waut am oppjelajcht woat. 31Stat hee eenen Sän ooda eene Dochta, soo saul am no disem Rajcht jedonen woaren. 32Wan de Oss eenen Kjnajcht ooda eene Deenstmejal stat, soo saul sien Ieejendeema äarem Harn 30 Selwaschekel jäwen, un de Oss saul jesteenicht woaren.

Veordnunk, wan eena een Ojjlekj veuasoakt, mott hee fa däm Schoden betolen

33Un wan wäa eene Kul opmoakt, ooda wan wäa eene Kul growt un dee nich toodakjt, un daut fält een Oss ooda een Äsel doa nenn, 34soo saul daut de Ieejendeema vonne Kul daut betolen: Jelt saul hee däm Ieejendeema von däm doodjen Tia tohle, un daut doodje Tia saul am jehieren. 35Un wan een Oss däm Oss von sienem Näakjsten stat, daut hee stoaft, soo sellen see däm läwendjen Oss vekjeepen un daut Jelt deelen, un uk däm doodjen sellen see deelen. 36Oba es daut bekaunt jewast, daut de Oss steetsch wia, un sien Ieejendeema haft am nich doaväa bewoat, soo saul hee däm Oss fa eenen Oss vejelten, un de doodja saul am jehieren. 37Wan wäa eenen Oss ooda een Stekj Kjlienvee stält, un schlacht daut ooda vekjaft daut, soo saul hee 5 Ossen fa däm Oss un 4 Stekj Kjlienvee fa daut Stekj wadajäwen.

Currently Selected:

2. Mose 21: PBJHF

Highlight

Copy

Compare