2. Mose 2

Moses Jeburt, Bewoarunk un Opptrakjen

1Un een Maun vom Hus Levi jinkj han un neem eene Dochta Levi. 2Un de Fru wort schwanga un jebua eenen Sän. Un see sach, daut hee scheen wia, un vestuak am 3 Moonat. 3Un aus see am nich lenja vestäakjen kunn, neem see fa am een Kaustje von Schelpgrauss un vepetjt daut met Asfalt un met Pekj un läd daut Kjint doa nenn, un läd daut en daut Schelpgrauss aum Eewa vom Stroom. 4Un siene Sesta stald sikj wiet auf, om to seenen, waut am passieren wudd. 5Un däm Farao siene Dochta jinkj rauf, om en däm Stroom too boden, un äare Junkfrues jinjen aun de Städ nom Stroom. Un see sagen daut Kaustje medden em Schelpgrauss un schekjt äare Deenstmejal han un leet daut holen. 6Un see muaken daut op un sagen daut Kjint, un kjikj, de Jung hield. Doa erboarmd see sikj äwa dautselje, un säd: Von de Kjinja de Hebräa es dit. 7Un siene Sesta säd to de Dochta vom Farao: Saul ekj hangonen un die eene brostjäwende Mutta von de Hebräarine roopen, daut see die daut Kjint drenjt. 8Un de Dochta vom Farao säd to ar: Go han. Doa jinkj de Junkfru han un roopt däm Kjint siene Mutta. 9Un de Dochta vom Farao säd to ar: Nemm dit Kjint met un drenkj daut fa mie, un ekj woa die dien Loon jäwen. Un de Fru neem daut Kjint un drenjt daut. 10Un aus daut Kjint groot wort, brocht see daut de Dochta vom Farao, un daut wort ar toom Sän; un see jeef am däm Nomen Moses un säd: Dan ut däm Wota ha ekj am jetrocken.

Moses iewat om sien Volkj – Rand wajch un befriet sikj en Midian

11Un daut passieed en jane Doag, aus Moses groot jeworden wia, doa jinkj hee ut no siene Breeda un kjikjt äare Laustoabeit too; un hee sach eenen ägiptischen Maun, dee eenen hebräischen Maun, von siene Breeda schluach. 12Un hee dreid sikj hiahan un dorthan, un aus hee sach, daut kjeen Mensch doa wia, schluach hee däm Ägipta doot un veweeld am em Saunt. 13Un hee jinkj aum tweeden Dach ut, un kjikj, twee hebräische Mana zankten sikj. Doa säd hee toom Schuldjen: Wuarom schleist du dienen Näakjsten? 14Un hee säd: Wäa haft die toom Bowaschten un Rechta äwa ons jesat? Denkjst du mie omtobrinjen, aus du däm Ägipta omjebrocht hast? Doa fercht sikj Moses un säd: Woarhauft, de Sach es ludboa jeworden! 15Un de Farao hieed dise Sach un socht Moses omtobrinjen. Un Moses rand ver däm Farao un bleef em Launt Midian. Un hee saut aun eenem Borm.

16Un de Priesta von Midian haud säwen Dajchta; un see kaumen un schapte un felden de Drenkjträaj, om de Häaden von äarem Voda too drenkjen. 17Un de Hoads kaumen un juagen an wajch. Doa stunt Moses opp un holp an un drenjt äare Häaden. 18Un see kaumen no Reghuel, äarem Voda, un hee säd: Wuarom sent jie Vondoag soo schwind jekomen? 19Un see säden: Een ägiptischa Maun haft ons ut de Haunt de Hoads jerat un haft uk soogoa fa ons jeschapt un de Häaden jedrenkjt. 20Doa säd hee to siene Dajchta: Un woa es hee? Wuarom ha jie däm Maun trigj jeloten? Roopt am, daut hee met ons at.

21Un Moses welijd en, bie däm Maun too bliewen; un hee jeef Moses Zippora, siene Dochta. 22Un see jebua eenen Sän, un hee jeef am däm Nomen Gersom, dan hee säd: Een Framda sie ekj jeworden em framden Launt.

23Un daut passieed no jane väle Doag, doa storf de Kjennich von Ägipten; un de Kjinja Israel vesefzten wäajen däm Deenst un schrieejen; un äa jeschrecht wäajen däm Deenst kaum no Gott. 24Un Gott hieed äa Weekloagen, un Gott docht aun sienen Bunt met Abraham, met Isaak un met Jakob; 25Un Gott sach de Kjinja Israel, un Gott kjemmad sikj om an.

Currently Selected:

2. Mose 2: PBJHF

Highlight

Copy

Compare