2. Mose 1
1
Vemierunk un Kjnajchtschoft de Säns Israel en Ägipten
1Un dit sent de Nomes de Säns Israel, dee no Ägipten kaumen; met Jakob kaumen see, een jiedra met sienem Hus: 2Ruben, Simeon, Levi un Juda; 3Isachar, Sebulon un Benjamin; 4Dan un Naftali, Gad un Aser. 5Un aule Seelen wieren daut, dee ut Jakob siene Lenden väajekomen wieren, 70 Seelen. Un Josef wia en Ägipten.
6Un Josef storf un aule siene Breeda un daut selje gaunze Jeschlajcht. 7Un de Kjinja Israel wieren fruchtboa un wimelde un vemieden sikj un worden sea, sea stoakj, un daut Launt wort voll von an.
8Doa stunt een nia Kjennich äwa Ägipten opp, dee Josef nich kjand. 9Un hee säd to sienem Volkj: Kjikj, daut Volkj de Kjinja Israel es groot un stoakja aus wie. 10Paust opp, lot ons kluak jäajen dee selje haundlen, daut see sikj nich vemieren un daut nich passieet, wan Kjrich utbrakjt, daut see nich no onse Fiend äwagonen un jäajen ons kjamfen un ut däm Launt nopp gonen. 11Un see saden Oabeitsoppsechta äwa an, om an met äare Laustoabeit too drekjen; un see buden däm Farao Väarotsstäda: Pithom un Raemses. 12Oba soo aus see an drekjte, aulsoo vemieeden see sikj, un soo breeden see sikj ut; un daut gruld an ver de Kjinja Israel. 13Un de Ägipta hilden de Kjinja Israel met Meshaundlunk toom Deenst aun. 14Un see muaken an daut Läwen betta derch hoaden Deenst em Leem un Täjle, un derch aulalei Deenst oppem Flekj, bie aun, von aul äarem Deenst, to däm see an hoat aunjinjen.
15Un de Kjennich von Ägipten säd to siene Hebräische Häwaume, von dän de Nomen de eene Schifra un de Nomen de aundre Pua wia, 16un säd: Wan jie dän Hebräarine bie de Jeburt halpen un jie an opp däm Jeburtsstool seenen: Wan daut een Sän es, soo brinjt am om, un wan eene Dochta, soo mucht see läwen. 17Oba de Häwaume ferchten Gott un deeden nich, aus de Kjennich von Ägipten an jesajcht haud, un hilden de Junges aum Läwen. 18Un de Kjennich von Ägipten roopt de Häwaume un säd to an: Wuarom ha jie dit jedonen un de Junges aum Läwen erhoolen? 19Un de Häwaume säden toom Farao: Wiels de hebräische Frues nich sent aus de ägiptische, dan see sent kjraftich; ea de Häwaum no an kjemt, ha see jebuaren. 20Un Gott deed de Häwaume Goodet; un daut Volkj vemieed sikj un wort sea stoakj. 21Un daut passieed, wiels de Häwaume Gott ferchten, soo muak hee an Hiesa. 22Doa befool de Farao aul sienem Volkj un säd: Jiedra Sän, dee jebuaren woat, sell jie en däm Stroom schmieten, oba jiedre Dochta sell jie läwen loten.
Currently Selected:
2. Mose 1: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
