2. Mose 12
12
Daut Passa un Fast de ojjesuade Brood
1Un de Har räd too Moses un Aaron em Ägiptenlaunt un säd: 2Dis Moonat saul junt de Aunfank de Moonaten sennen, hee saul junt de ieeschta vonne Moonaten em Joa sennen. 3Räd to de gaunze Jemeent Israels un sajcht: Aum 10-den aun disem Moonat, doa nemm sikj een jiedra een Laum fa een Vodahus, een Laum fa een Hus. 4Un wan daut Hus nich grootjenuach es fa een Laum, soo nemm hee daut un sien Noba, de näakjsta aun sienem Hus, no de Zol de Seelen; eenem jiedren sell jie nodäm Mot von sienem Äten räakjnen - opp daut Laum. 5Een Laum onen Fäla sell jie haben, een menlichet, eenjoasch; vonne Schop ooda vonne Kose sell jie daut nämen. 6Un jie sellen daut en Vewoarung ha bat opp däm 14 Dach en disem Moonat; un de gaunze Vesaumlunk de Jemeent Israel saul daut schlachten tweschen de twee Owents. 7Un see sellen vom Bloot nämen un daut aun de beid Däapast un aune Bowaschwal doonen, aune Hiesa, en dee see daut äten. 8Un see sellen en dee selje Nacht daut Fleesch äten, jebrode aum Fia, un onjesuadet Broot; met bettrem Krut sell jie daut äten. 9Jie sellen nich reiw doavon äten un nich em Wota jekoakt, sonda aum Fia jebrode; sienem Kopp met siene Schinkjes un met sienem Ennalichen. 10Un jie sellen nuscht doavon äwaloten bat Zemorjes; un waut doavon bat Zemorjes äwablift, sell jie met Fia vebrennen. 11Un aulsoo sell jie daut äten: June Lenden omjebungen, june Schoo aun june Feet un jun Stock en june Haunt; un jie sellen junt biem äten spooden. Daut es daut Passa Gottes. 12Un ekj woa en dise Nacht derch daut Ägiptenlaunt gonen un aule Ieeschtjeburt em Ägiptenlaunt schlonen vom Mensch bat toom Vee, un ekj woa Jerecht eewen aun aule Jetta de Ägipta, ekj, Gott. 13Un daut Bloot saul junt toom Tieekjen aune Hiesa sennen, woa jie sent; un woa ekj daut Bloot seenen, soo woa ekj aun junt vebie gonen; un daut woat kjeene Ploag toom Vedoawen unja junt sennen, wan ekj daut Ägiptenlaunt schlo.
14Un dis Dach saul junt toom Jedajchnis sennen, un jie sellen am fieren aus een Fast däm Gott; aus eewje Sazunk bie june Jeschlajchta sell jie am fieren. 15Säwen Doag sell jie onjesuadet äten; jo, aum ieeschten Dach sell jie däm Suadieech ut junem Hus wajchdoonen; dan jiedra dee Jesuadet at, vom ieeschten Dach bat däm säwenden Dach, dee Seel saul ut Israel utjerot woaren. 16Un aum ieeschten Dach sell jie eene heilje Vesaumlunk un aum säwenden Dach eene heilje Vesaumlunk hoolen; kjeene Oabeit saul aun an jedonen woaren; blooss waut von jiedre Seel jejäten woat, daut auleen saul von junt reedjemoakt woaren. 17Un soo hoolt daut Fast de onjesuade Brood; dan aun disem seljen Dach ha ekj june Häasch ut däm Ägiptenlaunt rutjefieet. Un jie sellen disem Dach hoolen bie june Jeschlajchta aus eewje Sazunk. 18Aum ieeschten Moonat, aum 14-den Dach em Moonat, Oppenowent, sell jie Onjesuadet äten bat däm 2ieeschten Dach em Moonat, Oppenowent. 19Säwen Doag saul kjeen Suadieech en june Hiesa jefungen woaren; dan jiedra, dee Jesuadet at, dee Seel saul ut de Jemeent Israel utjerot woaren, hee es een Framdlinkj ooda Eenheimischa em Launt. 20Nuscht Jesuadet sell jie äten; en aul june Woninj sell jie Onjesuadet äten.
21Un Moses roopt aule Eltestasch Israels un säd to an: Sieekjt junt ut un nemt junt Kjlienvee no june Famieljes un schlacht daut Passa; 22un nemt eenen Bonsel Isop un duckt am en daut Bloot, daut em Troch es, un penselt met disem Bloot, daut em Troch es, aune Bowaschwal un aun beid Däapast; oba jie, kjeena von junt saul ut siene Husdäa bat Zemorjes rutgonen. 23Un de Har woat omhäa gonen, de Ägipta too schlonen; un sitt hee daut Bloot aun de Bowaschwal un aun beid Däapast, soo woat de Har aun dee Däa vebie gonen un woat däm Vedoawa nich erlauben, en june Hiesa too komen, om to schlonen. 24Un jie sellen dit hoolen aus eene Sazunk fa die un diene Kjinja eewich. 25Un daut saul passieren, wan jie en daut Launt komen, daut Gott junt jäwen woat, soo aus hee jerät haft, soo sell jie disem Deenst hoolen. 26Un daut saul passieren, wan june Kjinja to junt sajen woaren: Waut saul junt dis Deenst? 27Soo sell jie sajen: Daut es een Passa-Opfa däm Gott, dee aun de Hiesa de Kjinja Israel en Ägipten vebie jinkj, aus hee de Ägipta schluach un onse Hiesa rad. Un daut Volkj bekjt sikj un bäd aun. 28Un de Kjinja Israel jinjen han un deeden daut; soo aus de Har Moses un Aaron befoolen hauden, aulsoo deeden see.
De tieende Ploag: De Ieeschtjeburt stoaft
29Un daut passieed meddel enne Nacht, doa schluach de Har aule Ieeschtjeburt em Ägiptenlaunt, vom Ieeschtjebuarnen vom Farao, dee opp sienem Troon saut, bat toom Ieeschtjebuarnen de Jefangne, dee em Kjarkja wia, un aule Ieeschtjeburt vom Vee. 30Un de Farao stunt de Nacht opp, hee un aule siene Kjnajchts un aule Ägipta, un daut wia een grootet Jeschrecht en Ägipten; dan daut wia kjeen Hus, woa kjeen Doodja wia. 31Un hee roopt Moses un Aaron en dee Nacht un säd: Moakt junt reed, got wajch ute Medd von mienem Volkj, soo jie aus uk de Kjinja Israel, un got han, deent däm Harn, aus jie jesajcht ha; 32uk jun Kjlienvee un june Rinda nämt met, soo aus jie jesajcht ha, un got han un säajent mie uk!
Israel jeit ut Ägipten - Sazunk von Passa
33Un de Ägipta drenjden daut Volkj, an schwind ut däm Launt gonen to loten; dan see säden: Wie stoawen aula! 34Un daut Volkj druach sienen Dieech, ea hee sua wia, äare Bakträaj en äare Kjleeda jebungen, opp äare Schulren. 35Un de Kjinja Israel deeden nom Wuat Moses un foddaden von de Ägipta selwanet un goldnet Jescherr un Kjleeda. 36Un de Har jeef däm Volkj Jnod en de Uagen de Ägipta, un see gauwen an daut Jefodade; un see beroowde de Ägipta.
37Un de Kjinja Israel jinjen von Raemses no Sukkot, bie 600 000 Maun too Foot, de Mana onen Kjinja. 38Un uk väl Mischvolkj jinkj met an nopp, un Kjlienvee un Rinda, sea väl Vee. 39Un see backte däm Dieech, däm see ut Ägipten jebrocht hauden, onjesuade Kuaken; dan hee wia nich jesuat, wiels see ut Ägipten wieren jejoach worden un kunnen daut nich vetrakjen; un see hauden uk kjeen Äten fa sikj reed. 40Un de Tiet, dee de Kjinja Israel en Ägipten jewont ha, es 430 Joa. 41Un daut passieed aun Enj de 430 Joa, un daut passieed aun däm seljen Dach, daut gaunze Häa Gottes ut däm Ägiptenlaunt rutjinkj. 42Dit es eene Nacht, dee däm Harn too hoolen es, wiels hee an ut däm Ägiptenlaunt rutjefieet; dise selje Nacht es däm Harn too Eare, dee es too hoolen von aule Kjinja Israel bie äare Jeschlajchta.
43Un de Har räd too Moses un Aaron: Dit es de Sazunk von Passa: Kjeen Framda saul doavon äten; 44oba jiedra menlicha Kjnajcht, eena, fa Jelt jekofta, wan du am beschnitst, dan doaf hee doavon äten. 45Een Gaustoabeida un een Doagesleena sellen nich doavon äten. 46En eenem Hus saul daut jejäten woaren; du saust nich von däm Fleesch ut däm Hus rutdroagen, un see sellen kjeen Been aun am vebräakjen. 47De gaunze Jemeent Israel saul daut doonen. 48Un wan een Framda bie die es un daut Passa däm Harn hoolen well, soo woat aulet Menliche bie am beschnäden, un dan kjemt hee doatoo, daut to hoolen; un hee saul sennen aus een Einheimische vom Launt. Oba kjeen onbeschnädna saul doavon äten. 49Een Jesaz saul fa däm Einheimischen sennen un fa däm Framden, dee en june Medd wont. 50Un aule Kjinja Israel deeden, aus de Har Moses un Aaron befoolen haud; aulsoo deeden see.
51Un daut passieed aun disem seljen Dach, doa fieed de Har de Kjinja Israel ut däm Ägiptenlaunt rut no äare Häaschoa.
Currently Selected:
2. Mose 12: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
