2. Mose 11
11
De tieende Ploag waot bekauntjemoakt
1Un de Har räd too Moses: Noch eene Ploag well ekj äwa däm Farao un äwa Ägipten brinjen; doano woat hee junt von hia gonen loten. Wan hee junt gonen lat, soo woat hee junt soogoa von hia wajchjoagen. 2Räd doch toom Volkj, daut see een jiedra von sienem Noba un eene jiedre von äare Nobasche selwane un goldne Jefässa foddat. 3Un de Har jeef däm Volkj Jnod enne Uagen de Ägipta. Uk Moses wia een groota Maun em Ägiptenlaunt, enne Uagen de Kjnajchts vom Farao un enne Uagen vom Volkj. 4Un Moses säd: Soo sajcht de Har: Om meddel enne Nacht well ekj utgonen meddel derch Ägipten; 5un aule Ieeschtjeburt em Ägiptenlaunt saul stoawen, vom Ieeschtjebuarnen vom Farao, dee opp sienem Troon sett, bat toom Ieeschtjebuarnen von de Deenstmejal, dee hinjre Mäl es, un aule Ieeschtjeburt vom Vee. 6Un daut woat een grootet Jeschrecht sennen em gaunzen Ägiptenlaunt, soo waut noch niemols jewast es un nich mea sennen woat. 7Oba jäajen aule Kjinja Israel woat nich een Hund siene Tung spetzen, vom Mensch bat toom Vee; om daut jie weeten, daut de Har een Unjascheet moakt tweschen de Ägipta un de Israeliten. 8Un aul dise diene Kjnajchts woaren no mie raufkomen un sikj ver mie dol bekjen un sajen: Got rut, du un aulet Volkj, daut die folcht! Un nodäm woa ekj rutgonen. - Un hee jinkj von däm Farao rut en jläjendjem Oaja.
9Un de Har haud too Moses jesajcht: De Farao woat nich opp junt hieren, om daut miene Wunda sikj vemieren em Ägiptenlaunt. 10Un Moses un Aaron ha aul dise Wunda ver däm Farao jedonen; oba de Har vestokt däm Farao sien Hoat, un hee leet de Kjinja Israel nich ut sienem Launt gonen.
Currently Selected:
2. Mose 11: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
