1. Mose 50

Jakob sien Bejrafnis en Hebron

1Un Josef foll opp sienem Voda sien Aunjesecht un hield äwa am un kust am. 2Un Josef befool siene Kjnajchts, de Doktasch, sienem Voda entobalsamere. Un de Doktasch balsamede Israel en. 3Un daut worden 40 Doag fa am erfelt, dan soo woaren de Doag de Enbalsamerunk erfelt. Un de Ägipta hilden äwa am 70 Doag. 4Un aus de Doag de Trua vebie wieren, doa räd Josef toom Farao sienem Hus un säd: Wan ekj Jnod en june Uagen jefungen ha, soo räd doch ver däm Farao siene Uaren un sajcht: 5Mien Voda haft mie schwieren loten un jesajcht: Kjikj, ekj stoaw; en mienem Grauf, daut ekj mie em Launt Kanaan jegroft ha, doa saust du mie begrowen. Un nu lot mie doch noppgonen, daut ekj mienem Voda begrow un trigjkom. 6Un de Farao säd: Go nopp un begrow dienen Voda, soo aus hee die schwieren leet.

7Un Josef jinkj nopp, om sienem Voda too begrowen; un met am jinjen nopp aule Kjnajchts vom Farao, de Eltestasch von sienem Hus, un de Eltestasch vom Ägiptenlaunt, 8un daut gaunze Hus von Josef un siene Breeda un daut Vodahus; blooss äare Kjinja un äa Kjlienvee un äare Rinda leeten see em Launt Gosen trigj. 9Uk Woages aus uk Rittasch jinjen met am nopp, un daut Häa wia sea groot. 10Un see kaumen bat de Draschdäl Atad, dee jansied vom Jordan licht, un see hilden doa eene sea groote un schwoare Kloag; un hee stald om sienen Voda eene Trua von säwen Doag aun. 11Un de Laundesbewona, de Kanaanita, sagen de Trua bie de Draschdäl Atad, un see säden: Daut es eene schwoare Trua de Ägipta; doahäa jeef maun ar däm Nomen Avel-Mizraim [de Ägipta trua], dee jansied vom Jordan licht. 12Un siene Säns deeden am, soo aus hee an befoolen haud; 13un siene Säns fieeden am en daut Launt Kanaan un begrowen am en de Heel oppem Flekj Machpela, dee Abraham met däm Flekj toom Oawbejrafnis jekoft haud vom Efron, däm Hetita, ver Mamre. 14Un Josef kaum wada trigj no Ägipten, hee un siene Breeda un aula, dee met am nopp jegonen wieren, om sienen Voda too begrowen, nodäm aus hee sienen Voda begroft haud.

15Un Josef siene Breeda sagen, daut äa Voda jestorwen wia, doa säden see: Wan Josef ons nu fientlich woat un ons aul daut beese vejelten wudd, daut wie am aunjedonen ha! 16Un see schekjten no Josef un leeten am sajen: Dien Voda haft ver sienem Doot befoolen un jesajcht: 17Soo sell jie too Josef sajen: Ach, vezei doch de Misdot diene Breeda un äare Sinden! Dan see ha die Beeset aunjedonen. Un nu vezei doch de Misdot de Kjnajchts von dienem Voda sienem Gott! Un Josef hield, aus see to am räden. 18Un uk siene Breeda jinjen un follen ver am han un säden: Kjikj, wie sent diene Kjnajchts. 19Doa säd Josef to an: Forcht junt nich; dan sie ekj aun Gott siene Städ? 20Jie zwoa, jie hauden Beeset jäajen mie em Senn; oba Gott haud em Senn, daut goot too moaken, om daut hee deed, aus daut aun disem Dach es, om een grootet Volkj aum Läwen too erhoolen. 21Un nu, fercht junt nich; ekj woa junt un june Kjinja vesorje. Un hee treest an un räd too äare Hoaten. 22Un Josef wond en Ägipten, hee un daut Hus von sienem Voda; un Josef läwd 110 Joa.

23Un Josef sach de Kjinja von Efraim daut dredde Jlied; uk de Säns Makir, von Manasse sienem Sän, worden opp Josef siene Kjnee jebuaren. 24Un Josef säd to siene Breeda: Ekj stoaw; un Gott woat junt jewess besieekjen un junt ut disem Launt nopp fieren en daut Launt, daut hee Abraham, Isaak un Jakob jeschwuaren haft. 25Un Josef leet de Säns Israel schwieren un säd: Gott woat junt jewess besieekjen; soo sell jie miene Knoakes von hia nopp fieren! 26Un Josef storf, 110 Joa oolt; un see balsamede am en, un maun läd am en een Soakj en Ägipten.

Currently Selected:

1. Mose 50: PBJHF

Highlight

Copy

Compare