5. Mose 7

Daut Jeboot, sikj von de Kanaanita un äarem Jetzendeenst wajchtohoolen

1Wan de Har, dien Gott, die en daut Launt brinjt, wuahan du kjeemst, om daut entonämen, un väle Nazionen ver die rutjajcht; de Hetita un de Girgasita un de Amorita un de Kanaanita un de Perisita un de Hewita un de Jebusita, 7 Nazionen, jrata un stoakja aus du, 2un de Har, dien Gott, an ver die doahan jeft, un du an schleist, soo saust du an gaunz un goa vebaunen; du saust kjeen Bunt met an moaken, noch Jnod an jäajenäwa eewen. 3Un du saust die nich met an aunfrinde; un diene Dochta saust du nich sienem Sän jäwen, un siene Dochta saust du nich fa dienem Sän nämen; 4dan see woaren diene Säns von mie auftrannich moaken, daut see aundre Jetta deenen; un de Oaja Gottes woat jäajen junt oppflaumen, un hee woat die schwind vetiljen. 5Sonda soo sell jie an doonen: äare Aultoaren sell jie dolrieten un äare Biltstendasch vebräakjen un äare Ascherim omschmieten un äare jeschnizte Bilda met Fia vebrennen. 6Dan een heiljet Volkj best du fa däm Harn, dienem Gott; die haft de Har, dien Gott, erwält, am toom Ieejendoomsvolkj to sennen ut aule Velkja, dee oppem Ieedboddem sent.

7Nich wiels jie mea wieren aus aule Velkja, junt haft de Har sikj aunjenomen un junt erwält; dan jie sent daut jerinjste unja aule Velkja; 8sonda wäajen Gottes Leew to junt, un wiels hee däm Eit helt, däm hee june Vodasch jeschwuaren haft, haft de Har junt met ne stoakje Haunt rutjefieet un die ut däm Kjnajchtshus erleest, ut de Haunt vom Farao, däm Kjennich von Ägipten.

9Soo saust du nu weeten, daut de Har, dien Gott, dee Gott es, de trua Gott, dee däm Bunt un de Jnod opp 1000 Jeschlajchta han dän bewoat, dee am leewen un siene Jebooten hoolen, 10un dän, dee am haussen, em Aunjesecht vejelt, an too vetiljen; hee vetrakjt daut nich met siene Haussa, em Aunjesecht vejelt hee an! 11Soo sust du daut Jeboot un de Sazungen un de Rajchte bewoaren, dee ekj die vondoag to doonen befäl.

12Un daut woat passieren; doaväa daut jie dise Rajchte jehorchen un dee bewoaren un dee doonen, woat de Har, dien Gott, die däm Bunt un de Jnod bewoaren, dee hee diene Vodasch jeschwuaren haft; 13un hee woat die leewen un die säajnen un die vemieren; hee woat säajnen de Frucht von dienem Lief un de Frucht von dienem Launt, dien Jeträajd un dienen jungen Wien un dien Eelj, de Frucht von diene Rinda un de Frucht von dienem Kjlienvee, en däm Launt, daut hee diene Vodasch jeschwuaren haft, die to jäwen. 14Jesäajent woascht du sennen ver aule Velkja; kjeen Onfruchtboara un kjeene Onfruchtboare woat unja die sennen, noch unja dienem Vee. 15Un de Har woat jiedre Krankheit von die aufhoolen; un kjeene beese Past Ägiptens, dee du kjanst, woat hee opp die lajen, sonda hee woat dee opp aul diene Haussa brinjen. 16Un du woascht aule Velkja veschlinjen, dee de Har, dien Gott, die jäwen woat. Dien Uag saul an nich schoonen, un du saust äare Jetta nich deenen; dan daut wudd die eene Schlenj sennen.

17Wan du en dienem Hoaten sajchst: Dise Nazionen sent jrata aus ekj; woo kaun ekj dee vejoagen? 18Enjst die nich fa an; jedenkj doch doaraun, waut de Har, dien Gott, däm Farao un aule Ägipta jedonen haft, 19de groote Vesieekjungen, dee diene Uagen jeseenen, un de Tieekjen un de Wunda, un de stoakje Haunt un däm utjestrakjtem Oarm, met waut de Har, dien Gott, die rutjefieet haft. Aulsoo woat de Har, dien Gott, aul de Velkja doonen, ver dän du die enjst; 20un uk de Hornisse woat de Har, dien Gott, jäajen an schekjen, bat de Äwajebläwne un dee sikj ver die vestäakjen omjekomen sent. 21Habt nich Angst fa an! Dan de Har, dien Gott, es en diene Medd, een groota un schrakjelja Gott. 22Un de Har, dien Gott, woat dise Nazionen eenem nom aundren ver die rutjoagen; du woascht an nich schwind venichten kjennen, doamet nich de Tieren oppem Flekj sikj jäajen die vemieren. 23Un de Har, dien Gott, woat an ver die doahan jäwen un an en groote Vewerrunk brinjen, bat see vetilcht sent. 24Un hee woat äare Kjennichs en diene Haunt jäwen, un du woascht äare Nomes unja däm Himmel venichten; kjeen Mensch woat ver die bestonen, bat du an vetilcht hast. 25De jeschnizte Bilda äare Jetta sell jie met Fia vebrennen; die saul daut Selwa un daut Golt nich jankren un die daut nämen, daut du nich doaderch jefangen woascht; dan daut es een Aufschu ver däm Harn, dienem Gott; 26un du saust kjeen Aufschu en dien Hus brinjen, soo daut du een Baun aus hee woascht; du saust daut gaunz un goa veaufschue un daut jenslich fa eenen Aufschu hoolen, dan daut es een Baun.

Currently Selected:

5. Mose 7: PBJHF

Highlight

Copy

Compare