5. Mose 8
8
Denkj doaraun woo goot Gott es un sie Dankboa
1Daut gaunze Jeboot, daut ekj die vondoag befäl, sell jie hoolen, daut to doonen; om daut jie läwen un junt vemieren un nenkomen un daut Launt ennämen, daut de Har june Vodasch jeschwuaren haft. 2Un du saust jedenkjen däm gaunzen Wajch, däm de Har, dien Gott, die haft enne Wieste gonen loten dise 40 Joa, om die too deemutje, om die uttoproowen, om to erkjanen, waut en dienem Hoaten es, auf du siene Jebooten hoolen woascht ooda nich. 3Un hee deemutijd die un leet die hungren; un hee foodad die met Maunajrett, daut du nich kjansd un daut diene Vodasch nich kjanen, om die weeten to loten, daut de Mensch nich von Broot auleen läft, sonda daut de Mensch von aulem läft, waut ut däm Mul Gottes jeit. 4Dien Kjleet es aun die nich vefollen, un dien Foot es nich jeschwolle dise 40 Joa. 5Soo erkjan en dienem Hoaten, daut, aus een Maun sienen Sän stroft, de Har, dien Gott, die stroft; 8, 6un hool de Jebooten Gottes, von dienem Gott, om opp sienem Wajch too waundlen un am to ferchten.
7Dan de Har, dien Gott, brinjt die en een goodet Launt doa Rieen, Kjwalen un väl Wota es, dee enne Läachten ranen; 8een Launt von Weit un Joascht un Wienstakj un Fiejebeem un Granatbeem; een Launt von Eelj rikjen Eeljbeem un Honnich; 9een Launt, en däm du nich kjemmalich Broot äten woascht, en däm daut die aun nuscht manglen woat; een Launt, en däm de Steena Iesa sent, un du ut de Boaj Koppa haken woascht. 10Un du hast jejäten un best saut jeworden, soo saust du däm Harn, dienen Gott, fa daut goode Launt loowe, daut hee die jejäft haft.
11Heed die, daut du däm Harn, dienem Gott, nich vejatst, soo daut du siene Jebooten un siene Rajchte un siene Sazungen, nich helst, dee ekj die vondoag befäl! 12Doamet nich, wan du atst un saut woascht, un scheene Hiesa bust un bewonst, 13un dien Rind- un dien Kjlienvee sikj vemieet, un Selwa un Golt sikj bie die vemieren, un aules, waut du hast, sikj vemieet, 14dien Hoat sikj dan erhäft, un du däm Harn, dienen Gott, vejatst, dee die ut däm Ägiptenlaunt, ut däm Hus de Kjnajchtschoft, rutjefieet haft; 15dee die gonen leet en de groote un schrakjelje Wieste, woa Fiaschlange un Skorpionen sent, drieeje Tieden, woa kjeen Wota es; dee die Wota ut däm hoaden Steen ranen leet; 16dee die enne Wieste toom äten Maunajrett jeef, daut diene Vodasch nich kjanen, om die too deemutje un om die uttoproowen, doamet hee die en diene Tookunft gootdeit, 17un du en dienem Hoaten sajchst: Miene Krauft un miene stoakje Henj ha mie dit Vemäajen jeschauft! 18Sonda du saust däm Harn, dienem Gott, jedenkjen, daut hee daut es, dee de Krauft jeft, Vemäajen tomoaken; om daut hee sienen Bunt helt, däm hee diene Vodasch jeschwuaren haft, aus daut aun disem Dach es. 19Un daut woat passieren, wan du däm Harn, dienem Gott, vejatst un aundre Jetta nojeist un an deenst un die ver an bekjst - ekj zeij vondoag jäajen junt, daut jie jewess omkomen woaren; 20aus de Nazionen, dee de Har ver junt venicht haft, aulsoo woa jie omkomen, doaväa daut jie oppe Stemm Gottes, von junem Gott, nich jehieet ha.
Currently Selected:
5. Mose 8: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
