5. Mose 6

De Oppfodrunk, blooss dän eenen Gott veieren

1Un dit sent de Jebooten, de Sazungen un de Rajchte, dee de Har, jun Gott, befoolen haft, junt to lieren, doamet jie dee en däm Launt doonen, wuahan jie äwagonen, om daut aus Ieejentum too nämen; 2om daut du däm Harn, dienem Gott, ferchst aule Doag en dienem Läwen, om to hoolen aul siene Sazungen un siene Jebooten, dee ekj die befäl, du un dien Sän un de Säns von dienem Sän, un om daut diene Doag sikj velenjren. 3Soo hia nu, Israel, un acht doaropp, dee to doonen, doamet daut die gootjeit, un jie junt sea vemieren - soo aus de Har, de Gott diene Vodasch, to die jerät haft - en eenem Launt, daut von Malkj un Honnich rand!

4Hea Israel: De Har, ons Gott, es een eensja Gott! 5Un du saust däm Harn, dienen Gott, leewen met dienem gaunzen Hoaten un met diene gaunze Seel un met diene gaunze Krauft. 6Un dise Wieed, dee ekj die vondoag befäl, sellen opp dienem Hoaten sennen. 7Un du saust dee diene Kjinja ennschoapen un doavon räden, wan du en dienem Hus setst, un wan du oppem Wajch jeist, un wan du die dollajst, un wan du oppsteist. 8Un du saust dee toom Tieekjen opp diene Haunt binjen, un dee sellen toom Stearnbaund sennen, tweschen diene Uagen; 9un du saust dee aune Huspast un aun diene Dooasch schriewen.

10Un daut saul passieren, wan de Har, dien Gott, die en daut Launt brinjt, daut hee diene Vodasch, Abraham, Isaak un Jakob, jeschwuaren haft, die to jäwen; groote un goode Städa, dee du nich jebut hast, 11un Hiesa, voll von aulem Hab un Goot, dee du nich jefelt, un utjehakte Borms, dee du nich jehakt, Wienboaj un Eeljgoades, dee du nich jeplaunt hast, un du äten un saut woaren woascht; 12soo heed die, daut du däm Harn nich vejatst, dee die rutjefieet haft ut däm Ägiptenlaunt, ut däm Hus de Kjnajchtschoft. 13De Har, dien Gott, saust du ferchten un am deenen, un bie sienem Nomen saust du schwieren. 14Jie sellen nich aundre Jetta nogonen, von de Jetta de Velkja, dee runtom junt sent; 15dan een iewaja Gott es de Har, dien Gott, en diene Medd; doamet nich de Oaja Gottes, von dienem Gott, jäajen die oppflaumt, un hee die vom Ieedboddem vetilcht.

16Jie sellen däm Harn, junem Gott, nich utproowen, aus jie am bie Massa utjeproowt ha. 17Jie sellen de Jebooten Gottes jeneiw hoolen, von junem Gott, un siene Zeijnise un siene Sazungen, dee hee die befoolen haft. 18Un du saust doonen, waut rajcht un goot es enne Uagen Gottes, om dautet die gootjeit un du nennkjemst un daut goode Launt ennemst, daut de Har diene Vodasch jeschwuaren haft too jäwen, 19endäm hee aul diene Fiend ver die vejajcht, soo aus de Har jerät haft.

20Wan dien Sän die enne Tookunft frajcht un sajcht: Waut bedieden de Zeijnise un de Sazungen un de Rajchte, dee de Har, ons Gott, junt befoolen haft? 21Soo saust du dienem Sän sajen: Wie wieren Kjnajchts vom Farao un Ägipten, un de Har haft ons met ne stoakje Haunt ut Ägipten rutjefieet; 22un de Har deed ver onse Uagen groote un vedoawen brinjende Tieekjen un Wunda aun Ägipten, aun däm Farao un aun sienem gaunzen Hus; 23un ons fieed hee von doa rut, om ons häatobrinjen, ons daut Launt to jäwen, daut hee onse Vodasch jeschwuaren haud. 24Un de Har haft ons befoolen, aul dise Sazungen to doonen, däm Harn, onsem Gott, too ferchten, ons toom Gooden aule Doag, daut hee ons aum Läwen helt, aus daut aun disem Dach es. 25Un daut woat onse Jerajchtichkjeit sennen, wan wie doaropp achten, dit gaunze Jeboot ver däm Harn, onsem Gott, to doonen, soo aus hee ons befoolen haft.

Currently Selected:

5. Mose 6: PBJHF

Highlight

Copy

Compare