5. Mose 18

De Priesta äa Aundeel

1De Priesta, de Levit, de gaunza Staum Levi, sellen kjeen Deel noch Oaw met Israel ha; de Fiaopfa Gottes un sien Oawdeel sellen see äten. 2Oba hee saul kjeen Oawdeel enne Medd siene Breeda ha; de Har es sien Oawdeel, soo aus hee to am jerät haft.

3Un dit saul daut Rajcht de Priesta sennen, waut an vom Volkj tosteit, von dän, dee een Schlachtopfa opfren, daut es een Rind- ooda Kjlienvee: Maun saul däm Priesta de Schulla jäwen un de Kjennbaken un de Moag. 4Daut Ieeschte von dienem Jeträajd, von dienem jungen Wien un dienem Eelj, un daut Ieeschte vom Schop schäaren saust du am jäwen; 5dan am haft de Har, dien Gott, erwält ut aul diene Stam, doamet hee doa steit, om däm Deenst em Nomen Gottes to doonen, hee un siene Säns, aule Doag.

6Un wan de Levit komen woat ut eenem diene Dooasch, ut gaunz Israel, wua hee sikj opphelt, un hee kjemt met aule Lost - siene Seel aun däm Uat, däm de Har erwälen woat, 7un deit däm Deenst em Nomen Gottes, sienem Gott, aus aule siene Breeda, de Leviten, dee doa selfst ver däm Harn stonen: 8Soo sellen see dee selje Deele äten, buta däm, waut hee von sienem Voda sienem Ieejentum vekoft haft.

Woarnunk fa Zaubarie un Woasajarie

9Wan du en daut Launt kjeemst, daut de Har, dien Gott, die jeft, soo saust du nich lieren, nodäm Aufschu de Nazionen to doonen. 10Daut saul kjeena unja die jefungen woaren, dee sienen Sän ooda siene Dochta derch daut Fia gonen lat, kjeena, de Woasajarie drift, kjeen Zaubra ooda Beschwäara ooda Magie drift, 11ooda eena de met Baun belajcht ooda Doodes-Beschwäara ooda Woasaja ooda dee Doodes befrajcht. 12Dan een Aufschu fa däm Harn es een jiedra, dee dise Dinj deit; un om dise Aufschu wellen jajcht de Har, dien Gott, an ver die rut. 13Du saust jäajenäwa däm Harn, dienem Gott, vollkomen sennen. 14dan dise Nazionen, dee du rutjoagen woascht, hieren opp Zaubra un opp Woasaja; oba du - nich aulsoo haft de Har, dien Gott, die erlaubt.

De Norecht von eenen rajchten Profeeten

15Eenem Profeet ut diene Medd, ut diene Breeda, aus mie, woat de Har, dien Gott, die erwakjen; opp am sell jie hieren; 16no aulem, waut du von däm Harn, dienem Gott, aum Horeb jewenscht hast aum vesaumlungs Dach, endäm du sädst: Ekj mucht nich wiedahan dee Stemm Gottes, mienem Gott, hieren, un dit groote Fia mucht ekj nich mea seenen, daut ekj nich stoaw! 17Un de Har räd to mie: Goot es, waut see jesajcht ha. 18Eenen Profeet, aus die, well ekj an ut de Medd äare Breeda erwakjen; un ekj well miene Wieed en sienem Mul lajen, un hee woat aules to an räden, waut ekj am befälen woa. 19Un daut woat passieren, dee Maun, dee nich opp miene Wieed hieet, dee hee en mienem Nomen räden woat, von däm woa ekj daut fodren.

20Doch de Profeet, dee sikj true woat, en mienem Nomen een Wuat to räden, daut ekj am nich befoolen ha to räden, ooda dee em Nomen von aundre Jetta räden woat; dee selje Profeet saul stoawen. 21Un wan du en dienem Hoaten sajchst: Woo sell wie daut Wuat erkjanen, daut de Har nich jerät haft? 22Wan de Profeet em Nomen Gottes räd, un daut Wuat passieet nich un nich en traft, soo es daut een Wuat, daut de Har nich jerät haft; met Veachtunk haft de Profeet daut jerät; du saust die nich fa am ferchten.

Currently Selected:

5. Mose 18: PBJHF

Highlight

Copy

Compare