5. Mose 19
19
Toofluchtsstäda – Nich daut Jrenstieekjen wiedasaden
1Wan de Har, dien Gott, de Nazionen utroden woat, dee äa Launt de Har, dien Gott, die jeft, un du an rutjajchst un en äare Städa un en äare Hiesa wonst; 2soo saust du die 3 Städa aufsondren enne Medd von dienem Launt, daut de Har, dien Gott, die jeft, daut entonämen. 3Du saust die däm Wajch doahan reedmoaken, un de Laundesjäajent, dee de Har, dien Gott, die aus Oawdeel jäwen woat, en 3 Deele deelen; un daut saul passieren, doamet jiedra Dootschlona doahan rant. 4Un dit es de Sach met däm Dootschlona, dee doahan ranen saul, doamet hee aum Läwen blift: Wäa sienem Näakjsten nich aufsechtlich dootschleit, un hee haust am verhäa nich, 5aus wan hee met sienem Näakjsten em Woolt jeit, om Holt too haken, un siene Haunt holt ut met däm Biel, om daut Holt auftohaken, un daut Iesa foat vom Stäl un traft sienem Näakjsten, daut hee stoaft; dee saul en eene dise Städa ranen, doamet hee aum Läwen blift; 6om daut nich de Blootracha, wiels sien Hoat aunjehetzt es, däm Dootschlona nojeit un am errieekjt, wiels de Wajch lank es, un am dootschleit, wan am uk kjeen Doodesuadeel traft, doa hee am verhäa nich haust. 7Doarom befäl ekj die un saj: 3 Städa saust du die aufsondren.
8Un wan de Har, dien Gott, diene Jrensen wieda moakt, soo aus hee diene Vodasch jeschwuaren haft, un die daut gaunze Launt jeft, daut hee diene Vodasch to jäwen vesproaken haft, 9wan du doaropp acht jeefst, dit gaunze Jeboot to doonen, daut ekj die vondoag befäl, endäm du däm Harn, dienem Gott, leefst un opp siene Wäaj aule Doag waundelst, soo saust du die too dise 3 noch 3 Städa doatoo doonen; 10doamet nich onschuldjet Bloot en dienem Launt vegoten woat, daut de Har, dien Gott, die aus Oawdeel jeft, un Blootschult opp die es.
11Oba wan een Maun sienem Näakjsten haust, un opp am luat un sikj jäajen am erhäft un am dootschleit, soo daut hee stoaft, un hee rant en eene dise Städa; 12soo sellen de Eltestasch von siene Staut hanschekjen un am von doa holen loten un am enne Haunt vom Blootracha jäwen, daut hee stoaft. 13Dien Uag saul am nich schoonen; un du saust daut oschuldje Bloot ut Israel wajchschaufen, un daut woat die gootgonen.
14Du saust nich de Jrens von dienem Näakjsten veschuwe, dee de Väaelren en dienem Oawdeel jesat ha, daut du en däm Launt oawen woascht, daut de Har, dien Gott, die jeft, daut entonämen.
Zeij ver däm Jerecht
15Een eensja Zeij saul nich jäajen irjent wäm oppstonen wäajen irjent eene Ojjerajchtichkjeit un wäajen irjent eene Sind, un bie irjent eene Sind, dee maun bejeit; opp utsaj von 2 ooda von 3 Zeijen saul eene Sach bestädicht woaren.
16Wan een Onjerajchta Zeij jäajen irjent wäm oppsteit, om een Vegonen jäajen am to bewiesen, 17soo sellen dee beid Mana, dee metenaunda Striet ha, ver däm Harn komen, ver de Priesta un de Rechta, dee aun janem Dach sennen woaren. 18Un de Rechta sellen de Sach utforsche; un kjikj, es de Zeij een faulscha Zeij, haft hee Faulschet jäajen sienem Brooda bewäsen, 19soo sell jie am doonen, aus hee sienem Brooda docht to doonen; un du saust daut Beese ut diene Medd wajchdoonen. 20Un de Äwaje sellen daut hieren un sikj enjsten un wiedahan nich mea soo eene Iebeldot en diene Medd begonen. 21Un dien Uag saul nich schoonen: Läwen fa Läwen, Uag fa Uag, Tän fa Tän, Haunt fa Haunt, Foot fa Foot!
Currently Selected:
5. Mose 19: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
