5. Mose 16

Veordnunk äwa daut Passa, daut Wäakjenfast un daut Loofzelten-Fast

1Beobacht däm Moonat Abib un fia daut Passa däm Gott (Jahwe), dienem Gott; dan em Moonat Abib haft die de Har, dien Gott, de Nacht ut Ägipten rutjefieet. 2Un du saust däm Harn, dienem Gott, daut Passa schlachten, Kjlienvee un Rinda, aun däm Uat, däm de Har erwälen woat, om sienem Nomen doa selfst wonen to loten. 3Du saust kjeen jesuadet doatoo äten; säwen Doag saust du Onjesuadet doatoo äten, Älentsbroot, - dan en Iel best du ut däm Ägiptenlaunt rutjegonen - om daut du däm Dach jedenkjst aus du ut däm Ägiptenlaunt rutjinjst, aule Doag en dienem Läwen. 4Un säwen Doag saul kjeen Suadieech bie die jeseenen woaren en dienem gaunzen Launt; un von däm Fleesch, daut du Oppenowent schlachst, aum ieeschten Dach, saul nich äwa Nacht bliewen bat Zemorjes.

5Du kaust daut Passa nich en eenem diene Dooasch schlachten, dee de Har, dien Gott, die jeft; 6sonda aun däm Uat, däm de Har, dien Gott, erwälen woat, om sienen Nomen doa selfst wonen to loten, doa saust du daut Passa schlachten, Oppenowent, biem Sonnenunjagank, too Tiet aus du ut Ägipten rutjinjst; 7un du saust daut brode un aun däm Uat äten, däm de Har, dien Gott, erwält haft. Un Zemorjes saust du no dienem Zelt gonen. 8Sas Doag saust du Onjesuadet äten; un aum säwenden Dach es eene Fast-Vesaumlunk Gottes, dienem Gott; du saust kjeen Woakj doonen.

9Säwen Wäakj saust du die auftale; von doa aun, woa maun aunfankt, de Siechel aum Sot too lajen, saust du aunfangen, säwen Wäakj too talen. 10Un du saust daut Wäakjenfast Gottes, dienem Gott, fieren, no de friewelje Gow diene Haunt, dee du jäwen muchst, soo aus de Har, dien Gott, die säajnen woat; 11un du saust die ver däm Harn, dienem Gott, freien, du un dien Sän un diene Dochta, un dien Kjnajcht un diene Deenstmejal, un de Levit, dee en diene Dooasch es, un de Framda un de Weis un de Wätfru, dee en diene Medd sent, aun däm Uat, däm de Har, dien Gott, erwälen woat, om sienen Nomen doa selfst wonen to loten. 12Un du saust jedenkjen, daut du een Kjnajcht en Ägipten jewast best, un saust dise Sazungen hoolen un doonen.

13Daut Fast de Loofzelte saust du säwen Doag fieren, wan du aules vonne Draschdäl un vonne Wienprass enjesaumelt hast; 14un du saust die aun dienem Fast freien, du un dien Sän un diene Dochta, un dien Kjnajcht un diene Deenstmejal, un de Levit un de Framda un de Weis un de Wätfru, dee en diene Dooasch sent. 15Säwen Doag saust du däm Harn, dienem Gott, aun däm Uat daut Fast fieren, däm de Har erwälen woat; dan de Har, dien Gott, woat die en aul diene Arnt säajnen un en aulem Woakj diene Henj, un du saust blooss froo sennen.

16Dree Mol em Joa sellen aule diene Menliche ver däm Harn, dienem Gott, aun däm Uat komen, däm hee erwälen woat; aum Fast de Onjesuade Brood un aum Wäakjenfast un aum Loofzelte Fast; un maun saul nich ladich ver däm Harn komen: 17Een jiedra nodäm waut siene Haunt jäwen kaun, nom Säajen Gottes, dienem Gott, daut hee die jejäft haft.

Rajcht ensaten – Strof wäajen Jetzendeenst

18Rechta un Väastona saust du die ensaten, no diene Stam, en aul diene Dooasch, dee Gott (Jahwe), dien Gott, die jeft, doamet see daut Volkj rechten met jerajchtem Jerecht. 19Du saust daut Rajcht nich bieejen, du saust de Persoon nich aunseenen un kjeen Jeschenkj nämen, dan daut Jeschenkj moakt de Uagen de Weise blint un vedreit de Wieed de Jerajchte. 20De Jerajchtichkjeit; - de Jerajchtichkjeit saust du nojoagen, om daut du läfst un daut Launt ennemst, daut de Har, dien Gott, die jeft.

21Du saust die kjeene Aschera plaunten, irjent een Holt biem Aultoa Gottes, dienem Gott, däm du die moaken woascht. 22Un du saust die kjeene Biltstendasch opprechten, dee de Har, dien Gott, haust.

Currently Selected:

5. Mose 16: PBJHF

Highlight

Copy

Compare