5. Mose 15
15
Daut Entlotungsjoa (wäm von siene Schult freimoaken)
1Aum Enj von säwen Joa saust du een Schultvezeidach hoolen. Un dit es de Sach met däm Schultvezeien: 2Jiedra Schultharr saul de Schult ut siene Haunt vezeien, daut hee sienem Näakjsten jelieen haft; hee saul sienem Näakjsten un sienem Brooda nich drenjen; dan maun haft een Schult vezeien von däm Harn utjeroopen. 3Däm Framden kaust du drenjen; oba waut du bie dienem Brooda hast, saul diene Haunt vezeien; 4daut es sest, daut kjeen Oama unja die es. Dan de Har woat die en dienem Launt sea säajnen, daut de Har, dien Gott, die aus Oawdeel jeft, daut entonämen, 5wan du blooss de Stemm Gottes, dienem Gott, jehorchst, doaropp too achten, dit gaunze Jeboot to doonen, daut ekj die vondoag befäl. 6Dan de Har, dien Gott, woat die säajnen, aus hee to die jerät haft; un du woascht väle Nazionen lieen kjennen, oba du woascht von kjeenem lieen; un du woascht äwa väle Nazionen harschen, oba äwa die woaren see nich harschen.
7Wan een Oama unja die sennen woat, irjent eena von diene Breeda, en eenem von diene Dooasch en dienem Launt, daut de Har, dien Gott, die jeft, soo saust du dien Hoat nich hoat woaren loten un diene Haunt ver dienem Brooda, däm Oamen, nich veschluten; 8sonda du saust diene Haunt wiet opmoaken un am wellich lieen, waut fa däm Mangel rieekjt, däm hee haft. 9Heed die, daut nich en dienem Hoaten een beesa Jedanken es, daut du sajchst: Daut kjemt daut säwende Joa, daut Schultvezeijoa! Un daut dien Uag jäajen dienem Brooda oajalich es, däm Oamen, un du am nuscht jefst, un hee äwa die to däm Harn schricht, un aun die eene Sind es! 10Wellich saust du am jäwen, un dien Hoat saul nich oajalich sennen, wan du am jefst; dan om dise Sach woat de Har, dien Gott, die säajnen en aul dienem Woakj un en aulem Jeschaft diene Henj. 11Dan de Oame woaren em Launt nich opphieren; doarom befäl ekj die un saj: Du saust dienem Brooda, dienem Nootliedenden un dienem Oamen en dienem Launt, diene Haunt wiet opdoonen.
Sklowen woaren friejeloten
12Wan dien Brooda, een Hebräa ooda eene Hebräarin, sikj die vekjaft, soo saul hee die sas Joa deenen; un aum säwenden Joa saust du am frie von die entloten. 13Un wan du am frie von die entlatst, soo saust du am nich ladich von die gonen loten; 14du saust am von dienem Kjlienvee un von (ut) diene Schien un von dienem Wienkjala opploden; von däm, met waut de Har, dien Gott, die jesäajent haft, saust du am jäwen. 15Un du saust jedenkjen, daut du een Kjnajcht em Ägiptenlaunt jewast best, un daut de Har, dien Gott, die erleest haft; doarom befäl ekj die vondoag dise Sach. 16Un daut saul passieren, wan hee to die sajcht: Ekj well nich von die wajchgonen, wiels hee die un dien Hus leeft, wiels et am bie die goot jeit - 17soo saust du een Uht nämen un däm derch sien Ua enne Däa stäakjen, un hee woat fa emma dien Kjnajcht sennen; un uk diene Deenstmejal saust du aulsoo doonen. 18Daut saul nich schwoa en diene Uagen sennen, wan du am frie von die latst; dan waut aun Wieet vom dobbelden vom Loon, von eenem Doagesleena utmoakt, haft hee die sas Joa lank jedeent; un de Har, dien Gott, woat die säajnen en aulem, waut du hast.
19Aule menliche Ieeschtjeburt, daut unja diene Rinda un dienem Kjlienvee jebuaren woat, saust du däm Harn, dienem Gott, heilje. Du saust met däm Ieeschtjebuarnen von dienem Rind nich oabeiden, un du saust daut Ieeschtjebuarne von dienem Kjlienvee nich schäaren; 20ver däm Harn, dienem Gott, saust du daut äten, Joa fa Joa, du un dien Hus, aun däm Uat, däm de Har erwälen woat. 21Oba wan een Fäla aun am es, daut et lom ooda blint es, irjent een schlemma Fäla, soo saust du daut däm Harn, dienem Gott, nich opfren. 22En diene Dooasch kaust du daut äten, de Orreina un de Reina tojlikj, aus daut Ree un aus däm Hersch. 23Blooss sien Bloot saust du nich äten; du saust daut aus Wota oppe Ieed jeeten.
Currently Selected:
5. Mose 15: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
