5. Mose 14
14
Daut Veboot, heidnische Jewanheiten auntonämen – Reine un Orreine Tieren
1Jie sent Kjinja Gottes, junem Gott; jie sellen junt nich wäajen eenem Dooden veschnieden un junt nich tweschen june Uagen kol schäaren. 2Dan een heiljet Volkj best du fa däm Harn, dienem Gott; un die haft de Har erwält, am een Ieejendoomsvolkj to sennen, ut aule Velkja, dee oppem Ieedboddem sent.
3Du saust kjeen Aufschu äten. 4Dit sent de Tieren, dee jie äten sellen: Rind, Schop un Kose, 5Hersch un Ree un Beffel un Steenbock un Wiesteree un Boajchkose un wille Schop. 6Un jiedret Tia, daut jespoolde Heefta haft, un zwoa gaunz derch jespoolde Heefta, un daut unjre Tieren wadakaut, daut sell jie äten. 7Blooss dise sell jie nich vonne Wadakaua äten un von dän, dee met jespoolde Heefta sent; daut Kameel un däm Hos un de Steendacks; dan see kaue wada, oba see ha kjeene jespoolde Heefta; onrein sellen see junt sennen; 8un daut Schwien, dan daut haft jespoolde Heefta, oba daut kaut nich wada; onrein saul junt daut sennen. Von äarem Fleesch sell jie nich äten, un äa Os sell jie nich aunrieren.
9Dit sell jie von aulem äten, waut em Wota es; aules waut Floosen un Scheepen haft, sell jie äten; 10oba aules, waut kjeene Floosen un Scheepen haft, sell jie nich äten; onrein sellen dee junt sennen.
11Aule reine Väajel sell jie äten. 12Oba dise sent daut, dee jie von an nich äten sellen; de Odla un de Laumodla un de Mäaodla, 13un de Hofkje un de Stapodla, un de Oshacka no äare Oat, 14un de Kraujen no äare Oat, 15un de Strausshan un de Strausshohn un de Meewen, un de Hofkje no äare Oat, 16de Ul un de Ruadrommel un de Purpurhan, 17un de Pelikan un de Oshacka un de Reia, 18un de Storjch, Feschodla no siene Oat, un de Huppupp un de Flautamus. 19Un aulet Jewimmel daut Flichten haft saul junt onrein sennen; daut saul nich jejäten woaren. 20Aule reine Väajel sell jie äten.
21Jie sellen kjeen Os äten; däm Framden, dee en dienem Dooa es, muchst du daut jäwen, daut hee daut at, ooda vekjeep daut eenem Framden; dan een heiljet Volkj best du däm Harn, dienem Gott. - Du saust daut Bockje nich enne Malkj siene Mutta koaken.
Daut Tieendel (Dän Tieenden)
22Du saust vonne Sot de Arnt daut 10-de auflajen, waut von dienem Aka kjemt, Joa fa Joa. 23Un du saust ver däm Harn, dienem Gott äten, aun däm Uat, dän hee erwälen woat, om sienen Nomen doa selfst wonen to loten, daut 10-de von dienem Jeträajd, dienem jungen Wien un dien Eelj, un de Ieeschtjebuarne von dienem Rind un dienem Kjlienvee, om daut du däm Harn, dienem Gott, ferchten lieescht aule Doag. 24Un wan de Wajch too wiet fa die es, daut du daut nich hanbrinjen kaust, wiels de Uat too wiet von die es, däm de Har, dien Gott, erwälen woat, om sienen Nomen doahan too saten, wan de Har, dien Gott, die säajent: 25Soo saust du daut en Jelt jäwen; un binj daut Jelt en diene Haunt un go aun däm Uat, däm de Har, dien Gott, erwälen woat. 26Un jeef daut Jelt fa aules, waut diene Seel jankat, fa Rinda un fa Kjlienvee un fa Wien un fa stoakjet Jedrenkj, un fa aules, waut diene Seel wenscht; un at doa selfst ver däm Harn, dienem Gott, un frei die, du un dien Hus. 27Un däm Levit, dee en diene Dooasch es, däm saust du nich veloten; dan hee haft kjeen Deel noch Oaw met die.
28Aum Enj von dree Joa saust du aule 10-de von diene Arnt en janem Joa auflajen un daut en diene Dooasch hanlajen; 29un de Levit - dan hee haft kjeen Deel noch Oaw met die - un de Framda un de Weis un de Wätfru, dee en diene Dooasch sent, sellen komen un äten un saut woaren; om daut de Har, dien Gott, die säajent - en aul diene Woakjen diene Henj, dee du deist.
Currently Selected:
5. Mose 14: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
