5. Mose 13
13
De Strof fa de faulsche Profeeten un Gottesdeensten
1Daut gaunze Wuat, daut ekj junt befäl, daut sell jie hoolen, daut to doonen; du saust nuscht doatoo un nuscht doavon doonen.
2Wan en diene Medd een Profeet oppsteit, ooda eena, dee Dreem haft, un hee jeft die een Tieekjen ooda een Wunda; 3un daut Tieekjen ooda daut Wunda traft en, von däm hee to die jerät haft, endäm hee sajcht: Lot ons aundre Jetta nogonen, (dee du nich jekjant hast), un an deenen! 4Soo saust du nich opp disem Profeet siene Wieed hieren ooda opp däm, dee de Dreem haft; dan de Har, jun Gott, prooft junt, om to erkjanen, auf jie däm Harn, junem Gott, leewen met junem gaunzen Hoaten un met june gaunze Seel. 5Däm Harn, junem Gott, sell jie nofoljen un am ferchten; un jie sellen siene Jebooten hoolen un siene Stemm jehorchen un am deenen un am aunhenjen. 6Un jan Profeet ooda jana, dee de Dreem haud, saul dootjemoakt woaren; dan hee haft Auffaul jäajen däm Harn, junem Gott, jerät, dee junt ut däm Ägiptenlaunt rutjefieet un die erleest haft - ut däm Hus de Kjnajchtschoft, - om die von däm Wajch auftobrinjen, opp däm too waundlen de Har, dien Gott, die befoolen haft. Un du saust daut Beese ut diene Medd wajchschaufen.
7Wan dien Brooda, de Sän von diene Mutta, ooda dien Sän, ooda diene Dochta, ooda diene Fru aun dienem Bossem, ooda dien Frint, dee die aus eene Seel es, die heimlich äwaräd un sajcht: Lot ons gonen un aundre Jetta deenen, (dee du nich jekjant hast, du noch diene Vodasch, 8von de Jetta de Velkja, dee runtom junt sent, dicht bie die ooda wiet von die, von eenem Enj de Ieed bat nom aundren Enj de Ieed), 9soo saust du nich ennwellje un nich opp am hieren; un dien Uag saul an nich schoonen, un du saust die äwa am nich erboarmen noch am vestäakjen; 10sonda du saust am dootmoaken. Diene Haunt saul aus ieeschte aun am sennen, am doottomoaken, un doano de Haunt vom gaunzen Volkj; 11un du saust am steenjen, daut hee stoaft; dan hee haft vesocht, die auftoleiden von däm Harn, dienem Gott, dee die rutjefieet haft ut däm Ägiptenlaunt, ut däm Hus de Kjnajchtschoft. 12Un gaunz Israel saul daut hieren un sikj enjsten, doamet maun nich mea soo eene Iebeldot en diene Medd bejeit.
13Wan du von eene diene Städa, dee de Har, dien Gott, die jeft, om doatoo wonen, sajen hieescht: 14Daut sent Mana, Säns Belial, ut diene Medd utjegonen un ha de Bewona äare Staut veleit un jesajcht: Lot ons gonen un aundre Jetta deenen, - (dee jie nich jekjant ha), 15soo saust du jeneiw unjasäkjen un noforsche un froagen; un kjikj, es daut de Woarheit, steit de Sach faust, daut Aufschu en diene Medd veeewt wort, 16soo saust du de Bewona jane Staut jewess met eenem schoapen Schwieet schlonen; du saust an vebaunen un aules, waut en ar es, un äa Vee, met däm schoapen Schwieet schlonen. 17Un aul äa Raup saust du medden enne Staut opp eenem Plauz toopdroagen un aul äa Raup däm Harn, dienem Gott, gaunz met Fia vebrennen; un see saul een Mellhupe eewich sennen, see saul nich wada oppjebut woaren. 18Un lot nuscht von däm Vebaunten aun diene Haunt henjen, om daut de Har sikj von Zorngloot dreit un die Erboarmunk jeft un sikj äwa die erboarmt un die vemieet, soo aus hee diene Vodasch jeschwuaren haft, 19wan du de Stemm Gottes, dienem Gott, jehorchst, aul siene Jebooten too hoolen, dee ekj die vondoag befäl, daut du deist, waut enne Uagen Gottes, dienem Gott, rajcht es.
Currently Selected:
5. Mose 13: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
