Loma 8
8
Ubumi mu Mupashi Wabuta
1Nomba kuli bo abachetekela muli Klistu Yesu takupo umulandu. 2Pakuti ifunde lya Mupashi Wabuta ilitupela ubumi muli Klistu Yesu, lyankakula kwifunde ilyabubi nemfwa. 3Ifyo ifunde lyafililwe ukuchita, pamulandu wakunaka ukwabuntunse, Lesa alichitile nchi ulo atumine Umwana wakwe, uwali nomubili kubati ningu wabuntunse ukwebati achimfye ububi. 4Lesa achitile mfi ukuti ubulungami ubo ubukososwa na Amafunde akwa Mosesi, buboneke muli fwe. Echo tatwendapo kubati bantunse abatemwa ifyapanonshi, kuntu twatungululwa no Mupashi Wabuta. 5Abantunse bafwaya ifyapanonshi, kuntu abo abatungululwa no Mupashi Wabuta babika imitima yabo pali mfilya ififwaya Umupashi. 6Ukubika umutima pafintu fyapanonshi nimfwa, kuntu ukubika umutima kufyo Umupashi Wabuta ufwaya chilaleta ubumi nomutende. 7Echo ababika imitima yabo pafintu ifyapanonshi fipondo fyaku Lesa. Tabanakilapo Ifunde lyaku Lesa. Nachine tekuti banakilepo. 8Echo abantunse tekuti basekeshepo Lesa iyowo.
9Nomba mwebo tamwikalapo kubati bantunse pakuti mulatungululwa no Mupashi waku Lesa, kati Umupashi ngu uli muli mwebo ichine-chine. Elo umuntu onse uutakwatapo Umupashi waku Klistu talipo mwina Klistu. 10Nga Klistu aba muli mwebo, nangu imibili yenu yalifwa pamulandu wabubi, kuntu Umupashi bumi kuli mwe pakuti Lesa alimulungamikile. 11Kati Umupashi waku Lesa, uyo uwabushishe Yesu ukufuma kubafwa aba muli mwebo, ekwebati Lesa uwabushishe Klistu Yesu ukufuma kubafwa akwisa kubusha imibili yesu iifwa ukupitila Mumupashi wakwe uwaba muli mwe.
12Epo nomba, mwe bawesu, tulikwete umulimo, kuntu tewakusekesha imibili yabuntunse yesu iyowo. 13Nga mwayikala mukusekesha ifyabuntunse bwenu, mwakwisa kufwa. Nomba mukutungululwa no Mupashi Wabuta mwasha ukufwaya ifyabuntunse, mwakuba nobumi. 14Abo bonse abatungululwa no Mupashi Wabuta bana baku Lesa. 15Umupashi Wabuta uwo mwapokelele taumulengapo ukuti mube abasha nakambi iyowo, kuntu ukuba abana. Nakambi eulenga ukuti tulokulomba ati, “Abba, Bata.” 16Umupashi waku Lesa ulasuminishanya pamo nemitima yesu ulo ikoti tuli bana baku Lesa. 17Pakuti nomba tuli baku Lesa, twakupokelela ishuko, ina, ishuko ilifuma kuli Lesa. Kati tukochula pakuti tuli abena Klistu, twakupokelela umuchinshi pamo na Ye.
Ubuleme twakupoka kuntanshi
18Ukuchula uko tukopitamo nkano kashita tekuti tukulinganyepo nobuleme ubo Lesa akutufisulwila. 19Ifyo fyonse Lesa alengele fikolindila ukwinekantu ulo Ye akufisulula abana bakwe. 20Echo ifyalengelwe fyonse fyasangilwe nomulandu, tekufwayapo kwafiko iyowo, kuntu nipamulandu waku ngulya uwafwayile ukuti fibe mfi. Elo kwali ukuchetekela,#Ukut. 3.17-19; 5.29 21ukwebati ifibumbwa mfi akasuba kamo, fyakulubulwa kubusha ubwakubola, fyakupokelela ubuleme bwabwanalale kubati bana baku Lesa. 22Tulishibile ukuti ukufikila nanduno ichibumbwa chonse chilomfwa ukufinya kubati kwamufyashi nakupapa. 23Te fibumbwapo fyenka ifikochula mfi, kuntu nafwebo abakwata Umupashi Wabuta wabafye chabupe ichakubalapo ichaku Lesa, tulomfwa ukufinya muli fwe ukwinekantu. Inshita yonse tukolindila ukuti Lesa atupulushe nokutupokelela nga abana bakwe. 24Pakuti muchichetekelo emo twapulushiwa. Nomba nga twachibona namenso icho tukolindila, mba chindo icho twakulindilila nakambi? 25Elo nga tukolindila icho tatulabonapo tulingile ukulindila nomutima-tenka.
26Munshila imo yenka, Umupashi Wabuta ulatwafwako. Tuli abanaka, tatwishibilepo ifyo tulingile ukulomba. Echo Umupashi Wabuta ulatulombela kuli Lesa ifyo amashiwi tangasosapo. 27Epo Lesa uwayishiba ifyamumitima yesu, alishiba kale ifyo malangulushi aya Mupashi aba, pakuti Umupashi Wabuta eupapatilako abantu kuli Lesa umo afwayila.
28Twalishiba ukuti mufintu fyonse Lesa alafitungulula ubune kuli bo abamutemwa, abo ayita ukulingana nokufwaya kwakwe. 29Abo Lesa ayishibile kale alibasalile ukuti babe nga Umwana wakwe, pakuti ye akuba ibeli lyamuli bawabo abenji. 30Echo abo Lesa asalile ebo ayitile. Elo abo ayitile, akubalungamika. Nakambi abo alungamika, ebo aakene umuchinshi.
Ukutemwa kwaku Lesa muli Yesu Klistu
31Muli mfi fyonse, mba findo twingasosapo? Nga Lesa ali nafwebo, mba ninani uwakutubukila? 32Lesa alitupele Umwana wakwe umwine. Elo alimupele pamulandu wesu! Nomba kuti afilwa shani ukutupela ifintu fyonse pamo na Ye? 33Mba ninani uwingapela umulandu kubasalwa baku Lesa? Lesa umwine alibalungamikile. 34Mba ninani wakubalengulula? Tefyopo Klistu uwafwile, ina, tusose ukuti uyo babushishe. Engulya umumi uli kukuboko ukwamulyo kwaku Lesa akotupapatilako. 35Mba ninani uwakutulekanya mukutemwa kwaku Klistu? Napo fyakutuchusha nangula ifyabwafya, nalimo amachushi nangula insala, ububusu nangula ifitinya, nangula imfwa? 36Amalembo Apatulika asosa ati,
“Pamulandu waku mwebo,
bakopinga ukutwipaya inshiku shonse.
Bakotubona kubati nimbelele
isho bakotwala mukwipaya.”#Amal. 44.22
37Muli mfi fyonse twaliba abachimfya pamulandu waku Klistu uwachitemweko chaku Lesa. 38Pakuba nalishininkisha ukwebati takupo nangu chimo ichakutulekanya kuchitemweko chaku Lesa. Nangu imfwa, nangu ubumi, nangu abangelo, nangu intungulushi, nangu ifintu ifiliko nangu ifyakwisa kuboneka, nangu ifyafiso ifili shani, 39nangu ichalo chamumulu nangu ichapanonshi, nangu ichabumbwa ichili chonse. Takupo ichintu nangu chimo ichakutulekanya kuchitemwiko chaku Lesa icho tukwete muli Klistu Yesu Imfumu yesu.
Chilala New Testament © Bible Society of Zambia, 1998.