Loma 9
9
Lesa nabantu bakwe
1Nkososa ifyakwebesha muli Klistu, tanshikobepapo iyowo. Nomutima wanji ukotangililwa no Mupashi Wabuta ukonsuminisha nebo ati nshisosapo bufi 2ulo ndabila ati ndi nechikonko ukwinekantu. Ndomfwa ukufinya umutima pamulandu uwa Bayuda bananji. 3Ukuba nga chali ichiweme ichakuti nebo bandapisha bwaka kuli Lesa ukuti nimba uwaku Klistu muchifulo ichabamukowa wanji. 4Mba Baisilaeli abo Lesa asalile ukuba abana bakwe nokubapela ubuleme. Lesa achitile ichipangano nabo. Elo alibapele Amafunde akwe. Alibasambishe ifyo balingile ukumulomba. Nakambi alibapela nefilayano.#Ukuf. 4.22; Deut. 7.6; 14.1,2 5Mba bafuma kufikolwe ifyayishibikwa ifya Bayuda. Elo Uwasubwa uyo alayile wamutundu wabo, ukusosa pafyabuntu bwakwe. Lesa uutungulula ifintu fyonse atondayishiwe lonse.
6Tanshikososapo ati Lesa tasungapo ichilayo chakwe iyowo. Pakuti te bonsepo abafyalilwa mumukowa wa Isilaeli ababa Abaisilaeli benenene iyowo. 7Nakambi te bonsepo abamuchikolwe chakwa Abulahamu ababa abana baku Lesa. Pakuti Lesa alayile Abulahamu ati, “Abana ba Isake bakwitwa abana bakwa Abulahamu.”#Ukut. 21.12 8Ekwebati te bonse abana bakwa Abulahamu ababa bana baku Lesa. Abana bakwe abenenene nimbalya abafyalwa ukulingana nechilayo chaku Lesa. 9Pakuti ichilayo chaku Lesa chalisoselwe muli nga mashiwi ayakuti, “Panshita iilingile njino kumwaka uukoyisa, nakubwela. Elo Sala akwisa kuba nomwana.”#Ukut. 18.10,14
10Nomba te nchi chenka iyowo. Ichikolwe chesu Isake na Labeka bafyele abana babili.#Ukut. 25.21 11Nangu ulo bampundu mba tabalafyalwa, ekwebati tabalachitapo ichiweme nangu ichibi ichili chonse, Lesa apekenye ukuti ukusalwa kwamwayiche kufikilishiwe. 12Ukusala nku takwachitikilepo pamulandu wamilimo iyo bachitile iyowo, kuntu efyo Lesa afwayile. Lesa aebele Labeka ati, “Umukulu akupyungila umwayiche.”#Ukut. 25.23 13Pakuti Amalembo asosa ati, “Natemenwe Yakobe, kuntu Esau nalimupatile.”#Mal. 1.2,3
14Nomba twingasosa shani? Napo Lesa tabapo mulungeme mukuchita mfi? Iyowo, nangu panini! 15Pakuti asosele kuli Mosesi ati, “Nakwisa kuba nechisa pamuntu uyo nafwaya ukubela ichisa, elo nakwisa kuba nenkumbu, pamuntu uyo nafwaya ukubela inkumbu.”#Ukuf. 33.19 16Epo nomba ichikulu tepo nchilya muntu afwaya nangu ifyo afwaya ukuchita, kuntu nimuchisa chaku Lesa epela. 17Echo Amalembo alabila kuli Falo, imfumu yaku Ijipiti ati, “Nalikubika pabufumu pamulandu wakuti mboneshe ifiso fyanji, nokuti ishina lyanji lishibikwe mpanga yonse.#Ukuf. 9.16 18Epo nomba, Lesa alakwatila ichisa pali uyo afwaya, nakambi alakosha imitima yabantu abo afwaya ukuti babe mfilya.”#Ukuf. 4.21; 7.3; 9.12; 14.4,17
Ubukali bwaku Lesa nechisa
19Elo bamo bangafumba ati, “Mba Lesa kuti asanga shani umulandu wabubi mumuntu? Nga ninani uwingakanya Lesa ukuchita icho afwaya?” 20Mba webo, umuntu bwaka, niwe nani ukuti ulokuchita ifikansa na Lesa? Napo inongo kuti yasosa kuwayibumbile ati, “Mba mulandu ndo wamumbile mfi?” 21Napo uubumba inongo takwetepo ifiso ifyakubumba ukufuma kwibumba limo ilyeloba inongo shibili: imo iiweme, elo nayimbi iyabwaka?
22Emfi Lesa achita. Nangu afwayile ukubachusha mubukali bwakwe nokubalanga ifiso fyakwe kuntu abakwatile inkumbu. Akwete ukushipikisha pali bo abali nokumfwa ubukali bwakwe. 23Elo nakambi afwayile ukubonesha ubuleme bwakwe ubukulu kuli fwebo abo akwatile ichisa nokutupekanishisha limo mbu bulume. 24Nifwe abo Lesa ayitile, tekufumapo ku Bayuda benka iyowo, kuntu nakubenafyalo. 25Mfi efyo Lesa asosa mwibuku lyakwa Hoseya,
“Abantu abo abatali banji,
nakubeta abantu banji.
Umutundu uyo napatile,
nakuwita ‘Abatemwekwa banji.’#Hos. 2.23
26Elo mufifulo umo baebelwe ati,
‘Tamuli abantu banji,’
emo bakwitwa ‘Abantu baku Lesa uwabumi.’”#Hos. 1.10
27Naye Esaya alishininkisha ulo asosele ati, “Nangu Abaisilaeli benji ukwinekantu kubati musenga uwamululamba lwaku bemba, kuntu abakwisa kupuluka banini bwaka. 28Pakuti Bashikulu bakupingula ichalo bwangu-bwangu. Elo bakuchita mfi ukwambula ukuposa inshita nokufikapo.” 29Chili ukubati nimfilya Esaya asosele ati,
“Nga chakuti Lesa tatushilepo abana,
nafwebo nga twalishilile kubati ni Sodomu,
nga twalishilile kubati ni Gomola.”#Esa. 10.22,23#Esa. 1.9
Paulo alombela abena Isilaeli
30Nomba findo twakusosa? Abenafyalo tabalikufwayilisha ubulungami bwaku Lesa, kuntu Lesa alibabona nga abalungama ukupitila mukuchetekela kwabo. 31Nomba Abaisilaeli mbalya abalikufwaya kulungamikwa ukupitila mu Mafunde balifililwe. 32Mba nipamulandu ndo? Nipamulandu wakwebati tabashintililepo pachichetekelo, kuntu pamilimo yabo. Echo bayitutwile kulibwe ilyo abantu bayitutwilako. 33Elo Amalembo asosa ati,
“Boneni nebo nkobika libwe mu Siyoni,
ilyo abantu bakuyitutwilako,
ilibwe ilyakulenga abantu ukuwa.
Nomba uyo uwakuchetekela muli Ye,
takesepo kuba nensoni iyowo.”#Esa. 28.16
Chilala New Testament © Bible Society of Zambia, 1998.