Loma 7
7
Ukulondolola ifyachupo
1Mwe bawesu, nkososa kuli mwebo abayishiba Amafunde. Mulishibile bwino-bwino ukuti Amafunde asosa kuli bo abachili nobumi. 2Echo umwanakashi uwaupwa alikakwa nefunde lyachupo ulo umulume wakwe achili nobumi. Nomba nga umulume wakwe afwa, alakakuka kwifunde ndi. 3Echo nga umwanakashi aya mukwikala nomwalalume umbi ulo umulume wakwe achili nobumi, bakumwita ati muchende. Nomba nga umulume wakwe afwa, ukulingana nefunde, ngu nomba akakulwa, talipo muchende nga aupwa kumwalalume umbi. 4Munshila imo yenka, mwe bawesu, namwebo mwalifwa ukulingana nefunde nokuba ifiputulwa ifyamubili uwaku Klistu uyo uwabushiwe ukufuma kumfwa. Echo tupyungile Lesa imilimo iiweme. 5Ulo twalikukonka ubumi bwabuntunse, ifibi fyakoseleshiwe na Mafunde nokukula muli fwe. Elo fyalifyala imfwa. 6Nomba twalikakuka kwifunde ndi. Ina, twalifwile kwifunde ilyatukakile. Nomba Umupashi Wabuta ulatwafwa ukupyungila Lesa munshila iyabwangu, tenshilapo iyakale iyakulama bwaka ifunde ilyalembwa.
Ifunde nobubi
7Nomba chindo twakusosa? Napo ifunde bubi? Nangu panini! Nomba ifunde elyanenga nebo ukwishiba ububi. Pakuti nga tanshayishibilepo ububi bwamufimbila nga ifunde talyasosele ati, “Wilokukumbwapo.”#Ukuf. 20.17; Deut. 5.21 8Pamulandu waku ndi ifunde ububi bwalisangile ishuko lyakwimya muli nebo umufimbila. Nga takupo ifunde ekwebati takupo nobubi. 9Akale nebo nali uwabumi ubwabwaka. Nomba ulo ifunde lyayishile, elo ububi bwatilimukile. 10Epo nebo nalifwile. Elo ifunde ilyali ilyakuleta ubumi, kuli nebo lyaletele imfwa. 11Echo ububi bwasangile ishuko kwifunde, epo ukupitila mwifunde bwalimbepele nokunjipaya.
12Ifunde ilili lonse lyaba ilyabuta, ilyalungama elo nakambi iliweme. 13Napo nchi chikoyalula ukuti chandetele imfwa? Iyowo, nangu panini! Ububi ebwanjipeye mukubomfya ichintu nchi ukuti ububi buboneke ifyo bwaba. Echo mwifunde ububi bulabipisha ukwinekantu.
Ifilwana mumuntu
14Twalishiba ukuti Ifunde lyafintu ifyamupashi. Nomba nebo ndi muntu bwaka, umusha wabubi. 15Tanshayishibapo ifyo nchita. Pakuti tanshichitapo ifyo mfwaya ukuchita, kuntu ifyo napata efyo nchita. 16Apo nshifwaya ukuchita ifyo nchita, ekwebati ifunde lyaba ilyalungama. 17Echo tenepo nchita ifyo nchita, kuntu ububi ubwaba muli ne. 18Pakuti nalishiba ukwebati tamupo ichiweme mubuntunse bwanji iyowo. Pakuba nangu nkofwaya ukuchita ifilungeme, epela ndafilwa ukufichita. 19Ifiweme ifyo mfwaya ukuchita, nshifichitapo. Nomba ifibi ifyo nshikofwayapo ukufichita, efyo nchita. 20Nga nebo nkochita ifyo nshikofwayapo ukuchita, ekwebati tenepo nchita mfi iyowo, kuntu ububi ubwaba muli ne.
21Epo nasanga ukuti ichikochitika chakuti ulo mfwaya ukuchita ifintu ifiweme, elo ifibi fili pali ne. 22Nebo naliba nokusekelela mwifunde lyaku Lesa. 23Nomba ndabona ifunde lipyunga mumubili wanji ililwisha ifunde lyaku Lesa ilyo nasuminamo. Ifunde limbi ndi likonka inshila yabubi. Engu uulenga ukuti mbe umusha wabubi. 24Nebo naba umuntu uwachikonko! Mba ninani uwakumpulusha kubwikashi mbu ubukontwala kumfwa? 25Ukutotela kube kuli Lesa muli Yesu Klistu Shikulu wesu!
Elo chaba mfi: nebo nkofwaya ukukonka Ifunde lyaku Lesa nomutima onse, kuntu nomubili wanji nkofwaya ukukonka inshila yabubi.
Chilala New Testament © Bible Society of Zambia, 1998.