Loma 6
6
Ifyakuba nobumi muli Klistu
1Mba findo twakusosa nomba? Napo twakutwalilila ukubifya ukuti ubwanshi bwaku Lesa bufulileko? 2Nangu panini! Fwebo twalifwa kukubifya, mba nindo twingekalilila mukuchita ububi? 3Napo tamwishibilepo ukuti fwe bonse twabele umo na Yesu Klistu ulo twabatishiwe? Mulubatisho ndu twabele umo namumfwa. 4Echo mulubatisho lwesu, twashikilwe pamo na Ye nokuba mumfwa yakwe ukwebati kubati nimfilya Bata bamubushishe kubafwa nefiso fyabo, elo nafwe tube nobumi bwabwangu.
5Nga mfilya twaba umo na Klistu mumfwa yakwe, munshila imo yenka twakuba umo mukubushiwa kubafwa kubati nimulya bamubushishe. 6Twalishiba ati akabelo kesu akakale kashilile ulo Yesu asamikilwe pamutashi, ukuti ubwikalo bwesu ubwabubi bonayikwe, elo twiba nakambi abasha babubi. 7Pakuba umuntu nga afwa akakulwa kufiso fyakubifya. 8Pakuti twalifwa na Klistu, tukochetekela ukwebati twakwisa kuba nobumi nakambi pamo nakwe. 9Pakuba twalishiba ukuti Klistu balimubusha ukufuma kubafwa, elo tayise kufwa nakambi. Imfwa tayakakwatepo fiso nakambi pali Ye. 10Epo imfwa iyo afwile yaali yakulekana nobubi, elo afwile umuku umo bwaka. Nomba ubumi ubo akwete bwakwipela kuli Lesa. 11Munshila imo yenka mulingile ukuyilangulukila mwenka ukuti mwalifwa kububi, kuntu muli ababumi kuli Lesa muli Bashikulu Yesu Klistu.
12Pamulandu ngu mwileka ububi ukuti butungulule mibili yenu iyo yakwisa kufwa nakambi mwinakilila kukufwaya kwamibili yenu. 13Mwilokubomfya ichilewa chenu chimo ichamubili wenu kububi, kuntu mwipele kuli Lesa nga bantu bafuma kumfwa nokuya kubumi. Mubomfye ifilewa fyamibili yenu mukubombela Lesa imilimo yabulungami. 14Ukufuma nomba ububi tabukwetepo ifiso pali mwebo pantu ichikotanjilila ubumi bwenu tepo amafunde iyowo, kuntu bwanshi ubukulu bwaku Lesa.
15Mba findo nomba? Napo tutwalilile ukubifya pantu tatukotungululwapo na Mafunde kuntu ubwanshi bwaku Lesa? Nangu panini! 16Mwalishiba ukuti nga mwayipela ubusha kumuntu umbi nokumumfwila, penkapo mwaba abasha bamuntu ngulya mukoumfwila. Nga mwaba abasha babubi, mwakwisa kufwa. Nomba nga nimwebo abasha baku Bashikulu, mwakulungamikwa. 17Akale mwali abasha babubi, kuntu tutondayishe Bashikulu ukuti nomba mulokumfwila nomutima onse ifyachine ifyakupulusha ifyo mwapokelele. 18Nomba mwalikakulwa kububi, elo muli basha abasekesha Lesa. 19Nimupela ichelusho nchi ichabusha icho mwayishiba ukuti mumfwikishe. Akale mwayipele mwenka ukuba abasha bwafikowesha nobubi bonse. Mushila imo yenka, mwipele nomba ukupyungila Lesa mukuchita ifiweme ifilanga ukuyipelesha kuli Ye.
20Ulo mwali abasha ababubi, tamwalokuchitapo ifyalungama. 21Mba findo mwasangilemo mukuchita ifintu ifyamwansha insoni nomba? Nachine icho mwalikusangamo nimfwa. 22Nomba mwalilubulwa kububi, echo kamupyungila Lesa, nechilambu chenu bumi ubwakwipelesha kuli Ye. Elo kumupwilo mwakupoka ubumi butapwa. 23Pakuti amalipilo abubi, nimfwa kuntu ichabupe chaku Lesa bumi butapwa muli Bashikulu Yesu Klistu.
Chilala New Testament © Bible Society of Zambia, 1998.