Loma 3
3
Ifyakulungama kwaku Lesa
1Napo Abayuda balichilapo pabenafyalo? Nangula mukushilimunwa, chinshi twingabwenamo? 2Nachine finji tungasangamo mukuba Abayuda. Pakutatika Lesa apele ubutumi bwakwe kuli bo.#Deut. 4.7,8 3Nga chakuti bambi muli bo tabachetekelwa? Napo nchi chikoyalula ukwebati Lesa naye aba uutachetekelwa? 4Nangu panini! Nomba abantu beshibe ukuti Lesa asosa ifyachine nangu abantu bonse babufi. Chili kubati nimfilya Amalembo asosa ati,
“Ulingile ukuba wachine mukusosa kobe,
nokuchimfya ulo bakokulubulwisha muchilye.”#Amal. 51.4
5Findo ifyakuchitikapo kati ububi bwesu bulanga ukuti Lesa aba uwalungama? Napo twingasosa ati Lesa taba bwino ulo atupela umulandu? (Nkososa nchi mukabelo kabuntu.) 6Tefyopo. Nga muli Lesa tamwabapo bulungami, mba kuti apingula shani ichalo?
7Umo kuti asosa ati, “Nga ubufi bwanji bukolanga ichine chaku Lesa nokumuletela ubuleme, mba nindo bakompingula nga imbifi?” 8Napo kuti twachita ifibi ukuti ifisuma fiboneke? Nachine eko bali abantu bambi abatubepesha ukuti fwebo tusosa mfi. Mba bakupingulwa ukwinekantu.
Takupo umulungami
9Mba nindo twakusosa? Napo fwe Bayuda twalichila abenafyalo? Iyowo! Ndisosele kale ati Abayuda nabenafyalo bonse nimbifi. 10Ukubati nimfilya Amalembo Apatulika asosa ati,
“Takupo umuntu nangu umo uwalungama,#Amal. 14.1-3; 52.1-3
11takupo uwamulangwe, nangula ulomba Lesa.
12Bonse bafutatila Lesa, bonse nabaluba,
takupo nangu umo uuchita ifiweme iyowo.
13Pamilomo yabo pali kubati nimanda iyachenama,
nendimi shabo shayiula bwaka ubufi.
Ishiwi ilili lonse basosa,
lyaba kubati bulembe bwansoka.#Amal. 5.9; 140.3
14Mukusosa kwabo mwayiula bwaka ukulapisha.#Amal. 10.7
15Balyanguka mukuchena namukwipaya,#Esa. 59.7,8
16basha ifibolya nokuchita ubonaushi konse uko baya.
17Tabeshibililepo ukwikala umutende,
18tabakwetepo nakatina kuli Lesa.”#Amal. 36.1
19Nomba tulishibile ukuti fyonse ifisosa Amafunde fisosa kuli bo abatungululwa na Mafunde pakuti bekwatapo akabepesho. Elo Lesa akubapingula bwino. 20Pakuti Lesa tabonapo umuntu nga uwalungama ukupitila mukuchita ifyo Amafunde. Icho Amafunde achita kulanga umuntu ukuti eshibe ati nabifya.
Umo Lesa alungamikila abantu
21Nomba Lesa atufisulwila inshila iyo alungamikilamo abantu. Tayikwetepo akantu nefyakulama Amafunde iyowo nangu Amafunde akwa Mosesi nabasoseshi filayachitila bukamboni. 22Abantu balalungamikwa na Lesa mukuchetekela Yesu Klistu. Lesa alachita mfi kuli bonse abachetekela muli Klistu. Takupo akapatulula iyowo. 23Pakuti bonse balibifya, elo bali ukutali nomuchinshi waku Lesa.#Amal. 143.2 24Nomba mubwanshi bwakwe ubuli bupe bwaka, alalungamika abantu bonse ukupitila muli Yesu Klistu uwatupulwishe. 25Lesa amupele ngu ukuti mumfwa yakwe abe nshila yakunakila amabifyo yabantu bonse abamuchetekela. Nchi chilanga ukulungama kwaku Lesa. Akale Lesa alikuteka umutima nokuleka amabifyo abantu. 26Nomba achitile mfi ukubonesha ifyo ali, nabantu ukuti beshibe ati mulungami. Elo ni Ye uulungamika nambalya abachetekela muli Yesu.
27Chindo nomba twingayitakishishapo? Tapapo. Nipamulandu ndo? Napo nipakuti tukolama Amafunde? Iyowo, pakuti ichikulu kuli Lesa tenchito muntu achita, kuntu kuchetekela bwaka. 28Umuntu alalungamikwa na Lesa ukupitila mukuchetekela, te kulamapo Amafunde iyowo. 29Napo Lesa wa Bayuda benka? Te wabenafyalo nabo? Ina, wabenafyalo nabo. 30Chiweme, nomba kuli Lesa umo, uulungamika Abayuda pamulandu wachichetekelo chabo, nabenafyalo munshila imo yenka. 31Napo chikoyalula ukwebati tulisulile Amafunde pamulandu wachichetekelo? Nangu panini. Ukuchilapo tulayakoselesha.
Chilala New Testament © Bible Society of Zambia, 1998.