Loma 2
2
Ubupingushi bwaku Lesa bwamulinganya
1Webo we upingula bambi, nangu chibe ati niwe nani, taukwetepo akabepesho. Pakuba ulo upingula abanobe, ulayipingula wemwine wenka, pakuti nawe ulachita fimo fyenka. 2Twalishiba ukuti Lesa alalungika ulo apingula abantu abachita mfi fintu. 3Nomba we munanji ukopingula abantu bambi abachita mfi ulo nawe efyo uchita, napo ukolanguluka ukuti wakwisa kupuluka kubupingushi bwaku Lesa? 4Napo ulasula inkumbu ishikulu ishaku Lesa, ukushipikisha nomutembo wakwe? Napo tawishipo ukuti Lesa alikukwatila inkumbu ukwebati ulapile? 5Nomba webo waba nomutima uukosele too, uutapilibukapo. Echo ukoyilundulwilako ubukali bwaku Lesa ubo akwisa kulanga pali nkalya kasuba mukupingula kwakwe ukwalungama. 6Pakuba Lesa akwisa kupela ichilambu kumuntu ukulingana nemilimo achitile. 7Abantu bonse abachinchila mukuchita ifiweme nokufwaya ubuleme, umuchinshi nobumi, Lesa akubapa ubumi butashila. 8Nomba bonse abafitala, abatomfwilapo nokuchita ifitalungama, Lesa akubapela umulandu mubukali bwakwe. 9Amachushi nokufinya fyakwisa pali bonse abachita ifibi, ukwambila ku Bayuda, elo nakubenafyalo.#2.9 nakubenafyalo: Mumabuku ambi abantu mba babeta ati Bagiliki, Bahelene nangula abakunse. 10Nomba Lesa akupela ubukata, umuchinshi nomutende kuli bonse abachita ifiweme, ukwambila ku Bayuda elo nakubenafyalo. 11Pakuba Lesa takwatapo akapatulula.
12Abenafyalo ababifya ukwambula ukwishiba Amafunde akwa Mosesi, balabifya, elo balalufiwa nangu bateshibilepo nga Mafunde. Elo bonse ababifya ulo beshibile Amafunde, balabifya, elo bakupingulwa ku Mafunde nga enka. 13Pakuti Lesa tabonapo abantu nga balungama pakumfwa Amafunde iyowo, kuntu nimukuchita ifyo Amafunde afwaya. 14Abenafyalo tabakwetepo Amafunde, kuntu ulo bachita benka ifisosa Amafunde balabwenesha ukuti bali namafunde mumitima yabo, nangula tabakwetepo amafunde akwa Mosesi. 15Imichitile yabo ilanga ukuti ifyo Amafunde afwaya fyalilembwa mumitima yabo. Kampingu wabo nawo ulashininkisha ukuti chakwebesha. Pakuba namalangulushi abo limo-limo alabashinina, elo limo-limo alabachingilila. 16Echo nomba, ukulingana no Butumi Bwawama ubo mbilisha, mfi efyo chakwisa kuba muli nkalya kasuba ulo Lesa, ukupitila muli Yesu Klistu, akwisa kupingula ifyamubumfishi fyonse ifyaba mumitima yabo.
Ifya Bayuda na Mafunde
17Webo, we uyita ukuti uli mu Yuda, ulashintilila pa Mafunde nokwitakisha muli Lesa. 18Walishiba ifyo Lesa afwaya ukuti ulokuchita, nakambi walisambilila mu Mafunde ukusala ichilungeme nechibi. 19Walishininkisha wemwine ukuti uli ntungulushi yampofu nokusanika kuli bo abali mumfinshi, 20umusambishi wabapuneme nabatayishiba. Ulashininkisha ukwebati Mumafunde ulasangamo umulangwe nokusambisha kwachine. 21Nomba webo uusambisha bambi, nindo utayisambishisha wemwine? Ulasambilisha ati, “Mwilokwiba,” napo we tawibapo? 22Usosa ati, “Wilokuchita buchende,” napo we tauchitapo buchende? We wapata tungosa wakubasa, napo we tawibapo mumananda yakulombelamo tungosa wakubasa? 23We uuyitakisha mu Mafunde aku Lesa, napo tauletelapo Lesa insoni ulo utoba Amafunde nga? 24Chili kubati ifyo Amalembo Aabuta asosa ati, “Abenafyalo basalula Lesa pamulandu waku mwebo mwe Bayuda.”#Esa. 52.5; Esek. 36.20
25Ukushilimunwa kulafwilisha nga chakuti ulalama Amafunde. Nomba nga taukoalamapo, chiweme ukutashilimunwapo. 26Nomba nga umuntu uutashilimunwa akolama Amafunde, napo Lesa tayise kumuloleshapo ukubati ningulya uwashilimunwa? 27Echo abatashilimunwa abalama Amafunde, ebakwisa kupela umulandu mwe bashilimunwa, elo abakwete na Mafunde, kuntu mukoatoba. 28Umuyuda umwinenene te ngulyapo uuyilanga bwaka kubantu. Elo ukushilimunwa kwinenene te nkulyapo ukuchitika kumibili bwaka iyowo. 29Umuyuda umwinenene ningulya uwaba Muyuda mumutima wakwe. Elo ukushilimunwa kwinenene ninkulya ukwamumutima, ukuchitwa no Mupashi Wabuta te ku Mafunde aalembwa iyowo. Uutondayisha umuntu uwaba mfi ni Lesa, te muntupo iyowo.
Chilala New Testament © Bible Society of Zambia, 1998.