Loma 4
4
Ichakubwenapo ichaku Abulahamu
1Mba findo twakusosa nefyakwa Abulahamu, ichokolwe chesu fwe Bayuda? Mba findo ena asambilile munjikalo yakwe? 2Kati Ye Lesa amulungamika pafintu ifyo achitile, kuti akwata ukuyitakisha, kuntu tepachinso chaku Lesa. 3Nga Amalembo Apatulika findo akososa? Akoti, “Abulahamu achetekele Lesa, elo pamulandu wachichetekelo chakwe, Lesa alimupokelele nga uwalungama.”#Ukut. 15.6 4Emukuti umuntu onse uubomba alalipilwa. Amalipilo nga tayalipo ubupe bwaka iyowo. Echo afwile ukupelwa pamulandu wakupyunga kwakwe. 5Kati umuntu achetekela bwaka mushila yakuyitakisha mumilimo yakwe, Lesa uubona imbifi ukuba abakaele pamulandu wachichetekelo chakwe. 6Enchilya Davide alikulabila ulo asosele ukushuka kwabantu abo Lesa abona nga abalungama ukwambula imilimo iyakuti Ye abalangulukileko.
7Asosele ati, “Balishuka abanakililwa amabifyo abo,
abo ububi bwabo bwafutwapo!#Amal. 32.1,2
8Alishuka umuntu uyo
uwo Bashikulu tabakese kwibusha amabifyo akwe!”
9Napo ishuko ndi lyaba kubashilimunwa benka nangula lyaba nakubatashilimunwa? Iyowo, lyaba nakubatashilimunwapo. Kubati nimfilya Amalembo Apatulika akososa ayo tusoselepo kale akoti, “Abulahamu achetekele Lesa. Elo pamulandu wachichetekelo chakwe, Lesa alimupokelele nga uwalungama.”#Ukut. 15.6 10Nilisa nchi chachitikilwe? Napo ulo talashilimunwa nangula panuma yakushilimunwa? Chachitikile ulo talashilimunwa. 11Abulahamu alishilimunwa panuma ukuti chibe ichishibilo ichakulanga ukuti Lesa amubwene uwalungama pakuchetekela kwakwe. Nomba Abulahamu ewishibo bonse abachetekela Lesa, na Lesa alabapokelela nga abalungama nangula tabashilimunwapo.#Ukut. 17.10,11 12Nakambi ewishibo wabashilimunwa. Tekushilimunwapo kwenka, kuntu abenda munshila iyakuchetekela iyali nabata Abulahamu ulo tabalashilimunwa. Ichilayo chaku Lesa chipokelelwa muchichetekelo.
13Ulo Lesa alayile Abulahamu nabana bakwe ukuti chalo chonse chakuba chabo, chalichitikilwe. Nomba tepamulandu wakweba ati Abulahamu asungile Amafunde. Nipamulandu wakuti achetekele Lesa, elo amulungamikile.#Ukut. 18.18; 22.17,18 14Kati icho Lesa alaya chalikupokelelwa kuli bo benka abalama Amafunde, kanshi ukuchetekela takukoyalulapo kantu nakambi nechilayo chaku Lesa chabwaka. 15Amafunde aleta ubukali bwaku Lesa, kuntu uko ukutali Amafunde takupo ukutomfwila Amafunde.
16Echo ubulayo bwayimakene pachichetekelo ukwebati ubulayo mbu bushininkishiwe ukuba ubupe bwaku Lesa kubana bonse abakwa Abulahamu. Te kuli mbalya benka abalama Amafunde akwa Mosesi iyowo, kuntu nabo abachetekela kubati nimfilya Abulahamu achetekele. Pakuti Abulahamu echikolwe chesu tonse. 17Nga mfilya Amalembo Apatulika asosa ati, “Nakulengele webo ukuba wishibo wamitundu yonse.” Ichilayo nchi Abulahamu achipokelele ukufuma kuli Lesa uyo achetekele. Engu Lesa uupela ubumi kubafwa, uwita ifitalabako nokufipela ubumi.#Ukut. 17.5; Esa. 48.13 18Lesa asosele ati, “Abana bobe bakuba abenji.” Elo Abulahamu achetekele nangula chalikuboneka kubati tachayise kuchitika. Ye alikulolela nokuchetekela ukuti akuba ichikolwe chamitundu iyinji.#Ukut. 15.5 19Ali apepi ukuba nemyaka umwanda, nomba tanenwikepo mukuchetekela ulo alikulanguluka ifyapamubili wakwe, uyo uwali kubati ulifwile kale. Nangula ichakwebati Sala ali ning’umba.#Ukut. 17.17 20Nangu chali mfi, ichichetekelo chakwe tachabwelele kunuma. Nomba alikuchetekela ichilayo chaku Lesa nefiso fyakwe. Nakambi ali kumutondayisha. 21Achetekele ukwinekantu ukuti Lesa akuchita fyonse alayile. 22Echo Abulahamu, ukupitila muchichetekelo, Lesa, “Amubwene nga mulungami.”#Ukut. 15.6 23Amashiwi akuti, “Amubwene nga mulungami” taalembelwepo Abulahamu enka. 24Akososa napali fwebo akotubona nga abalungama pamulandu wakuchetekela Lesa uwabushishe Bashikulu Yesu kubafwa. 25Yesu ngu bamwipeye pamulandu wafibi fyesu. Elo bamubushishe kubafwa ukuti Lesa atubone nga abalungami.
Chilala New Testament © Bible Society of Zambia, 1998.