Loma 1
1
1Nine Paulo, umupyungi waku Klistu Yesu. Lesa alinjitile ukuti mbe umutumwa. Alinsalile ukwebati mbilishe Ubutumi bwakwe Bwawama.#Mil. 9.15; 13.2
2Ubutumi mbu Lesa abulayile akale ukupitila mubasoseshi bakwe. Elo bwalembelwe mu Malembo Aabuta. 3Busosa ifya Mwana wakwe, Bashikulu wesu Yesu Klistu. Ukusosa ifyabuntu bwakwe, afyalilwe muchikoto chamfumu Davide.#Mat. 1.6 4Nomba ukubona pafyakubuta kwakwe ukwabulesa, alanga nefiso ifikulu ukuba Umwana waku Lesa ukupitila mukubushiwa kubafwa. 5Muli Klistu ngu emo Lesa ampelele ishuko lyakuba umutumwa waku Klistu, ukuti ntungulule abantu bamitundu yonse ukumuchetekela nokumumfwila.#Lom. 16.26 6Namwe muli bamo abayitwa na Lesa ukuti mube abaku Yesu Klistu.
7Epo nomba nkolembela mwebo bonse abali mu Loma, mwebo Lesa atemwa nokumwita ukuti mube abantu bakwe.
Lesa Bata na Bashikulu wesu Yesu Klistu bamupele ubwanshi nomutende.
Ukulomba kwakutotela
8Ichakubalilapo, nkototela Lesa wanji ukupitila muli Yesu Klistu pamulandu waku mwebo bonse, pakuti ichalo chonse chikoumfwa ifyachichetekelo chenu. 9Lesa uwo nebo mpyungila mukubilisha Ubutumi bwakwe Bwawama nomutima wanji onse, ekamboni wanji ukuti nebo ndamwibukisha. 10Lonse ndalomba ukuti kati Lesa akofwaya angampelako akashita kakwisa kumutandalila. 11Pantu nkofwayisha ukwinekantu ukumubona, ukuti njise mwakanyeko ifyabupe fimbi fyakumupashi ukuti mukoselesheko. 12Umo ndoseshe nimukuti tukoseleshanye muchichetekelo. Mwebo mukankoselesheko muchichetekelo chenu, namwe muli chanji.
13Echo bawesu, nkofwaya mwishibe ukuti inshita ishinji nalikufwaya ukwisa ukumutandalila, kuntu ifintu fimbi filankanya ukuchita nchi. Nkofwaya ukwalula bamo abamuli mwebo kubati nimfilya nachitile kubenafyalo bambi. 14Pakuti ndi nenchito yakushimika kubantu bonse, kubasambilila kubati Bagiliki nabatasambilila, kubamano nabapuneme. 15Echo nkofwayisha ukwinekantu ukubilisha Ubutumi Bwawama nakuli mwebo mwe bena Loma.
Ifiso fya Butumi Bwawama
16Nebo nshakwatapo nsoni pa Butumi Bwawama, pakuba efiso fyaku Lesa mukupulusha abantu bonse abachetekela, ukutatikila ku Bayuda elo nakubenafyalo. 17Pakuti Ubutumi mbu ebufisulula emo Lesa alungamikila abantu bonse. Inshila achitilamo mfi, ukutatika pakwamba ukufika nakumpelo, yachichetekelo. Kubati nimfilya Amalembo asosa ati, “Umuntu alungamikwa pamulandu wakuchetekela, elo alaba nobumi.”
Ukubifya kwabantu bonse
18Ubukali bwaku Lesa bukofisuluka ukufuma kumulu. Akokalipila abantu pamulandu wakubifya kwabo nokutamuchinshika. Mukubifya kwabo, bashimayisha ichine ukwebati chiyishibikwapo. 19Lesa alabakalipila pakuti ifyo umuntu angeshiba ifyaku Lesa bo nabafishiba bwino-bwino. Lesa umwine ewabafisululwile mfi. 20Pakuba ukufuma apo Lesa atalile ichalo, abantu balishibile ifyo Lesa ali, emukuti ifiso fyakwe fitapwapo, elo nobulesa bwakwe. Abantu baleshiba mfi ulo babona ifyo Lesa alengele. Echo tabakwetepo ichakwipokolwelako. 21Nachine Lesa balimwishibile, kuntu tabamupelako umuchinshi nangu ukumutotela. Elo mumalangulushi abo tamupo ifyamano. Bayiwula nemfimfi, echo balanguluka ifyabwaka. 22Bo bayitondayisha ukuba abamulangwe, kanshi bapuneme. 23Muchifulo chakutotela Lesa uwabumi, batotela tungosa wakubasa utuboneka kubati bantu bwaka, nangula ifyuni nangula inama nangula ifiyikula.
24Echo Lesa abalekele mbalya bantu ukuchita ifibi ifyalikufwaya imitima yabo. Elo amalangulushi abo aakowele alengele ukuti bachite ifyamwansha nsoni nemibili yabo. 25Balishiile ifyachine ifyaku Lesa nokukonka ifyabufi. Balikulambila nokupyungila ifyo Lesa abumbile muchifulo chaku Kabumba umwine uulingile ukutondayisha umuyayaya. Ameni.
26Nipamulandu wamfi epo Lesa abalekele ukuti balokuchita ifibi ifyamwansha nsoni. Abanakashi baya kubanakashi banabo, ichitalingilepo. 27Munshila imo yenka, abalalume nabo balekele ukuya kubanakashi. Baya kubalalume banabo nokuchita ifyamwansha nsoni nabo. Echo bayiletele ukukandwa ukulingene nemilimo yabo iibipile.
28Pantu abantu mbalya balikene ukumfwila, Lesa alibalekele mumalangulushi abo aabi, ukuti bachite ifintu ifyabipisha ifyo tabalingilepo ukuchita. 29Imitima yabo yayiwilemo ubusali bonse: ububi, bukabundulu, imibele iibi, mufimbila, bukepaya, ulubo, ubuchenjeshi nolupato. Balamba, 30ukusapulula abanabo nokupata Lesa. Abansele, abamiya nakambi abakwitutumuna. Balanguluka bwaka inshila shakuchitilamo ifibi. Elo tabomfwilapo abafyashi babo. 31Bapuneme, abatachetekelwapo, abatakwatapo inkumbu, abankalwe. 32Balishiba ifunde lyaku Lesa ilikoti abantu abachita mfi balinjile ukufwa. Nomba tabachitapo bwaka fyenka mfi, kuntu basuminisha nabonse abafichita.
Chilala New Testament © Bible Society of Zambia, 1998.