Imilimo ya batumwa 3
3
Petulo aposha ichite
1Akasuba kamo Petulo na Yohane bayile kunanda yaku Lesa mukulomba kwachungulo-kasuba. 2Mpalya pamulyango wananda yaku Lesa uwalikwitwa ati, “Umulyango Uuweme” payikele umwalalume uwalemana amolu ukutula kubwayiche bwakwe. Inshiku shonse balikumubika pamulyango mpalya ukuti alokupula ifintu kubantu bakoyinjila munanda yaku Lesa. 3Ulo abwene ukuti Petulo na Yohane bakofwaya ukwinjila munanda yaku Lesa, alibalombele ichabupe. 4Petulo na Yohane bamutontele amenso. Elo Petulo asosele kuli ye ati, “Tuloleshe!” 5Naye alibaloleshe mumutima akoti, “Bakompelapo chimo.” 6Elo Petulo amwebele ati, “Indalama nebo nshikwetepo, kuntu nkokupela icho nkwete: Mwishina lyaku Yesu Klistu waku Nasaleti nkoti ima wende!” 7Penkapo Petulo amwikete kukuboko kwamulyo, nokumwimya kamwimya. Bwangu-bwangu amakasa notuboboto twakwe fyalikosele. 8Elo alichilukile nokwimakana, atatikile nokwenda-enda. Panuma ayinjile nabo, ba Petulo na Yohane, munanda yaku Lesa uku akochiluka nokutondayisha Lesa. 9Abantu bonse bamubwene akoyenda nokutondayisha Lesa. 10Ulo bamwishibe ati ekapula ngulya uwalikwikala pa Mulyango Uuweme balishimbilwe ukwinekantu kuli mfilya ifyachitikile kuchite.
Amashiwi yakwa Petulo munanda yaku Lesa
11Ulo ngu muntu ayikatishe Petulo na Yohane, abantu bonse balishimbilwe ukwinekantu nokwengulukila uko bali mulukolo balikwita ati, “Lukolo lwakwa Solomoni.” 12Ulo Petulo abwene abantu mba, asosele kuli bo ati, “Mwe bena Isilaeli bananji, chindo icho mukoshimbwa pali nchi? Mulandu ndo mukotulolesesha mfi kubati nikufiso nangula nikukuwamya kwesu uko twatala ngu muntu ukuti alokwenda? 13Mukuchita mfi Lesa waku Abulahamu, Isake na Yakobe, Lesa wafikolwe fyesu, ewachindamika umupyungi wakwe Yesu. Mwebo mwalimuposele kufipondo fyakwe. Elo mwalimukene napa menso yakwa Pilato panshita Pilato alikufwaya ukumukakula. 14Yesu ali uwabuta nakambi uwalungama, kuntu mwebo mwalimukene. Mwalombele Pilato ukuti amukakwile ichipondo. 15Echo mwayipeye umwine wabumi, kuntu Lesa amubushishe kubafwa. Elo fwebo tuli bakamboni pali ngu mulandu. 16Kanshi ngu muntu mukobona nokwishiba, achetekela mwishina lyaku Yesu. Elo ishina ndi elyamuposha. Nachine chichetekelo muli Yesu ichalenga ukuti ngu muntu apole.
17“Mwe bawesu ndishibile ukuti mwebo nentungulushi shenu pamo mwachitile mfi kuli Yesu mukuteshiba. 18Ukuba enshila nji iyo Lesa apekenye ukufikilisha ifyo asosele ukupitila mubasoseshi bonse ukuti Klistu wakwe alinokuchula. 19Kanshi nomba lapileni, mwalukile kuli Lesa ukuti afute amabifyo enu. Elo Lesa akumupa ifiso fyabwangu inshita nenshita. 20Elo Lesa akutuma Uwasubwa uli ni Yesu uyo asala pamulandu wenu. 21Yesu ngu akwikala mumulu ukufikila ulo Lesa akupanga ifintu fyonse ukuba ifyabwangu ukubati nimulya asosele kale ukupitila mubasoseshi bakwe ababuta. 22Echo Mosesi naye asosele ati, ‘Bashikulu, Lesa wenu, bakumutumina umo pali mwebo ukuti abe umusoseshi ukubati nine. Mukamumfwile kuli fyonse akusosa. 23Umuntu onse utakomfwe kufyo akusosa bakumufumya pabantu baku Lesa nokumulofya.’ 24Nachine nabasoseshi bambi, ukutatika kuli Samwele nabamukonkelepo, balikushimikila ifyanduno. 25Pakuti ifilayo fyonse Lesa asosele ukupitila mubasoseshi fyakumwebo. Echo mwebo muli abachipangano nchi icho Lesa apangile nefikolwe fyenu ukubati nimfilya Lesa asosele kuli Abulahamu ati, ‘Ukupitila mumukowa obe nakushukisha abantu bonse abapanonshi.’ 26Mfi nomba Lesa abushishe Umupyungi wakwe, amutumine kuli mwebo ukuti amushukishe ukupitila mukwalula onse muli mwebo ukufuma kumabifyo akwe.”
Chilala New Testament © Bible Society of Zambia, 1998.